តើលោកពូទីនញុាំអ្វី និងធ្វើកិច្ចការអ្វីខ្លះនៅពេលព្រឹកឡើង? (មានវីដេអូ)
ជាទម្លាប់របស់លោកពូទីន (Putin) គឺលោកគេងរហូតទាល់តែថ្ងៃរាងជ្រេបន្តិច ទើបក្រោកពីគេង ព្រោះលោកចូលគេងពេលកណ្ដាលអាធ្រាត្រ ឬរំលងអាធ្រាត្រ។ បន្ទាប់ពីភ្ញាក់ពីគេង លោកបរិភោគអាហារពេលព្រឹក (breakfast)។ អាហារពេលព្រឹកសម្រាប់លោកពូទីន មានលក្ខណៈសាមញ្ញបំផុត និងគ្មានអ្វីស្មុគស្មាញច្រើនទេ។
អាហារដែលលោកបរិភោគមានដូចជា ៖ ប្រហុកបស្ចិមប្រទេស (cheese) – ពងមាន់ក្រឡុកជាមួយបន្លែហើយយកទៅចៀន (អូមីឡែត – omelet) - ពងក្រួច (quails’ eggs) និងបបរគ្រឿង (porridge)។ បន្ទាប់មក លោកពិសាបង្អែមលាងមាត់ ជាទឹកផ្លែឈើកិន ឬកាហ្វេ។ បន្លែផ្លែឈើ ត្រីសាច់សព្វសារពើ សម្រាប់ផ្សំគ្រឿងធ្វើម្ហូប បង្អែម និងចំអាបគ្រប់យ៉ាងសម្រាប់លោកបរិភោគ គឺសុទ្ធសឹងត្រូវបានដាំដុះ និងចិញ្ចឹមនៅក្នុងទីកសិដ្ឋានមួយកន្លែង ដែលមើលការខុសត្រូវ និងដាំដុះបង្កបង្កើនផលដោយព្រះមេគណព្រះនាម Patriarch Kirill នៅជាយទីក្រុងមូស្គូ។ (ប្រភព ៖ AFP)
បន្ទាប់ពីបរិភោគអាហារពេលព្រឹកឆ្អែតហើយ លោកយកពេលទៅលម្ហែកាយ ដោយចុះហែលទឹក។ ក្នុងមួយថ្ងៃ លោកហែលទឹកមិនក្រោមពីរម៉ោងទេ។ ទីប្រឹក្សារបស់លោកពូទីនប្រាប់ថា គឺវិធីត្រាំខ្លួនក្នុងទឹកនេះហើយ ដែលលោកពូទីនអាចគិតចេញគំនិតថ្មីៗ (fresh ideas)។ ក្រៅពីនេះ លោកក៏ជាអ្នកចូលចិត្តហាត់ប្រាណនៅក្នុងក្លិបផងដែរ។ កីឡាដែលលោកចូលចិត្តគឺលើកដុំដែក (weight-lifting)។ ក្រៅពីត្រាំក្នុងអាងទឹកត្រជាក់ លោកក៏ចូលចិត្តត្រាំខ្លួនក្នុងអាងទឹកក្ដៅឧណ្ហៗផងដែរ។ (ប្រភព ៖ Associated Press)
ដើម្បីធានាសុវត្ថិភាពចំណីអាហារចំពោះលោកក្រែងមានគេដាក់ថ្នាំបំពុល គឺលោកមុននឹងបរិភោគចំណីអាហារ ត្រូវខាងមន្ត្រីពិនិត្យចំណីអាហាររបស់វិមានក្រឹមឡាំង (Kremlin) ភ្លក្សមើលសិន។ សូម្បីតែនៅពេលលោកទៅបំពេញទស្សនកិច្ចនៅក្រៅប្រទេស ក៏លោកមិនបរិភោគចំណីអាហារដែលចម្អិន និងផ្ដល់ជូនដោយប្រទេសជាម្ចាស់ផ្ទះនៃកិច្ចប្រជុំនោះទេ ហើយសូម្បីតែអាហារនោះត្រូវបានលើកដោយផ្ទាល់ដៃដោយប្រមុខរដ្ឋាភិបាល ឬប្រមុខរដ្ឋក៏លោកមិនទទួលដែរ។
ដាច់ខាត គឺអាហារដែលលោកបរិភោគ ត្រូវតែចម្អិនដោយផ្ទាល់ដៃ ដោយចុងភៅរបស់លោកផ្ទាល់ ហើយមានអ្នកជំនាញខាងភ្លក្សចំណីអាហារ ដើម្បីធានារសជាតិ និងសុវត្ថិភាពចំណីអាហារសម្រាប់លោក។ កាលពីខែកក្កដា ឆ្នាំ២០១៤ លោកពូទីនបានជួលអ្នកពិនិត្យអាហារសម្រាប់លោក ដើម្បីធានារសជាតិ និងសុវត្ថិភាពក្រែងមានអ្នកលួចដាក់ថ្នាំបំពុល។
អំពីការងារប្រចាំថ្ងៃ
នៅក្នុងខុទ្ទកាល័យដែលលោកពូទីនធ្វើការ គឺលោកប្រើប្រាស់តែឧបករណ៍ទាំងឡាយណាដែលមានសុវត្ថិភាព និងសន្តិសុខខ្ពស់បំផុត ដូចជា៖ កាបូបពណ៌ក្រហមសម្រាប់ផ្ទុកឯកសារជាប្រភេទក្រដាស និងទូរស័ព្ទខ្សែដែលបន្សល់ទុកតាំងពីសម័យសហភាពសូវៀត។
នៅក្នុងខុទ្ទកាល័យដែលលោកពូទីនធ្វើការ គឺលោកប្រើប្រាស់តែឧបករណ៍ទាំងឡាយណាដែលមានសុវត្ថិភាព និងសន្តិសុខខ្ពស់បំផុត ដូចជា៖ កាបូបពណ៌ក្រហមសម្រាប់ផ្ទុកឯកសារជាប្រភេទក្រដាស និងទូរស័ព្ទខ្សែដែលបន្សល់ទុកតាំងពីសម័យសហភាពសូវៀត។
ការងារប្រចាំថ្ងៃរបស់លោកចាប់ផ្ដើមដោយការពិនិត្យ និងអានសំណុំឯកសារចំនួនបី៖ ១- របាយការណ៍ស្ដីពីកិច្ចការជាតិដែលប្រមូលចងក្រង និងបញ្ជូនដោយអង្គភាពចារកម្មជាតិ ២- របាយការណ៍ស្ដីពីកិច្ចការអន្តរជាតិ (international affairs) ដែលប្រមូលចងក្រង និងបញ្ជូនដោយអង្គភាពចារកម្មក្រៅប្រទេស និង ៣- សរុបរបាយការណ៍នៅក្នុងជួររដ្ឋាភិបាលដែលប្រមូលចងក្រងនិងបញ្ជូនដោយកងទ័ពអមគណៈរដ្ឋមន្ត្រី៕
ប្រែសម្រួល ៖ អន សំអាង
ប្រភព៖ the Independent , Newsweek Magazine , the Telegraph , Business Insider
