ក្រុមឧទ្ទាមរឹបអូសយករថយន្ត និងអាវុធកងកម្លាំងស្ថានទូតអាមេរិកនៅយេមែន
តាមសេចក្ដីរាយការណ៍ CNN នៅថ្ងៃនេះ បានឱ្យដឹងថា ពួកឧទ្ទាម Houthi បានរឹបអូសយករថយន្តរបស់ស្ថានទូតអាមេរិកទាំងអស់ដែលចតនៅអាកាសយានដ្ឋានទីក្រុង Yemeni ហើយពួកគេថែមមិនអនុញ្ញាតឱ្យកងកម្លាំង Marines របស់សហរដ្ឋអាមេរិកយកអាវុធពួកគេថែមទៀតផង។ នេះបើតាមការអះអាងពីមន្ត្រីអាកាសយានដ្ឋាន Sanaa នៃទីក្រុង Yemeni។
សកម្មភាពនេះបានកើតឡើងបន្ទាប់ពីចក្រភពអង់គ្លេស និងសហរដ្ឋអាមេរិកបានប្រកាសផ្អាកដំណើរការនៅក្នុងស្ថានទូតរបស់ខ្លួន និងបានជម្លៀសបុគ្គលិកនៅក្នុងស្ថានទូតចេញបន្ទាប់ពីមាន បញ្ហាអស្ថិរភាពបានកើតឡើងនៅប្រទេសយេមែន។
តាមប្រភពដដែល ក្រុមពួកឧទ្ទាមបានរឹបអូសយកអាវុធរបស់កងកម្លាំង Marines ជាច្រើននៅអាកាសយានដ្ឋាននោះ ហើយក៏មានកងកម្លាំងអាមេរិកមួយចំនួនបានប្រគល់អាវុធរបស់ពួកទៅឱ្យមន្ត្រីអាកាសយានដ្ឋានទុកឱ្យ។
ដោយឡែក មន្ត្រីជាន់ខ្ពស់អាមេរិក បានថ្លែងប្រាប់បណ្ដាញសារព័ត៌មានថា កងកម្លាំងអាមេរិកបានទុកអាវុធ និងប្រគល់ឱ្យមន្ត្រីយេមែនទុកព្រោះពួកគេត្រូវបានកងកម្លាំងសន្តិសុខយេមែនជូនមកប្រលានយន្តហោះ ហើយពួកគេត្រូវជិះយន្តហោះប្រភេទពាណិជ្ជកម្មដែលមិនអាចយកអាវុធតាមខ្លួនបាន។
ទោះជាមានការថ្លែងបែបនេះក្ដី បុគ្គលិកជនជាតិយេមែនបម្រើការងារនៅក្នុងស្ថានទូតសហរដ្ឋអាមេរិកម្នាក់ បានប្រាប់អ្នកយកព័ត៌មានថា ស្ថានទូតអាមេរិកបានដុតឯកសារចោលរាប់ពាន់ ហើយបានបំផ្លាញអាវុធមួយចំនួនដែលទុកក្នុងឃ្លាំងនៅក្នុងស្ថានទូតនោះ៕
