ប្រមុខរាជរដ្ឋាភិបាលកម្ពុជាអនុញ្ញាតឲ្យក្រសួងសេដ្ឋកិច្ចបញ្ចេញទុនទិញប្រេងស្តុកទុកខណៈប្រេងចុះថោក
ប្រមុខរាជរដ្ឋាភិបាលកម្ពុជា អនុញ្ញាតឲ្យក្រសួងសេដ្ឋកិច្ចនិងហិរញ្ញវត្ថុបញ្ចេញថវិកាមួយចំនួនទិញប្រេងឥន្ធនៈមកស្តុកទុក ខណៈតម្លៃប្រេងកំពុងតែចុះថោក ។
ថ្លែងក្នុងពិធីចែកសញ្ញាបត្រដល់និស្សិតនៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រ សេដ្ឋកិច្ច (RULE) នៅមជ្ឈមណ្ឌលពិព័រណ៍ និងសន្និបាត កោះ ពេជ្រ នាព្រឹកថ្ងៃទី១០ ខែកុម្ភៈ ឆ្នាំ២០១៥នេះថា សម្ដេចនាយករដ្ឋមន្ត្រី បានផ្ដល់អនុសាសន៍ទៅឲ្យរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន ពិនិត្យទៅលើលទ្ធភាពបញ្ចេញថវិកាក្នុងការទិញប្រេងមករក្សាទុកដើម្បីបម្រុងទុកនៅពេលប្រេងឡើងថ្លៃវិញ។
លោកនាយករដ្ឋមន្ត្រី មានប្រសាសន៍ដូច្នេះថា៖«ខ្ញុំបានផ្ដល់អនុសាសន៍ទៅដល់រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ខ្ញុំថា ឲ្យសិក្សាមើលអាហ្នឹង ហើយបើអាចបញ្ចេញលុយទុនមួយចំនួនទិញយកមកស្តុកទុកម៉ង យើងមានស្ពានបម្រុងយើងមានប្រេងបម្រុងស្តុកទុក អែងឡើងវិញអញនៅសល់ប្រេង បើអញបញ្ចេញក៏គង់តែចំណេញដែរ » ។
សម្តេចបានបញ្ជាក់ទៀតថា តម្លៃប្រេងនឹងអាចឡើងថ្លៃនៅពេលណាមួយប៉ុន្តែវាមិនឡើងថ្លៃដូចកាលពីពេលមុននោះទេ ហើយបើសិនលោកជាថៅកែក្រុមហ៊ុន លោកនឹងទិញប្រេងមកស្ដុកទុក ។
សម្ដេចមានប្រសាសន៍ថា៖« ប្រសិនបើខ្ញុំជាក្រុមហ៊ុនប្រេងវិញខ្ញុំហ៊ាន បើខ្ញុំជាតេលាឬ ជាសូគីម៉ិច ខ្ញុំហ៊ានទិញស្តុក ប៉ុន្តែយើងមិនមែន ជាថៅកែក្រុមហ៊ុនផង»។
គួររំលឹកថា នៅក្នុងផែនការបញ្ចុះតម្លៃប្រេងលក់រាយនៅក្នុងស្រុកនេះ ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ រួមជាមួយស្ថាប័នក្រុមហ៊ុនប្រេងឥន្ធនៈនៅក្នុងស្រុកបានឯកភាព គ្នាធ្វើការជួបប្រជុំនៅទីស្ដីការក្រសួងពាណិជ្ជកម្មរៀងរាល់១០ ថ្ងៃម្ដងដើម្បី ពិនិត្យមើលតម្លៃប្រេងឥន្ធនៈ ហើយលទ្ធផលនៃកិច្ចប្រជុំ នឹងត្រូវផ្សព្វផ្សាយ ជាសាធារណៈតាមរយៈទូរទស្សន៍ វិទ្យុ សារព័ត៌មាន និងបណ្ដាញសង្គម ៕
អត្ថបទ ៖ ចាន់ សុខ នាង
