សមត្ថកិច្ចចាប់ខ្លួនឧត្តមសេនីយ៍យោធាមនុស្សជំនិតលោក អាំង មាលតី
ភ្នំពេញ: ឧត្តមសេនីយ៍យោធាម្នាក់ ដែលជាមនុស្សជំនិតរបស់លោក អាំង មាលតី អតីតប្រធានសាលាដំបូងរាជធានីភ្នំពេញ ត្រូវបានសមត្ថកិច្ចចាប់ខ្លួនបានហើយនៅក្នុងទឹកដីខេត្តតាកែវ កាលពីម៉ោងប្រមាណជាង ៦ ល្ងាចថ្ងៃទី១៩ខែកុម្ភៈនេះ បាននាំខ្លួនទៅតុលាការរាជធានីភ្នំពេញ ដើម្បីសាកសួរ។
ការចាប់ខ្លួនលោកឧត្តមសេនីយ៍យោធាឈ្មោះ ពេជ្រ ព្រហ្មមុនី្ន អត្តលេខ ០៤៨៥៤០ ក្នុងគោលបំណងដើម្បីយកមកសាកសួរករណីមិនប្រក្រតីមួយចំនួន នៃចំណាត់ការក្នុងសំណុំរឿង របស់សាលាដំបូងរាជធានីភ្នំពេញ នាពេលកន្លងមក។
ជាមួយគ្នានោះដែរ ការចាប់ខ្លួនលោកឧត្តមសេនីយ៍យោធាឈ្មោះ ពេជ្រ ព្រហ្មមុនី្ន បានធ្វើឡើងក្រោយពេលដែលដកតំណែងលោក អាំង មាលតី ហើយស្របពេលដែលលោកពេជ្រ ព្រហ្មមុនី្ន បានរត់គេចខ្លួនចេញឆ្ងាយពីទីក្រុងភ្នំពេញរហូតដល់តំបន់ភ្នំជីសូរ ក្នុងទឹកដីខេត្តតាកែវ។
យ៉ាងណាក៏ដោយ វត្ថុតាងមួយចំនួនដូចជា រថយន្ត ម៉ូតូ ដែលលោក អាំង មាលតី បានឲ្យលោកពេជ្រ ព្រហ្មមុន្នី យកទៅប្រើប្រាស់ត្រូវបានប្រមូលយកមករក្សាទុក នៅតុលាការក្រុងភ្នំពេញវិញ កាលពីយប់ថ្ងៃទី១៨ ខែកុម្ភៈ។ វត្ថុតាងទាំងនេះមិនទាន់អស់នៅឡើយ ដែលគេយកទៅប្រើប្រាស់ ខណៈពេលដែលមន្ត្រីតុលាការ កំពុងដើរប្រមូលហៅយកមកវិញ។
ឧត្តមសេនីយ៍យោធារូបនេះឈ្មោះ ពេជ្រ ព្រហ្មមុនី្ន អត្តលេខ ០៤៨៥៤០ មុខងារ នាយសេនាធិការរងកងទ័ពជើងគោក ត្រូវបានលោក អាំង មាលតី កាលពីថ្ងៃទី២២ ខែកក្កដា ឆ្នាំ២០១៤ ធ្វើលិខិតទៅលោក មាស សុភា អគ្គមេបញ្ជាការរងនៃកងយោធពលខេមរភូមិន្ទ និង ជាមេបញ្ជាការកងទ័ពជើងគោក ដែលមានកម្មវត្ថុសុំឧត្តមសេនីយ៍យោធារូបនេះ ដើម្បី សហការការងារ នៅសាលាដំបូងរាជធានីភ្នំពេញ លើផ្នែកសន្តិសុខនិងសណ្តាប់ធ្នាប់ ។
ក្រោយពីបានការអនុញ្ញាតពីលោកមាស សុភា រួចហើយ លោក ពេជ្រ ព្រហ្មមុនី្ន បាន មកបំពេញការងារនៅសាលាដំបូងរាជធានីភ្នំពេញ មួយរយៈ លោក អាំង មាលតី បានប្រគល់ រថយន្តមួយគ្រឿងម៉ាកហាំមើរ ស្លាកលេខ២-២២៦៦ ដែលជាវត្ថុតាងក្នុងបទល្មើសជួញដូរ គ្រឿងញៀន មកឲ្យប្រើប្រាស់ជាមធ្យោបាយធ្វើដំណើរប្រចាំថ្ងៃ ។
ក្រៅពីការងារសន្តិសុខនិងសណ្តាប់ធ្នាប់ក្នុងសាលាដំបូងរាជធានីភ្នំពេញ លោក ពេជ្រ ព្រហ្មមុនី្ន បានបន្ថែមការងាររហូត ដល់ដើរត្រួតពិនិត្យនិងតាមដានរាល់សកម្មភាពរបស់ចៅក្រម និង ក្រឡាបញ្ជី ព្រមទាំងឈានដល់ព្រះរាជអាជ្ញា និង ព្រះរាជអាជ្ញារង អមសាលាដំបូងរាជធានីភ្នំពេញថែម ទៀតផង ។ ក្នុងនោះ សូម្បីតែការសាកសួរជនត្រូវចោទក្នុងសំណុំរឿង ឪពុកម្តាយឧកញ៉ា ថោង សារ៉ាត់ និង សំណុំរឿងឃាតកម្មបាញ់សម្លាប់ឧកញ៉ា អ៊ឹង ម៉េងជឺ ក៏លោក អាំង មាលតី និង ឈ្មោះ ពេជ្រ ព្រហ្មមុន្នី ចូលរួមក្នុងការសាកសួរយកចម្លើយ ដែលខុសនឹងនីតិវិធី ពោលគឺបុគ្គលទាំងពីរនេះ ទោះបីជាប្រធានសាលាដំបូងរាជធានីភ្នំពេញក៏គ្មានសិទ្ធិចូលរួមក្នុងការសាកសួរនេះដែរ៕ ប្រភពៈ CEN
លោក ពេជ្រ ព្រហ្មមុនី្ន ត្រូវបានសមត្ថកិច្ចប៉េអឹម នាំខ្លួនទៅតុលាការរាជធានីភ្នំពេញ ដើម្បីសាកសួរ
