ប្រជាពលរដ្ឋមួយក្រុមទៀតនៅកោះកុងចាប់ផ្តើមចេញមុខប្រឆាំងនឹងក្រុមហ៊ុនស្ករអំពៅ
ប្រជាពលរដ្ឋប្រមាណ៣០០នាក់នៅខេត្តកោះកុង ដែលជាក្រុមថ្មីរងគ្រោះបាត់បង់ដីធ្លី នៅព្រឹកថ្ងៃអាទិត្យនេះ ចាប់ផ្តើមប្រមូលស្នាមមេដៃ និងពិភាក្សាគ្នា ដើម្បីដាក់ពាក្យបណ្តឹងប្រឆាំងនឹងក្រុមហ៊ុនស្ករអំពៅរបស់លោកឧកញ៉ា លី យ៉ុងផាត់។
តំណាងប្រជាពលរដ្ឋ លោក ង៉ែត ស៊ឹម អាយុ៣២ឆ្នាំ និងជាពលរដ្ឋរងគ្រោះដោយសារដីធ្លីដែរនោះ មានប្រសាសន៍ថាលោកកំពុងតែប្រមែប្រមូលប្រជាពលរដ្ឋមកពី៨ភូមិ ក្នុងឃុំចំនួន៤(ឃុំកណ្តោល ឃុំដងពែង ឃុំជីខលើ ជីខក្រោម) ក្នុងស្រុកបុទុមសាគរ និងស្រុកស្រែអំបិល ដើម្បីរៀបចំដាក់ពាក្យបណ្តឹងប្រឆាំងនឹងក្រុមហ៊ុន។ លោកបន្តថាក្រុមប្រជាពលរដ្ឋទាំងនេះជាក្រុមថ្មីមួយទៀត បន្ថែមលើប្រជាពលរដ្ឋខេត្តកោះកុងប្រមាណ២០០គ្រួសារ ដែលបានចេញមុខតវ៉ាជាបន្តបន្ទាប់។ លោកឲ្យដឹងទៀតថាប្រជាពលរដ្ឋនឹងដាក់ពាក្យបណ្តឹងទៅស្ថាប័នពាក់ ព័ន្ធ ដើម្បីរកដំណោះស្រាយ។
ពលរដ្ឋឲ្យដឹងថាជម្លោះដីធ្លីនៅខេត្តកោះកុងជាមួយក្រុមហ៊ុន ស្ករអំពៅបានអូសបន្លាយតាំងពីឆ្នាំ២០០៦ ហើយប៉ះពាល់លើដីប្រជាពលរដ្ឋរាប់ពាន់ហិកតា។
គួររំឮកថា កន្លងទៅប្រជាពលរដ្ឋប្រមាណ២០០នាក់ដែលជាក្រុមប្រជាពលរដ្ឋចាស់ បានចេញមុខតវ៉ាជាបន្តបន្ទាប់ ដើម្បីជំរុញឲ្យមានដំណោះស្រាយលើដីធ្លីរបស់ពួកគាត់ឲ្យបានឆាប់។
កាលពីខែសីហា ឆ្នាំ២០១៤ ក្រុមហ៊ុនភ្នំពេញស៊ូហ្គើរ បានប្រកាសយ៉ាងដាច់អហង្ការថា លោក លី យ៉ុងផាត់ មិនជាប់ពាក់ព័ន្ធក្នុងការគ្រប់គ្រង ឬមិនមានកម្មសិទ្ធិទាល់តែសោះក្នុងក្រុមហ៊ុនខុនខេនស៊ូហ្គើរ នៅខេត្តកោះកុង៕ ប្រភពៈ VOD
រូបថតដោយខេង ដេន ប្រជាពលរដ្ឋអ្នកសារព័ត៌មាន
