អ្នកជំនាញរុក្ខសាស្រ្ដអង់គ្លេសរកឃើញពូជផ្កាអ័រគីដេថ្មីពីព្រៃកម្ពុជា
អ្នកជំនាញរុក្ខសាស្រ្ដអង់គ្លេសបានរកឃើញផ្កាអ័រគីដេម្យ៉ាងនៅព្រៃ ភ្នំរបស់កម្ពុជាដែលគេមិនបានកត់ត្រាដឹងកាលពីមុន។
អ្នកជំនាញអង់គ្លេសបានឲ្យដឹងអំពីរឿងនេះមុនការតាំងពិព័រណ៍សួនច្បារដ៏ធំមួយដែលបង្ហាញអំពីផ្កាអ័រគីដេចម្រុះដែលគេនឹងរៀបចំធ្វើនៅក្រុងឡុងដ៍។
រូបថតឯកសារនៃផ្កាអ័រគីដេ
ប្រភេទពូជផ្កាអ័រគីដេថ្មីនេះត្រូវគេប្រមូលបានពីជួរភ្នំក្រវាញនៅកម្ពុជាដែលជាផ្នែកមួយនៃការរុករកនៅឆ្នាំ២០១៣ ហើយត្រូវគេនាំយកពូជទាំងនោះទៅក្រុងឡុងដ៍ប្រទេសអង់គ្លេស។
ប៉ុន្ដែបណ្ដាអ្នកស្រាវជ្រាវទើបបានដឹងថា វាជាពូជផ្កាថ្មីនៅពេលដែលអ័រគីដេនោះបានផ្កានៅផ្ទះកញ្ចក់មួយនៅក្រុងឡុងដ៍កាលពីខែធ្នូ។
ផ្កាអ័រគីដេនេះមានលក្ខណៈខុសប្លែកពីគេ ហើយមានរាងជាបំពង់ពណ៌ក្រហមចាស់មានប្រវែងប្រហែលជា១សង់ទីម៉ែត្រ។
គេមិនទាន់បានដាក់ឈ្មោះប្រភេទផ្កាអ័រគីដេថ្មីនេះទេ ប៉ុន្ដែវាស្ថិតនៅក្នុងក្រុមពូជផ្កា Porpax។
ការប្រកាសឲ្យដឹងដំណឹងនេះបានធ្វើឡើងខណៈពេលដែលសួន Royal Botanic Gardens នៅសង្កាត់ Kew ប៉ែកខាងលិចក្រុងឡុងដ៍កំពុងតែរៀបចំពិព័រណ៍ផ្កាអ័រគីដេពីថ្ងៃទី៧ខែកុម្ភៈ ដល់ថ្ងៃ៨ខែមីនា។
ប៉ុន្ដែពូជផ្កាពីកម្ពុជានេះមិនជាផ្នែកមួយនៃការតាំងពិព័រណ៍នេះទេ៕ ប្រភពៈ Radioaustralia
