Twitter មិនចង់ឱ្យអ្នកប្រើ Share តំណភ្ជាប់ (Link) ពី Instagram នោះទេ ហេតុអ្វី?
ថ្មីៗនេះបណ្ដាញសង្គម Twitter បានបង្កើតសារមួយដាស់តឿនដល់អ្នកប្រើរបស់ខ្លួនឱ្យបញ្ឈប់ការចែកចាយ (share) តំណភ្ជាប់ (link) ពីបណ្ដាញសង្គមរូបភាព Instagram តទៅទៀត ហើយងាកមកបង្ហោះ (Post) ដោយផ្ទាល់តែនៅលើ Twitter បានហើយ។
បណ្ដាញសង្គមដែលកំពុងមានអ្នកប្រើប្រាស់ប្រមាណ ២៨៤លានគណនី (គិតត្រឹមខែធ្នូ ឆ្នាំ២០១៤) នេះ ទើបបានបង្កើតសារថ្មីមួយបង្ហាញដល់អ្នកប្រើ Twitter មានលក្ខណៈចង់ស្នើឱ្យអ្នកប្រើចែករំលែក Post ផ្សេងៗតែនៅលើគេហទំព័ររបស់ខ្លួនផ្ទាល់ ល្អជាងការ Share តំណភ្ជាប់ពីខាងក្រៅជាក់ស្ដែងតំណភ្ជាប់ Instagram តែម្ដង។ សាររបស់ Twitter គឺលើកឡើង ចង់ឱ្យ User បង្ហោះរូបថតនៅលើ Twitter ដោយផ្ទាល់ ដើម្បីឱ្យអ្នកគាំទ្របានមើលឃើញ ជាជាង Share តំណភ្ជាប់ផ្សេងៗមកដាក់។
ដូចគ្នានឹងបណ្ដាញសង្គម Facebook ដែរ ដែលពេលនេះ Twitter កំពុងបន្តអភិវឌ្ឍខ្លួនទៅលើមាតិកាចម្រុះ ដើម្បីបំពេញតម្រូវការអ្នកប្រើ ជាក់ស្ដែងរបាយការណ៍មួយបានឱ្យដឹងថា បណ្ដាញសង្គមដែលបង្កើតតាំងពីឆ្នាំ២០០៦ នេះ មានគម្រោងដាក់ចេញ native video tool ក្នុងឆ្នាំ២០១៥នេះ។ ដូច្នេះហើយទើប Twitter ចង់ឱ្យ User សម្របខ្លួន បង្ហោះអ្វីផ្ទាល់ៗនៅលើគេហទំព័រខ្លួនតែម្ដង ដូចជាបណ្ដាញសង្គម Facebook អីចឹង៕
ប្រែសម្រួល៖ លី ឈៀន
ប្រភព៖ mashable
