លោក ជួន សុវណ្ណ៖ នគរបាលបញ្ជូនជនបង្កករណីគ្រោះថ្នាក់ចរាចរណ៍ ទៅសាលាដំបូង បែរជាតុលាការដោះលែង
ភ្នំពេញ: លោកស្នងការនគរបាលរាជធានីភ្នំពេញ បានស្នើទៅគណៈអភិបាលរាជធានីភ្នំពេញ ដើម្បីចាត់វិធានការតឹងរឹងមួយជាបន្ទាន់ ពាក់ព័ន្ធករណីសាលាដំបូងរាជធានីភ្នំពេញ ធ្វើការដោះលែងជនល្មើសបង្កគ្រោះថ្នាក់ចរាចរណ៍ បណ្តាលឲ្យមនុស្សស្លាប់ និងរបួស។
នៅក្នុងកិច្ចប្រជុំត្រួតពិនិត្យនៃការប្រកាសបង់ពន្ធ និងរៀបចំសន្តិសុខសណ្តាប់ធ្នាប់ នៅសាលារាជធានីភ្នំពេញ កាលពីព្រឹកថ្ងៃទី២៩ ខែមករា ឆ្នាំ២០១៤ លោកឧត្តមសេនីយ៍ឯក ជួន សុវណ្ណ អគ្គស្នងការរងនគរបាលជាតិ និងស្នងការនគរបាលរាជធានីភ្នំពេញ បានមានប្រសាសន៍ថា បញ្ហាសន្តិសុខសណ្តាប់ធ្នាប់ ជាពិសេសគ្រោះថ្នាក់ចរាចរណ៍នៅតែមានបញ្ហាប្រឈមយ៉ាងធ្ងន់ធ្ងរនៅរាជធានីភ្នំពេញ ក្នុងនោះគ្រោះថ្នាក់ចរាចរណ៍នៅខែមករា ឆ្នាំ២០១៥នេះ បានកើតឡើងចំនួន ៥៨ លើក ស្លាប់ ៧ នាក់ របួស ៧៧ នាក់ ខូតខាតម៉ូតូ ៧០ គ្រឿង និងរថយន្ត ២០ គ្រឿង ដែលផ្តើមចេញពីមូលហេតុដូចជា បើកហួសល្បឿនកំណត់ មិនគោរពសិទ្ធិអាទិភាព បើកបរក្នុងស្ថានភាពស្រវឹង និងបញ្ហាសុវត្ថិភាពយានយន្ត ជាដើម។
ដើម្បីធ្វើឲ្យគ្រោះថ្នាក់ចរាចរណ៍ អាចមានលទ្ធភាពកាត់បន្ថយបាន ត្រូវបានលោកជួន សុវណ្ណ ស្នើសុំឲ្យគណៈអភិបាលរាជធានីភ្នំពេញ ធ្វើការអន្តរាគមន៍ ប្រកាសច្បាប់ ការអនុវត្តច្បាប់ ទៅជនបង្ករបួសស្នាម។ នៅពេលបច្ចុប្បន្ន នគរបាលបានធ្វើការងារខិតខំប្រឹងប្រែងអស់លទ្ធភាព មានន័យថា នៅពេលយប់ នៅពេលដែលសមត្ថកិច្ចនគរបាល បានឃាត់ជនល្មើស ដែលមានជាតិអាកុលហួសពីកំណត់ច្បាប់ នគរបាលតែងតែបញ្ជូនជននោះ ទៅសាលាដំបូងរាជធានី ដូចជា ករណីជាក់ស្តែងថ្មីៗនេះ គឺស្ត្រីជនជាតិម៉ាឡេស៊ីម្នាក់ បានបើកបុកម៉ូតូកង់បី បណ្តាលឲ្យរបួសស្រាល។ ថ្វីត្បិតតែរបួសនោះស្រាល ប៉ុន្តែបទល្មើសរបស់នារីជនជាតិម៉ាឡេស៊ីនោះ បំពានច្បាប់របស់ព្រះរាជាណាចក្រកម្ពុជា ទី១ បើកបរបង្កឲ្យមានរបួសស្នាម និងបើករត់គេច មិនទទួលខុសត្រូវ ទី២ នៅពេលដែលសមត្ថកិច្ចនគរបាល ចាប់ឃាត់ខ្លួនបានហើយ ដែលស្ត្រីនោះ ស្ថិតក្នុងស្ថានភាពស្រវឹង មិនឲ្យសមត្ថកិច្ចនគរបាលវាស់ជាតិអាកុល ទី៣ នារីជនជាតិម៉ាឡេស៊ីនោះ បើកបររថយន្ត គ្មានប័ណ្ណបើកបរ របស់ព្រះរាជាណាចក្រកម្ពុជា។
លោកស្នងការនគរបាលរាជធានីភ្នំពេញ បានថ្លែងថា “នៅពេលដែលសមត្ថកិច្ចនគរបាល បានបញ្ជូននារីជនជាតិម៉ាឡេស៊ីនោះ ទៅតុលាការ ដើម្បីវិនិច្ឆ័យតាមច្បាប់ បែរជាតុលាការដោះលែង”។
លោក បានបន្តថា សំណុំរឿងមិនប្រក្រតី ក្នុងការដោះលែង ដែលសមត្ថកិច្ចនគរបាលបានបញ្ជូនទៅតុលាការ ករណីមានមនុស្សស្លាប់ របួស នៅក្នុងគ្រោះថ្នាក់ចរាចរណ៍ ដែលមានចែងក្នុងច្បាប់ រហូតមកដល់ពេលនេះ ក្នុងឆ្នាំ២០១៤ គឺតុលាការដោះលែងមិនប្រក្រតី ២៣ ករណី។ គាត់ ថា ក្នុងស្ថានភាពបង្កគ្រោះថ្នាក់ចរាចរណ៍ ប្រសិនបើយើងមិនបន្តឹងអនុវត្តការងារចរាចរ ហើយនៅតែបណ្តែតបណ្តោយ ឲ្យជនល្មើសរួចខ្លួនចំពោះមុខច្បាប់ ពោលគឺជននោះមិនរាងចាលទេ។ ជនល្មើសបើកបុករនាំងដែក សមត្ថកិច្ចនគរបាលចាប់បញ្ជូនទៅតុលាការ តែត្រូវបាន តុលាការដោះលែងបាត់។ យើងសំណូមពរហើយ សំណូមពរទៀត សំណូមពរយ៉ាងទទូចថា គឺសុំឲ្យមានការជម្រះក្តី នៅពេលជម្រះក្តីពេលណា ត្រូវដាក់ពន្ធនាគារ ឧទាហរណ៍ថា ត្រូវដាក់ទោស ៦ ខែ តែទោសនោះត្រូវព្យួរ អីចឹងជននោះមានទោសហើយ ដល់ពេលនោះ មនុស្សនោះ ត្រូវជាប់ទោស ពីបទ បើកបរមិនគោរពច្បាប់ បើកបរក្នុងស្ថានភាពស្រវឹង ឬបើកបរបង្កគ្រោះដល់អ្នកដទៃ ហើយរត់គេច ពីការទទួលខុសត្រូវ ឬបើកបរគ្មានច្បាប់។
លោកបានបញ្ជាក់ថា “បើនៅស្រុកគេ ការបើកបរអត់ប័ណ្ណបើកបរ មានទោសស្មើនឹងទោសឧក្រិដ្ឋ បណ្តាលឲ្យមនុស្សស្លាប់”។
“នេះជាបញ្ហាប្រឈមខ្លាំងណាស់ ក្នុងការរឹតបន្តឹងការអនុវត្តច្បាប់ចរាចរណ៍ ខណៈពេលដែលគ្រោះថ្នាក់ចរាចរណ៍នៅឆ្នាំ២០១៤ បណ្តាលឲ្យមនុស្សស្លាប់ ២.១៩៥ នាក់ ដោយមិនរាប់បញ្ចូលចំនួនអ្នកស្លាប់ នៅមន្ទីរពេទ្យ និងនៅតាមផ្ទះ”៕ ប្រភពៈCEN
