យោង​តាម​របាយការណ៍​ស្រាវជ្រាវ​របស់​អ្នក​វិភាគ Ming-Chi Kuo នៃ​ស្ថាប័ន KGI Securities ថ្មីៗ​នេះ​ឱ្យ​ដឹង​ថា ក្រុមហ៊ុន Apple មាន​សញ្ញាណ​ល្អ កាលពី​ត្រីមាស​ទី៤ ឆ្នាំ​២០១៤ កន្លង​ទៅ (អំឡុង iPhone 6 ទើប​ប្រកាស​ចេញ​ផ្លូវការ) ដែល​អាច​លក់​គ្រប់​ម៉ូដែល​ទូរស័ព្ទ iPhone ទាំងអស់​ដាច់​បាន ៧៣លាន​គ្រឿង។ ក្រៅពី​មាន​ការ​ព្យាករណ៍​អំពី​តួលេខ​លក់ iPhone 6 អ្នក​វិភាគ​ថែមទាំង ព្យាករណ៍​ទៀត​ថា Apple នឹង​ចេញ​លក់​នាឡិកាដៃ​ឆ្លាតវៃ Apple Watch របស់​ខ្លួន​នៅ​អំឡុង​ខែ​មីនា​ខាង​មុខ។

បើ​មើល​តាម​តារាង​តួលេខ​លក់​ទូរស័ព្ទ ថេប្លេត និង​កុំព្យូទ័រ​របស់​ក្រុមហ៊ុន Apple ដែល​ចេញ​ដោយ KGI បង្ហាញ​ថា ក្នុង​ចំណោម​គ្រប់​ម៉ូដែល iPhone ដែល​លក់​ដាច់​សរុប​បាន ៧៣លាន​គ្រឿង iPhone 6និង iPhone 6 Plus គឺ​ជា​ម៉ូដែល​ដែល​លក់​ដាច់​ជាង​គេ ពោល​គឺ​លក់​បាន ៤២​លាន​គ្រឿង និង ១៦លាន​គ្រឿង(គិត​ក្នុង​អំឡុង​ត្រីមាស​ទី៤ ឆ្នាំ​២០១៤)។ យ៉ាងណា​ចំពោះ​ការ​ព្យាករណ៍​តួលេខ​លក់ iPhone នៅ​ត្រីមាស​ទី១ ឆ្នាំ២០១៥ គឺ​មាន​ការ​ថមថយ​ចុះ​មក​នៅ​ត្រឹម ៦១លាន​គ្រឿង​ទៅ​វិញ។

ក្នុង​តារាង​លក់​ផលិតផល​របស់ Apple ខាង​លើ ក៏​មាន​ការ​បញ្ជាក់​ពី​តួលេខ​លក់​ iPad និង​កុំព្យូទ័រ Mac ផង​ដែរ។ សរុប​តួលេខ​លក់​គ្រប់​ម៉ូដែល iPad គឺ ២១លាន​គ្រឿង ដែល​ក្នុង​នោះ iPad Air 2 លក់​ដាច់​ជាង​គេ​បាន ១១លាន​គ្រឿង។ ចំណែក Mac លក់​ដាច់​បាន ៥លាន​គ្រឿង (នៅ​ត្រីមាស​ទី៤ ឆ្នាំ២០១៤)៕

ប្រែ​សម្រួល៖ លី ឈៀន

ប្រភព៖​ AppleInsider