មហាសេដ្ឋីលេខមួយលើលោក ប៊ីលហ្គេត ឲ្យប្រផ្នូលចំនួន ៤ ពីពេលនេះទៅទល់ឆ្នាំ២០៣០
លោកប៊ីលហ្គេត (Bill Gates) បានចេញផ្សាយជាសាធារណៈ នូវលិខិតចំហប្រចាំឆ្នាំ (annual letter) ដែលសុទ្ធសឹងជាការព្យាករណ៍អំពីស្ថានភាពរស់នៅរបស់ប្រជាពលរដ្ឋទូទាំងពិភពលោក គិតពីពេលនេះទៅទល់នឹងឆ្នាំ២០៣០។ លោកប៊ីលហ្គេតជាសហស្ថាបនិក (co-founder) ក្រុមហ៊ុនម៉ៃក្រូសូហ្វ (Microsoft) មានចក្ខុវិស័យវែងឆ្ងាយ ហើយធ្លាប់ព្យាករណ៍អំពីអនាគតនៃម៉ាស៊ីនកុំព្យូទ័រ និងសូហ្វវែ (Software) បម្រើឲ្យវិស័យនានានៅក្នុងពិភពលោក។ លើកនេះទៀត លោកប៊ីលហ្គេតបានគន់គូរឃើញអនាគតនៃពិភពលោក នាឆ្នាំ២០៣០ តាមបួនសន្ទស្សន៍ខាងក្រោមនេះ។
១- អត្រាមរណៈភាពក្នុងចំណោមកុមារ នឹងថយចុះ – ជំងឺប្រភេទខ្លះនឹងត្រូវបានកម្ចាត់អស់ពីផែនដី ៖ លោកប៊ីលហ្គេត ចង់កាត់បន្ថយអត្រាមរណៈភាពក្នុងចំណោមកុមារអាយុក្រោម៥ឆ្នាំ ឲ្យថយចុះពាក់កណ្ដាល។ កាលពីឆ្នាំ១៩៩០ អត្រានេះស្ថិតក្នុងសមាមាត្រ ១ ទល់នឹង ១០ ហើយពេលនេះ ១ទល់នឹង២០។ ត្រឹមឆ្នាំ២០៣០ លោកចង់កាត់មកនៅត្រឹម ១លើ៤០។ គោលដៅមួយទៀត គឺកាត់បន្ថយអត្រាមរណៈក្នុងចំណោមស្ត្រីសម្រាលបុត្រ ឲ្យថយចុះជាងបច្ចុប្បន្ន ៦៦%។ មួយវិញទៀត លោកចង់កម្ចាត់ជំងឺគ្រុនស្វិតដៃជើង – ជំងឺគ្រុនចាញ់ – និងរបកគំហើញថ្មីក្នុងបញ្ហាជំងឺអេដស៍។
២ – ទ្វីបអាហ្វ្រិកអាចមានក្រឡារំដោះខ្លួនផុតពីភាពក្រីក្រ៖ សព្វថ្ងៃនេះ ក្នុងមួយឆ្នាំៗ ប្រទេសនៅអាហ្វ្រិកទិញចូលស្បៀងអាហារមិនតិចជាង ៥០ ពាន់លានដុល្លារទេ។ ត្រឹមឆ្នាំ២០៣០ ទ្វីបអាហ្វ្រិកអាចដោះស្រាយបញ្ហាខ្វះស្បៀង ប្រសិនបើអនុវត្តបានជោគជ័យតាមវិធីបង្កើនផលិតភាព (improving yields) និងរកវិធីធ្វើទំនើបកម្មលើវិស័យកសិកម្ម។ ពេលដោះស្រាយបញ្ហានេះបាន បញ្ហាវិបត្តិស្បៀងលែងជាបញ្ហាចោទសម្រាប់អាហ្វ្រិកទៀតហើយ ហើយគេនឹងមានសន្តិសុខស្បៀងល្អប្រសើរ។
៣- ធនាគារចល័តជាកត្តាសំខាន់ ជួយដោះស្រាយភាពក្រីក្រ៖ ប្រជាពលរដ្ឋអាហ្រ្វិករាប់លាននាក់រកវិធីខ្ចីលុយពីធនាគារចល័តដើម្បីដោះស្រាយមុខរបររបស់ខ្លួនមិនបាន។ ដូចនេះ ទូរស័ព្ទដៃជាដំណោះស្រាយបញ្ហានេះ។ ពីពេលនេះទៅមុខ១៥ ឆ្នាំទៀត មនុស្ស២ ពាន់លាននាក់ដែលមិនទាន់មានខ្ទង់គណនីធនាគារ ឬមិនទាន់មានលេខកុងក្នុងធនាគារ (bank account) មានលទ្ធភាពបង្កើតកុងមួយម្នាក់ៗ ហើយទូទាត់ថ្លៃចំណាយនិងចំណូលតាមធនាគារ។
៤- វិស័យអប់រំកាន់តែរីកចម្រើនដោយសារសូហ្វវែ (software)៖ រាល់ថ្ងៃនេះ មានមនុស្សមិនតិចទេ ដែលចង់រៀនសូត្រដើម្បីអភិវឌ្ឍខ្លួន ប៉ុន្តែមានឧបសគ្គខ្លះៗ។ ដូចនេះ វិធីដោះស្រាយគឺការផលិតសូហ្វវែ ដែលប្រើប្រព័ន្ធឌីជីថល (digital) – ប្រើប្រព័ន្ធអ៊ីនធឺណិត។ល៕
ប្រែសម្រួល ៖ អន សំអាង
ប្រភព៖ businessinsider.com
