ចង់បានកងកុម្មង់ដូអាមេរិក Navy SEALs ធ្វើអង្គរក្ស ត្រូវចំណាយប្រាក់ប៉ុន្មាន?
នាបច្ចុប្បន្ននេះ មហាសេដ្ឋីលំដាប់កំពូលនៅសហរដ្ឋអាមេរិក ទិញសេវាថែរក្សាសន្តិសុខ ពីអតីតកងកម្មុង់ដូពិសេសរបស់សហរដ្ឋអាមេរិក ណេវីស៊ីល (Navy SEALS) ដោយផ្ដល់តម្លៃយ៉ាងខ្ពស់។ អស់លោកទាំងនោះ មិនខ្លាចអ្វីនឹងហ៊ានចំណាយប្រាក់យ៉ាងច្រើនសន្ធឹកសន្ធាប់ ដើម្បីបង្ការហានិភ័យផ្សេងៗដែលអាចកើតមានដូចជា៖ ទប់ស្កាត់ការបែកធ្លាយរឿងអាស្រូវរបស់ខ្លួនទៅមជ្ឈដ្ឋានខាងក្រៅ – ការពារសមាជិកក្នុងក្រុមគ្រួសារឲ្យរួចផុតពីការគម្រាមកំហែង ឬអំពើប្លន់ប្រដាប់អាវុធ – ការរៀបក្បួនអម ពេលត្រូវធ្វើដំណើរទៅកន្លែងឆ្ងាយជិត ទោះបីត្រូវឆ្លងប្រទេស និងការពារការវាយប្រហារពីក្រុមភេរវកម្ម។ល។
ក្រុមNavy SEALS ដែលបើករកស៊ីផ្ដល់សេវានេះ សុទ្ធតែជាអ្នកដែលចូលនិវត្តពីការងាររដ្ឋរួចហើយ។ អតីតកងកុម្មង់ដូ Navy SEALS ម្នាក់គឺលោក ចេសុនផាឌីឡា (Jason Padilla) ជាប្រធានក្រុមហ៊ុន SEALs on Security នៅរដ្ឋឡូសអេនជើឡេះ (Los Angeles)។ ក្រុមហ៊ុនលោកផ្ដល់សេវាសម្រាប់ក្រុមអ្នកមានកំពូល។ តម្លៃសេវាការពាររបស់ក្រុមហ៊ុនលោកគឺតម្លៃដែលទាបបំផុតយ៉ាងហោចណាស់ ៥០ ម៉ឺនដុល្លារក្នុងមួយឆ្នាំ និងច្រើនជាងនេះ។ ក្រុមហ៊ុនផ្ដល់សេវាជាលក្ខណៈកញ្ចប់ រាប់តាំងពីបញ្ជូនអង្គរក្សផ្ទាល់ (bodyguard) - រៀបក្បួនអម ពេលត្រូវធ្វើដំណើរឆ្ងាយជិត និងបង្ហាត់បង្រៀនយុទ្ធសាស្ត្រ និងល្បិចខ្លះៗ សម្រាប់ការពារខ្លួន (self-defence)។
អតីតកងកុម្មង់ដូ Navy SEALS ម្នាក់ទៀត គឺលោកគ្រីសហេបឹន (Chris Heben) ក៏បានបង្កើតក្រុមហ៊ុន SEAL Team Consulting ប្រចាំទីក្រុងក្លេវើឡេន (Cleveland) រដ្ឋអូហៃយ៉ូ (Ohio)។ លោកបានឲ្យដឹងថាអ្នកដែលទិញសេវាការពារពីក្រុមហ៊ុនលោក ត្រូវជូនដំណឹងជាមុន អំពីកន្លែងដែលត្រូវធ្វើដំណើរ ដើម្បីក្រុមលោករៀបចំ និងសម្រួលសន្តិសុខជូន មិនថាឆ្ងាយជិត ទោះបីទៅដល់ទ្វីបអាហ្វ្រិក។ ក្រុមលោកនឹងបញ្ជូនមនុស្សទៅពិនិត្យស្ថានការណ៍ និងប្រមូលព័ត៌មានសម្ងាត់រួចរាល់ ដើម្បីវាយតម្លៃហានិភ័យដែលអាចប្រឈម នៅតាមផ្លូវធ្វើដំណើរ។
សូមបញ្ជាក់ថា ក្រុមហ៊ុនរបស់លោក Heben និងក្រុមហ៊ុនលោក Padilla មិនមែនធ្វើការតែឯកឯងនោះទេ ព្រោះក្រុមហ៊ុនសហការជាមួយភ្នាក់ងារចារកម្មស៊ីអាយអេ (C.I.A) និងក្រុមស៊ើបអង្កេតពិសេសអែហ្វប៊ីអាយ (F.B.I) ថែមទៀត។ ក្រុមហ៊ុនមានបញ្ជីឈ្មោះ ឬនាមប័ណ្ណអ្នកដែលធ្លាប់ធ្វើការជាមួយគ្នាក្នុងអង្គភាពរដ្ឋ ហើយដែលកំពុងបំពេញការងារនៅក្នុងស្ថាប័នរដ្ឋដូចជាស៊ីអាយអេ ( C.I.A) -អែហ្វប៊ីអាយ (F.B.I) – ក្រសួងការបរទេស និងក្រសួងការពារជាតិ។ ក្រុមហ៊ុនមានគោលការណ៍មួយ គឺមិនរកស៊ីការពារអំពើទុច្ចរិតទេ។ ឧទាហរណ៍ ក្នុងករណីគេចង់ទិញសេវាការពារអំពើរត់ពន្ធគ្រឿងញៀន ឬតាមដានក្រែងប្ដី ឬប្រពន្ធខ្លួនមានគូស្នេហ៍លួចលាក់។ល។ គឺក្រុមហ៊ុនលោកមិនមានសេវាបែបនេះទេ។
ប្រែសម្រួល ៖ អន សំអាង
ប្រភព៖ businessinsider.com
