Google+ មិនឈ្នះ Facebook ទេ
Google Plus (Google+) ជា Social Network មួយថ្មី ដែលមានលក្ខណៈប្រើប្រាស់ប្រហាក់ប្រហែលនឹង Facebook។ តែគេសង្កេតឃើញថាកម្ពុជា បណ្តាញសង្គមនេះហាក់នៅឆ្ងាយពីចំណាប់អារម្មណ៍របស់អ្នកប្រើប្រាស់ ដោយមិនទទួលបានការកម្សាន្តផុលផុសដូចបណ្តាញសង្គម Facebook នោះទេ។
ជុំវិញការលើកឡើងខាងលើនេះ សុទ្ធា បុគ្គលិកផ្នែកដេគ័រនៅក្រុមហ៊ុន HPK ប្រាប់ថា Google Plus ហាក់នៅឆ្ងាយពីចំណាប់អារម្មណ៍របស់អ្នកប្រើប្រាស់ ជាពិសេសយុវវ័យខ្មែរ។
“សូម្បីខ្ញុំផ្ទាល់ក៏មិនធ្លាប់ឮគេនិយាយពីសេវាកម្មមួយនេះដែរពីមុនមក”។ ប៉ុន្តែយ៉ាងណា យុវជនរូបនេះថា បើសេវាកម្មថ្មីមួយនេះ មានភាពទាក់ទាញដូច Facebook មិនយូរមិនឆាប់នឹងទទួលបានការគាំទ្រជាមិនខាន។
សៀវហួរ និស្សិតសិក្សាផ្នែកទីផ្សារនៅសាកលវិទ្យាល័យ បញ្ញាសាស្រ្ត ស្ទាក់ស្ទើរក្នុងការឆ្លើយតប នៅពេលដែល Sabay សាកសួរពី Google Plus។
“ខ្ញុំអត់ស្គាល់ទេបងពី Google Plus។ ខ្ញុំធ្លាប់តែឮគេនិយាយពី Facebook ឬ Twitter ប៉ុន្តែសេវាកម្មសង្គមមួយនេះហាក់ដូចជាថ្មីសន្លាងសម្រាប់ខ្ញុំ”។
យុវជនរូបនេះថា បច្ចុប្បន្ន Facebook កំពុងតែវាយលុកស្រទាប់យុវវ័យយ៉ាងខ្លាំង ហើយសូម្បីតែសិស្សក្មេងៗនៅតាមសាលាជាច្រើន ក៏នាំគ្នានិយមលេង និងនិយាយតៗគ្នាពីសេវាកម្មសង្គមដ៏ពេញនិយមមួយនេះដែរ។ យុវជនរូបនេះថា បើ Google Plus ធ្វើការផ្សព្វផ្សាយឲ្យបានច្រើននិងទូលំទូលាយ អាចមានអ្នកចាប់អារម្មណ៍ឬសាកល្បងប្រើប្រាស់បណ្តាញសង្គមមួយនេះ។
ចំណែក នីដា និស្សិតសិក្សាផ្នែកគណនេយ្យនៅវិទ្យាស្ថានវ៉ាន់ ដា គណនេយ្យ ឲ្យដឹងដែរថា កញ្ញាធ្លាប់បង្កើតគណនី Google Plus កាលបើកដំណើរការសាកល្បងតាមការណែនាំពីមិត្តភ័ក្ដិ។
នីដា ប្រាប់ថា ដំបូងបង្កើតដោយសារគិតថាជាសេវាកម្សាន្តថ្មី អាចមានអ្វីប្លែកពី Facebook។ ប៉ុន្តែទោះបីបានបង្កើតហើយក៏ដោយ ក៏មិនសូវបានចូលលេងញឹកញាប់នោះដែរ ដោយសារមិនសូវមានមិត្តភ័ក្កិច្រើននិយមលេង ហើយណាមួយគិតថាលេង Facebook វាគ្រប់គ្រាន់ណាស់ទៅហើយ។
Google Plus បានភ្ជាប់មកជាមួយមុខងារពិសេសជាច្រើនដូចជា Hangout ដែលអនុញ្ញាតឲ្យអ្នកប្រើប្រាស់អាចប្រើសេវាកម្មហៅជាសំឡេង ដោយមិនបាច់មើលឃើញវីដេអូ។ ក្រៅពីនេះនៅមានចំណុចពិសេសដទៃទៀតដែល Google Plus បានបំពាក់នៅក្នុងសេវាកម្មថ្មីរបស់ខ្លួន ដើម្បីទាក់ទាញអ្នកប្រើប្រាស់ ឲ្យចូលលេងសេវាកម្មថ្មីរបស់ខ្លួនកាន់តែច្រើន។
Google+ (G+ ឬGoogle Plus) សេវាកម្មដែលបង្កើតឡើងដោយក្រុមហ៊ុន Google មួយនេះ បច្ចុប្បន្នមានចំនួនអ្នកចុះឈ្មោះប្រើប្រាស់ប្រមាណ ៥៤០ លាននាក់នៅជុំវិញពិភពលោក។
អត្ថបទ៖ ប៊ុណ្ណារ៉ា
