នាយកប្រតិបត្តិ Xiaomi និងប្រធានផ្នែកច្បាប់ Apple ប៉ះសម្ដីគ្នាខ្លាំងៗ
នាសន្និសីទអ៊ីនធឺណិតពិភពលោកក្នុងប្រទេសចិនកាលពីម្សិលមិញនេះ នាយកប្រតិបត្តិ Xiaomi និងមន្ត្រីជាន់ខ្ពស់របស់ Apple បានឌឺដងគ្នាកប់ៗជុំវិញផលិតផល និងមហិច្ឆតារបស់ខ្លួន។
ស្ថាបនិករបស់ Xiaomi លោក Lei Jun បានលើកឡើងថា ក្នុងរយៈពេលពី ៥ ទៅ ១០ ឆ្នាំក្រុមហ៊ុនរបស់ខ្លួននឹងក្លាយជាក្រុមហ៊ុនផលិត Smartphone លេខ១ ក្នុងលោក។ ក្បាលម៉ាស៊ីនក្រុមហ៊ុនបច្ចេកវិទ្យាចិនរូបនេះបានព្រលយសម្ដីថា៖ ”ខ្ញុំជឿថា គ្មាននរណាធ្លាប់គិតថា Xiaomi នឹងមកដល់ទីនេះទេកាលពីបីឆ្នាំមុន នៅពេលដែលយើងទើបចេញទូរសព្ទដំបូង ហើយពេលនេះក្លាយជាក្រុមហ៊ុនធំបំផុតទីបីក្នុងលោក។ ក្នុងរយៈពេលពី ៥ ទៅ ១០ ឆ្នាំ យើងអាចមានឱកាសក្លាយជាក្រុមហ៊ុនលេខ ១ ក្នុងលោក”។
ស្ថាបនិករបស់ Xiaomi លោក Lei Jun អួតពីក្រុមហ៊ុនរបស់ខ្លួននាសន្និសីទអ៊ីនធឺណិតនៅចិន
សម្ដីអួតរបស់មេដឹកនាំក្រុមហ៊ុនចិនខាងលើមិនបានធ្វើឲ្យលោក Bruce Sewell ប្រធានផ្នែកការងារច្បាប់ និងរដ្ឋាភិបាលរបស់ Apple ដែលចូលរួមព្រឹត្តិការណ៍ខាងលើដែរអង្គុយជាប់ឡើយ។ ពេលអ្នកសារព័ត៌មានសួរចំណាប់អារម្មណ៍របស់លោកពាក់ព័ន្ធនឹងសម្ដីរបស់នាយកប្រតិបត្តិ Xiaomi លោក Sewell បញ្ជាក់ដោយខ្លីថា៖ ”ការនិយាយគឺស្រួលទេ តែធ្វើទើបពិបាក”។
មតិរបស់មន្ត្រីជាន់ខ្ពស់ Apple មិនបានបង្អាក់អំនួតរបស់ប្រធានក្រុមហ៊ុន Xiaomi ឡើយ។ លោកបានបន្តថា៖ ”ក្នុងដែនដីវេទមន្តនេះ (ចិន) យើងមិនត្រឹមតែបង្កើតក្រុមហ៊ុនដូចជា Alibaba (ក្រុមហ៊ុនលក់ទំនិញលើអនឡាញធំបំផុតរបស់ចិន) តែក៏ផលិតអព្ភូតហេតុដ៏តូចដូចជា Xiaomi ដែរ”។
Xiaomi បានក្លាយជាក្រុមហ៊ុនផលិត Smartphone ធំបំផុតទីបីក្នុងលោកកាលពីខែតុលាកន្លងទៅ តាមពីក្រោយ Apple និង Samsungដែលឈរលេខពីរ និងលេខមួយ។ នេះបើតាមសារព័ត៌មាន Reuters។ ក្រុមហ៊ុនផលិត Smartphone ចិនមួយនេះមានចំណែកទីផ្សារ Smartphone ពិភពលោក ៦% ស្របពេល Apple មាន ១២% និង Samsung មាន២៥%។ នេះបើតាមការសិក្សារបស់ស្ថាប័ន Strategy Analytics។
ផលិតផលមួយចំនួនរបស់ Xiaomi ជារឿយៗត្រូវគេយកទៅប្រៀបធៀបនឹង iPhone របស់ Apple ថា មានរូបរាងស្រដៀងគ្នា។ ប្រធានផ្នែករចនារបស់ Apple លោក Jony Ive ធ្លាប់ហៅលក្ខណៈស្រដៀងនោះថា ជាការលួចចម្លង តែត្រូវនាយកប្រតិបត្តិ Xiaomi បដិសេធ៕
