ប្រធានអង្គភាព អ.ប.ព ជួប ប្រធានគណៈកម្មការទី១០នៃរដ្ឋសភា រសៀលនេះ
រាជធានីភ្នំពេញ៖ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ (អ.ប.ព) រួមទាំងអនុប្រធាន និងមន្ត្រីមួយចំនួនទៀត នឹងជួបពិភាក្សាការងារ ជាមួយគណៈកម្មការអង្កេត បោសសំអាត និងប្រឆាំងអំពើពុករលួយ ដែលជាគណៈកម្មការទី១០ នៃរដ្ឋសភា ដឹកនាំដោយលោក ហូរ វ៉ាន់ ប្រធានគណៈកម្មការទី១០ ដើម្បីសហការគ្នា និងធ្វើការជាមួយគ្នា គឺមិនមែនជាការសួរ ដេញដោលនោះទេ។
ការជួបពិភាក្សាការងារ ទាក់ទងទៅនឹងរឿងសហការគ្នា និងធ្វើការជាមួយគ្នាខាងលើនេះ នឹប្រព្រឹត្តទៅ នាវេលាម៉ោង ៣រសៀលថ្ងៃទី២៦ ខែវិច្ឆិកា ឆ្នាំ២០១៤នេះ នៅសាលប្រជុំវិមានរដ្ឋសភា។
លោក ហូរ វ៉ាន់ ប្រធានគណៈកម្មការទី១០ នៃរដ្ឋសភា បានឱ្យដឹងមុខជំនួបនោះថា គណៈកម្មការរបស់លោក ជួបគ្នាជាមួយ ប្រធានអង្គភាពប្រឆាំងអំពើពុករលួយ ដើម្បីសហការគ្នា និងធ្វើការជាមួយគ្នា ដូច្នេះការជួបគ្នានេះ គឺមិនមែនជាការសួរ ដេញដោលនោះទេ។
លោក ហូរ វ៉ាន់ បានបញ្ជាក់ថា ការជួបគ្នានេះគឺដើម្បីធ្វើការទំនាក់ទំនងគ្នា ដើម្បីរកវិធីសហប្រតិបត្តិការ ឲ្យបានល្អ ហើយក្រៅពីនេះគណៈកម្មការរបស់លោក ចង់បានព័ត៌មានមួយចំនួន ទាក់ទងការងារអនុវត្ត កន្លងមក និងចង់ដឹងពីផែនការ ទៅអនាគត។
ចំណែកលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយមិនអាចសុំការ អត្ថាធិប្បាយបានទេ នាព្រឹកនេះ។
លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ
លោក ហូរ វ៉ាន់ ប្រធានគណៈកម្មការទី១០ នៃរដ្ឋសភា
ប្រភពពី Free Press Magazine
