បុរសមេការសំណង់ម្នាក់ត្រូវសន្តិសុខការដ្ឋានកាប់ស្លាប់
រាជធានីភ្នំពេញ៖ បុរសជាមេការសំណង់ម្នាក់ ត្រូវសន្តិសុខយានការដ្ឋានផ្ទះសាងសង់មួយកន្លែងកាប់ជាច្រើនពូថៅ បណ្តាលឲ្យស្លាប់ ដោយសារតែជម្លោះពាក្យសម្តីគ្នា និងមានគំនុំជាច្រើនថ្ងៃកន្លងមក។
ហេតុការណ៍ខាងលើនេះបានកើតឡើងកាលពីវេលាម៉ោង៦និង៥០នាទីល្ងាច ថ្ងៃទី២០ ខែវិច្ឆិកា ឆ្នាំ២០១៤ ស្ថិតនៅផ្ទះសាងសង់ថ្មីលេខ០៩អា តាមផ្លូវលេខ៣៨៩ ក្នុងសង្កាត់ទួលស្វាយព្រៃ១ ខណ្ឌចំការមន។
បុរសជាមេការសំណង់ដែលស្លាប់ឈ្មោះ ជា សំខាន់ អាយុ៤៣ឆ្នាំ ជាមេការសំណង់ និងស្នាក់នៅផ្ទះសាងសង់ថ្មីខាងលើ រីឯជនសង្ស័យជាសន្តិសុខយាមនៅផ្ទះសាងសង់ថ្មីខាងលើដែរនោះឈ្មោះ មុក សារឿន អាយុ២៧ឆ្នាំ។ អ្នកទាំង២មានគំនុំចាស់នឹងគ្នាជាយូរហើយ។
តាមកម្មករសំណង់នៅការដ្ឋានខាងលើបានឲ្យដឹងថា ជនរងគ្រោះនិងជនសង្ស័យមានគំនុំជាយូរមកហើយ តែគ្រាន់តែទាស់ពាក្យសម្តីគ្នាប៉ុណ្ណោះ ដោយមិនបានវាយតប់គ្នានោះទេ ស្រាប់តែមកដល់ថ្ងៃកើតហេតុម៉ោងប្រហែលជាង៦ល្ងាច ជនរងគ្រោះបានទាស់ពាក្យសម្តីគ្នាម្តងទៀតជាមួយជនសង្ស័យជាសន្តិសុខាងលើ។
ប្រភពបន្តថា ពេលទាស់ពាក្យសម្តីគ្នាពេលនេះបានធ្វើឲ្យភាគីទាំងសងខាងខឹងសម្បានឹងគ្នាខ្លាំងណាស់ ទើបធ្វើឲ្យជនសង្ស័យទប់កំហឹងមិនបានក៏ទាញពូថៅនៅក្នុងការដ្ឋានមកកាប់ជនរងគ្រោះជាច្រើនពូថៅបណ្តាលឲ្យប្រកាច់ស្លាប់ក្នុងថ្លុកឈាមភ្លាមៗតែម្តង ពេលឃើញជនរងគ្រោះស្លាប់ហើយ ជនសង្ស័យបានរត់គេចខ្លួនពីកន្លែងកើតហេតុបាត់ស្រមោល។
ក្រោយកើតហេតុក្រុមកម្មករ ក៏បានរាយការណ៍ប្រាប់សមត្ថកិច្ចមូលដ្ឋាន ចុះមកអន្តរាគមន៍និងធ្វើកោសល្យវិច័យ សាកសពពិតជាត្រូវជនសង្ស័យកាប់នឹងពូថៅ បណ្តាលឲ្យសា្លប់ប្រាកដមែន រួចបានប្រគល់សាកសពឲ្យសាច់ញាតិយកទៅធ្វើបុណ្យតាមប្រពៃណី និងស្វែងរកចាប់ខ្លួន ជនសង្ស័យ យកមកផ្តន្ទាទោសតាមច្បាប់៕
បុរសមេការសំណង់ម្នាក់ ត្រូវសន្តិសុខការដ្ឋានកាប់ស្លាប់
ទិដ្ឋភាពកន្លែងកើតហេតុ
ប្រភពពី Free Press Magazine
