កម្មការិនីរោងចក្រ ត្រូវក្រុមស្ទាវហៅផឹកស៊ី និងចាប់រំលោភ បានសម្រេចទាំង ៩នាក់
ខេត្តកំពង់ឆ្នាំង ៖ នារីម្នាក់ក្នុងចំណោម ៣នាក់ ត្រូវបានក្រុមស្ទាវ ចំនួន ៨នាក់ ក្នុងចំណោមបក្ខពួក ៩នាក់ ធ្វើសកម្មភាព ចាប់រំលោភម្តងម្នាក់ៗ រហូតបានសម្រេច កាលពីវេលាម៉ោង ៨យប់ ថ្ងៃទី១៩ ខែវិច្ឆិកា ឆ្នាំ២០១៤ នៅត្រង់ចំណុចព្រៃមួយកន្លែង ក្បែរមាត់បឹងចាន់គៀត ក្នុងឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង ហើយជនសង្ស័យ ទាំង ៩នាក់ ត្រូវសមត្ថកិច្ច ស្រាវជ្រាវចាប់ខ្លួន បានជាបន្តបន្ទាប់ កាលពីយប់ថ្ងៃទី១៩ និងព្រឹកថ្ងៃទី២០ ខែវិច្ឆិកា ឆ្នាំ២០១៤ ។
ជនសង្ស័យទាំង ៩នាក់ រួមមាន ១-ឈ្មោះ ម៉ាត់ អែល អាយុ ២៥ឆ្នាំ, ២-ឈ្មោះ លី សូម អាយុ ២៣ឆ្នាំ, ៣-ឈ្មោះ សា អែល អាយុ ១៩ឆ្នាំ, ៤-ឈ្មោះ លី ឃាក់ អាយុ ១៨ឆ្នាំ, ៥-ឈ្មោះ ទិត្យ ប៉ូ ហៅសា អាយុ ២០ឆ្នាំ, ៦-ឈ្មោះ លី វ៉ាន់នី អាយុ ២០ឆ្នាំ, ៧-ឈ្មោះ ហ៊ឹម ទិត្យ អាយុ ២១ឆ្នាំ, ៨-ឈ្មោះ លី ស៊ីម អាយុ ១៩ឆ្នាំ និង៩-ឈ្មោះ សុខ អែល អាយុ ២០ឆ្នាំ ។ ជនសង្ស័យទាំង ៩នាក់នេះ ជាខ្មែរឥស្លាម មានទីលំនៅ ក្នុងភូមិឧកញ៉ាប៉ាង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ។
ដោយឡែក នារីរងគ្រោះទាំង ៣នាក់ ជាកម្មការិនីរោងចក្រ មានទីលំនៅក្នុងភូមិ ឧកញ៉ាប៉ាង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ហើយនៅល្ងាចកើតហេតុ ជនសង្ស័យបានទូរស័ព្ទ ទៅនារីរងគ្រោះ ដោយកុហកថា ទៅហូបបង្អែមនៅឧដុង្គ ប៉ុន្តែពេលជនសង្ស័យ បានឌុបនារីទាំងនោះ ទៅឯកំពង់ត្រឡាចក្រោមវិញ មិនបានទៅហូបបង្អែមទេ ហើយបានរៀបចំផឹកស៊ីនៅទីនោះ ។ ក្រោយពីបានជុំគ្នាផឹកស៊ី ក្រុមជនសង្ស័យ បានអូសបន្លាយពេលផឹកស៊ី រហូតដល់យប់ នឹងបានត្រឡប់មកវិញ ។
នៅពេលមកដល់កណ្តាលផ្លូវ ក្រុមជនសង្ស័យ ដែលជាក្មេងស្ទាវទាំងនោះ បានធ្វើសកម្មភាព ចាប់រំលោភ នារីរងគ្រោះតែម្តង ប៉ុន្តែក្នុងចំណោម នារីរងគ្រោះទាំងនោះ មាននារី ២នាក់ បានរត់គេចផុតពី កណ្តាប់ដៃបិសាចតណ្ហា ។ ដោយឡែក នារីរងគ្រោះម្នាក់ទៀត ត្រូវបានក្រុមជនសង្ស័យ ធ្វើសកម្មភាព ចាប់រំលោភម្តងម្នាក់ៗ រហូតបានសម្រេច នៅក្នុងព្រៃតាមផ្លូវលំមួយ លើកលែងតែ ជនសង្ស័យម្នាក់គត់ ដែលមិនបានរំលោភនាង គឺឈ្មោះ លី ឃាក់៕
_____________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
