កម្មកររោងចក្រជីមលីប្រមាណ២ពាន់នាក់តវ៉ាបិទផ្លូវជាតិលេខ៤ជាង៤ម៉ោង
កម្មកររោងចក្រ ជីម លី ( Ghim Li) ប្រមាណ២ពាន់នាក់ ក្នុងចំណោមកម្មករចំនួន ២ពាន់ ៧រយនាក់ សម្រេចចិត្តបិទផ្លូវជាតិលេខ ៤ ដែលជាកំណាត់ផ្លូវសម្រាប់ឆ្លងកាត់ពីភ្នំពេញទៅខេត្តព្រះសីហនុ ជាថ្នូរបង្ខំឲ្យភាគីរោងចក្រ ចេញមុខដោះស្រាយ។
ការបិទផ្លូវនេះ បានរំសាយទៅវិញ នៅចន្លោះម៉ោង ១២ ថ្ងៃត្រង់ ក្រោយពីបិទអស់ពេលប្រហែល ៤ម៉ោង កាលពីព្រឹកថ្ងៃទី ២៤ ខែ វិច្ឆិកា។
ឡាន តូច ធំ រ៉ឺម៉ក ម៉ូតូ រួមនិងអ្នកធ្វើដំណើរថ្មើរជើងផង បានកកស្ទះកកកុញ នៅលើផ្លូវ ចម្ងាយដីជាច្រើនគីឡូម៉ែត្រ នៅលើកំណាត់ផ្លូវជាតិលេខ ៤ ស្ថិតនៅក្នុងសង្កាត់កំបូល ខណ្ឌពោធិ៍សែនជ័យ ជាទីដែលកម្មករបិទផ្លូវ។ កម្មករប្រឆាំងការមិនចេញមកដោះស្រាយ ជុំវិញការទាមទារប្រាក់អត្ថប្រយោជន៍ និងស្នើសុំឲ្យភាគីរោងចក្រ ទទួលយកប្រធានជាងម៉ាស៊ីនផ្នែកដេរឲ្យចូលធ្វើការវិញ។
លោក វ៉ា ប៊ុនធឿន ដែលអះអាងថា ជាតំណាងកម្មករប្រចាំរោងចក្រ ជីម លី (Ghim Li ) ថ្លែងថា មូលហេតុដែលកម្មករប្រមាណ ២ពាន់នាក់ សម្រេចចិត្តបិទផ្លូវជាតិលេខ ៤ នេះ ដោយសារពុំមានជម្រើស។ម្យ៉ាងវិញទៀត ភាគីរោងចក្រ និងស្ថាប័នពាក់ព័ន្ធតែងព្រងើយកន្តើយ ជុំវិញការស្នើសុំកិច្ចអន្តរាគមន៍ម្ដងជាពីរដង។ ហេតុនេះ ក្រុមកម្មករបង្ខំចិត្តជ្រើសរើស យកមធ្យោបាយបិទផ្លូវនេះ ដើម្បីទាមទាររកដំណោះស្រាយ។ សំឡេង
ផ្លូវជាតិលេខ ៤ បានបិទមិនឲ្យអ្នកធ្វើដំណើរឆ្លងកាត់ស្ទើរពេញមួយព្រឹក ចាប់ពីម៉ោងប្រហែល ៩ព្រឹក រហូតដល់ ម៉ោង ១២ ថ្ងៃត្រង់ បានបើកឲ្យដំណើរការវិញ។ មូលហេតុនេះនៃការបើកឲ្យអ្នកធ្វើដំណើរឆ្លងកាត់នេះ ក្រុមកម្មករ និយាយថា ដោយសារមានកិច្ចអន្តរាគមន៍ ពីក្រសួងការងារ និងអភិបាលខណ្ឌពោធិ៍សែនជ័យ ថានឹងមានកិច្ចប្រជុំនៅព្រឹកថ្ងៃទី ២៥ វិច្ឆិកា ដើម្បីដោះបញ្ហាបញ្ចប់វិវាទ។
រឿងបិទផ្លូវនេះ បានក្លាយជាប្រធានបទថ្មីមួយទៀតហើយ សម្រាប់កម្ពុជា ក្នុងចំណោមបញ្ហានានា ក្នុងដំណាក់កាលចុងក្រោយនេះ។ មានមនុស្សមួយចំនួន ដែលជាក្រុមអ្នកតវ៉ាក្នុងរឿងដីធ្លី ត្រូវជាប់ពន្ធនាគារព្រោះតែរឿងបិទផ្លូវនេះ។ ចង់មិនចង់ អ្នកដែលបិទផ្លូវក្រោយៗទៀត អាចនឹងមានវាសនាដូច ស្ត្រីការពារដីធ្លីដែរ។ ការសម្រេចបែបនេះ របស់តុលាការ ត្រូវបានអង្គការសង្គមស៊ីវិលជាតិ និងអន្តរជាតិចាត់ទុកថា គឺជាវប្បធម៌អាក្រក់។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ យល់ឃើញថា នេះជាជម្រើសចុងក្រោយរបស់ក្រុមអ្នកតវ៉ា។ លោកបន្តថា ភាគីពាក់ព័ន្ធហាក់ដើរគេចពីបញ្ហា ហើយទុកឲ្យក្រុមអ្នកតវ៉ាបន្តទាមទារ ទាំងប្រថុយប្រថាន។ ម្យ៉ាងទៀត ការស្នើសុំរបស់កម្មករនេះ ក៏មិនហួសហេតុនោះដែរ ប៉ុន្តែទាំងភាគីរោងចក្រ និង អ្នកពាក់ព័ន្ធ ហាក់មិនទទួលខុសត្រូវ ក្នុងការបញ្ចប់បញ្ហានេះសោះ។សំឡេង
នៅពេលកម្មករ ធ្វើកូដកម្ម ក្នុងរយៈពេលពេញមួយសប្ដាហ៍មកនេះ ដោយភាគីរោងចក្រ ជីម លី មិនអាចដឹកទំនិញចេញពីរោងចក្របាន។ ហេតុនេះ ម្ចាស់ក្រុមហ៊ុនដែលជាជនជាតិចិន បានជួលកងកម្លាំងឆត្រយោងពិសេស ៩១១ ឲ្យកាងទំនិញក្នុងឃ្លាំង ដើម្បីដឹកចេញ។ បន្ថែមពីលើនេះ កម្មករឲ្យដឹងថា ពួកគេត្រូវបានប្រធានរដ្ឋបាលរោងចក្រ គំរាមប្រមាថអាយុជីវិត ដោយបញ្ជាឲ្យឡានបើកកិនសម្លាប់កម្មករ ដែលប្រឆាំងការមិនឲ្យទំនិញចេញថែមទៀត។
វិទ្យុអាស៊ីសេរី ពុំអាចសុំការបំភ្លឺពីប្រធានរដ្ឋបាលរោងចក្រ ជីម លី លោក សោម ពិសិដ្ឋ បានទេ ដោយទូរស័ព្ទរបស់លោករោទ៍ជាច្រើនដង ប៉ុន្តែពុំមានអ្នកទទួល។ ពាក់ព័ន្ធរឿងនេះ ការចរចាត្រីភាគី កាលពីថ្ងៃទី ២០ ខែ វិច្ឆិកា បានបរាជ័យម្ដងរួចមកហើយ។ មូលហេតុនៃការបន្តខ្វែងគំនិតគ្នា រហូតមិនអាចរកចំណុចរួមបាននោះ គឺក្រៅពីប្រាក់អត្ថប្រយោជន៍ និងលក្ខខណ្ឌការងារហើយ ជាពិសេសនោះ ខាងក្រុមហ៊ុន បដិសេធមិនអាចទទួលយកឈ្មោះ សេស ពិសី ជាប្រធានផ្នែកជាងម៉ាស៊ីន ឲ្យចូលធ្វើការឡើងវិញទេ។
បើទោះជាបែបណា ក្រុមកម្មករនៅតែព្រមានថា បើបញ្ហាដែលបានអូសបន្លាយមួយសប្ដាហ៍មកនេះ នៅតែត្រូវបានពន្យារពេល កម្មករនឹងបិទផ្លូវនេះសាជាថ្មីម្ដងទៀត៕
ប្រភពពី វិទ្យុអាស៊ីសេរី
