លោះព្រលឹងនឹងពស់ថ្លាន់ខាំទាញម្ចាស់ផ្ទះចូលបង្គន់ !
តាម Metro, អ្នកស្រី Rampeung Onlamai អាយុ ៥៧ ឆ្នាំ នៅ Samkok ប្រទេសថៃ ត្រូវបានសង្គ្រោះចេញផុតពីបង្គន់ ក្រោយពេលគាត់ត្រូវពស់ថ្លាន់១ក្បាល ដ៏ធំសម្បើមខាំជាប់ដៃស្តាំ រួចវាប្រឹងទាញគាត់ឲ្យចូលក្នុងបង្គន់តែម្តង ។
អ្នកស្រី Onlamai បានប្រឹងទាញយកអំបោសដែលនៅជិតនោះ ហើយវាយតបតបណ្តើរ ស្រែកហៅកូនឲ្យជួយបណ្តើរ ។ ភ្លាមៗនោះ កូនស្រីរបស់គាត់ក៏បានស្ទុះចូលបង្គន់ ជួយប្រតាយប្រតប់ទាញអ្នកស្រីចេញវិញបាន ។
ពស់ថ្លាន់ដ៏សាហាវ១ក្បាលនេះ បានលូនចេញបាត់ ហើយអ្នកស្រី Onlamai ត្រូវបានបញ្ជូនទៅកាន់មន្ទីរពេទ្យ ។ គ្រូពេទ្យបានដេរអស់ ២០ ថ្នេរ លើដៃអ្នកស្រី ។ សំណាងល្អហើយ ដែលវាពុំមានពិស ។
បច្ចុប្បន្ន កងកម្លាំងសន្តិសុខកំពុងតាម “ស្វែងរក” ចាប់ពស់ថ្លាន់ដ៏កាចសាហាវ១ក្បាលនេះផងដែរ ៕
