ហ្វេសប៊ុកផ្សព្វផ្សាយពីរូបភាពឃាតកបាញ់សម្លាប់ឧកញ៉ា នៅមុខហាងផ្លែឈើ
ភ្នំពេញ: ចាប់តាំងពីថ្ងៃកើតហេតុ កាលពីយប់ថ្ងៃសៅរ៍ បន្តរហូតដល់រសៀលថ្ងៃចន្ទ ទី២៤វិច្ឆិកានេះ បណ្តាញសង្គម ហ្វេសប៊ុក បានផ្សព្វផ្សាយនូវរូបថត និងវិដេអូ ចេញពីកាំម៉ារ៉ាសុវត្ថិភាព ព្រមទាំងវិដេអូ ថតតាមទូរស័ព្ទ នៅកន្លែងកើតហេតុ ជុំវិញឃាតកម្ម បាញ់សម្លាប់លោកឧកញ៉ា អ៊ឹង ម៉េងជឺ កាលពីម៉ោងជាង ៧ យប់ ថ្ងៃសៅរ៍ ទី២២ ខែវិច្ឆិកា ឆ្នាំ២០១៤ នៅខាងមុខហាងលក់ផ្លែឈើស្រស់ ជិតអាងទឹកស្តាតអូឡាំពិក។ បុរសឃាតក ត្រូវបានគេគូសបញ្ជាក់យ៉ាងច្បាស់ ពោលគឺបន្ទាប់ពីបាញ់សម្លាញ់ឧកញ៉ានោះហើយ ឃាតក បានមកពិនិត្យមើលសាកសព ថែមទៀត។
ខ្សែវិដេអូខ្លី ដែលគេបង្ហោះក្នុងហ្វេសប៊ុកនោះ ត្រូវបានអ្នកលេងហ្វេសប៊ុកបញ្ជាក់ថា ឃាតក បាញ់សម្លាប់ឧកញ៉ា និងប៉ូលិសស្លៀកពាក់ស៊ីវិល មានសៀតអាយកូម មានភិនភាគ និងសម្លៀកបំពាក់ដូចគ្នា។ ខុសត្រង់ថា ពេលបាញ់សម្លាប់ឧកញ៉ា បុរសនោះ មូលដៃអាវ ពាក់មួកប៉ារ៉េ និងពាក់ម៉ាស់។ តែពេលមកពិនិត្យមើលសាកសព បុរសនោះ មិនពាក់មួក មិនពាក់ម៉ាស់ និងបានទម្លាក់ដៃអាវចុះ ពេលគេថតបាន ហើយមានសភាពរាងតក់ស្លុត។
មិនទាន់មានការបកស្រាយបែបណាពីលោក ជួន ណារិន ស្នងការរង នគរបាលរាជធានីភ្នំពេញ នៅឡើយទេ ជុំវិញខ្លិបវិដេអូ ខាងលើនៅឡើយទេ។ យ៉ាងណាក៏ដោយ រហូតដល់រសៀល ថ្ងៃត្រង់ ថ្ងៃទី២៤ ខែវិច្ឆិកា ឆ្នាំ២០១៤ លោក ជួន សុវណ្ណ អគ្គស្នងការរង នគរបាលជាតិ និងជាស្នងការនគរបាលរាជធានីភ្នំពេញ បានមានប្រសាសន៍ថា សមត្ថកិច្ច នគរបាលជំនាញ កំពុងពន្លឿននីតិវិធី ស៊ើបអង្កេត លើករណីឃាតកម្ម បាញ់សម្លាប់លោកឧកញ៉ា អ៊ឹង ម៉េងជឺ។
លោកឧត្តមសេនីយ៍ បានបញ្ជាក់ថា នៅព្រឹកមិញនេះ ក៏មានកិច្ចប្រជុំជាមួយអគ្គស្នងការនគរបាលជាតិ ដើម្បីពន្លឿននីតិវិធី ស៊ើបអង្កេតលើករណីនេះ ឲ្យបានឆាប់។
ប៉ុន្តែមហាជន ដាក់ការសង្ស័យថា បើសិនជាខ្លិបវិដេអូ ដែលគេផ្សព្វផ្សាយតាមហ្វេសប៊ុកនោះ ជាការពិតមែន គឺប៉ូលិស នឹងមិនងាយរកឃើញឃាតកទេ ត្បិតអី ប៉ូលិស និងឃាតក ជាមនុស្សតែមួយដូច្នេះនោះ។
សូមបញ្ជាក់ថា វត្ថុតាងសំខាន់បំផុត ដែលសមត្ថកិច្ចជំនាញកំពុងតែសិក្សានោះ គឺតាមរយៈវីដេអូខ្លី ដែលយកចេញពីកាមេរ៉ាសុវត្ថិភាពរបស់ហាងលក់ផ្លែឈើស្រស់ ឡោតិចសេង នៅជិតអាងទឹកស្តាត ដែលថតបានសកម្មភាពខ្មាន់កាំភ្លើងបាញ់ប្រហារលើលោកឧកញ៉ា អ៊ឹងម៉េងជឺ កាលពីជាងម៉ោង ៧យប់ ថ្ងៃសៅរ៍ ទី២២ ខែវិច្ឆិកា ខណៈដែលជនរងគ្រោះ ដើរចុះពីរថយន្ត ចូលទៅក្នុងហាងលក់ផ្លៃឈើ៕ ប្រភពៈ CEN
