សាស្ត្រាចារ្យចិនម្នាក់ត្រូវសាលាដេញចោល បន្ទាប់ធ្វើឲ្យនិស្សិតស្រីសិង្ហបុរីម្នាក់មានផ្ទៃពោះ
កាលពីថ្ងៃទី ២០ វិច្ឆិកា កន្លងមកនេះ សាស្ត្រាចារ្យម្នាក់នៅសាកលវិទ្យាល័យ Peking ក្នុងទីក្រុងប៉េកាំង ត្រូវបានដកហូតមុខតំណែង និងអាជ្ញាប័ណ្ណបង្រៀន បន្ទាប់រងការចោទប្រកាន់មានទំនាក់ទំនងមិនសមរម្យជាមួយកូនសិស្សស្រីជាជនជាតិហ្វីលីពីនម្នាក់ ។
Yu Wanli អតីតសាស្ត្រាចារ្យរងផ្នែកសិក្សាអន្តរជាតិ នៃសាកលវិទ្យាល័យ Peking ត្រូវបានចោទប្រកាន់ថាបានរួមភេទជាមួយនិស្សិតស្រីសិង្ហបុរីឈ្មោះ Wang Jing និងថែមទាំងធ្វើឲ្យនាងមានផ្ទៃពោះទៀតផង ។
បើតាមប្រភពព័ត៌មាន បានឲ្យដឹងថា រឿងរ៉ាវបានលេចធ្លាយ គឺបន្ទាប់មិត្តភ័ក្តិរបស់ Wang ឈ្មោះ Liu Wei បានផ្តល់ព័ត៌មានទៅសាកលវិទ្យាល័យ ។ Liu បានផ្ញើសារ e-mail មួយ និងសំបុត្រ ៣ ច្បាប់ ទៅកាន់សាកលវិទ្យាល័យ រួមជាមួយរូបថតជាច្រើនសន្លឹក និងកំណត់ត្រាសន្ទនាគ្នា ពីទូរស័ព្ទរបស់ Wang ។ Wang ក្រោយមក ក៏បានប្រាប់អ្នកសារព័ត៌មានថាៈ កាលពីខែ កក្កដា ២០១៣, សាស្ត្រាចារ្យ Yu បានមករកនាងដល់បន្ទប់ស្នាក់នៅរបស់នាង ហើយពួកគេទាំងពីរក៏ចាប់ផ្តើមមានទំនាក់ទំនងផ្លូវភេទនឹងគ្នា តាំងពីពេលនោះមក ។
ក្រោយមក Wang បានដឹងថា Yu បានរៀបការ និងមានកូនម្នាក់ទៅហើយ នៅពេលនាងបានលេងផ្ទះរបស់ Yu ប៉ុន្តែ សាស្ត្រាចារ្យរូបនេះ បាននិយាយថា គាត់ និងប្រពន្ធ បានចែកផ្លូវគ្នាហើយ ។
Wang បានប្រាប់អ្នកសារព័ត៌មានថាៈ “ខ្ញុំមិនធ្វើជាស្រីកំណាន់ចិត្តនរណាម្នាក់ឡើយ ព្រោះវាមិនយុត្តិធម៌សម្រាប់រូបខ្ញុំ” ។ នាងបន្តឲ្យដឹងទៀតថាៈ “នៅពេលខ្ញុំមានផ្ទៃពោះ, Yu បានប្រាប់ខ្ញុំឲ្យយកកូនចេញ, ហេតុដូច្នេះ ខ្ញុំក៏បានសម្រេចចិត្តទម្លាយទំនាក់ទំនងរវាងខ្ញុំ និងលោកគ្រូ Yu ដល់មិត្តភ័ក្តិតែម្តងទៅ” ។
គួរបញ្ជាក់ថា Yu និង Wang បានស្គាល់គ្នានៅក្នុងវគ្គសិក្សាមួយ កាលពីឆ្នាំ ២០១៣ និងបានសាងស្នេហាផ្អែមល្ហែមស៊ីជម្រៅនឹងគ្នារហូតមកទល់រឿងរ៉ាវបែកធ្លាយនាពេលនេះ ៕
