កម្លាំងព្រហ្មទណ្ឌខណ្ឌដង្កោឃាត់ខ្លួនស្ត្រីម្នាក់ពាក់ព័ន្ធករណីដាក់ថ្នាំយកម៉ូតូ
ភ្នំពេញ ៖ ស្ត្រីម្នាក់ត្រូវបានសមត្ថកិច្ចនគរបាលព្រហ្មទណ្ឌខណ្ឌដង្កោ ឃាត់ខ្លួនកាលពីវេលាម៉ោង៧យប់ ថ្ងៃទី២៧ ខែវិចិ្ឆកា ឆ្នាំ២០១៤ នៅចំណុចទល់មុខវត្តព្រះបាទជាន់ឯក ខាងលិចផ្លូវបេតុង២១៧ ភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ពាក់ព័ន្ធនឹងករណីដាក់ថ្នាំយកម៉ូតូ១គ្រឿង ម៉ាកហុងដាសេ១២៥ ឲ្យទៅបក្ខពួករបស់ខ្លួនជិះគេចខ្លួនបាត់ដោយសុវតិ្ថភាព ។
សមត្ថកិច្ចផ្នែកព្រហ្មទណ្ឌខណ្ឌដង្កោម្នាក់ បានប្រាប់ឲ្យដឹងថា ជនសង្ស័យមានឈ្មោះ សូត សាវឿន ភេទស្រី អាយុ៣៨ឆ្នាំ មានស្រុកកំណើតនៅភូមិតាគៀត ឃុំចំប៉ី ស្រុកបាទី ខេត្តតាកែវ ។ បច្ចុប្បន្នស្នាក់នៅផ្ទះជួលភូមិត្រពាំងល្វា សង្កាត់កាកាប ខណ្ឌពោធិ៏សែនជ័យ រាជធានីភ្នំពេញ និងបក្ខពួកពីរនាក់ផ្សេងទៀតមិនស្គាល់ឈ្មោះ(គេចខ្លួន)។ ចំណែកជនរងគ្រោះមានឈ្មោះ វ័ន វ៉ន ភេទប្រុស អាយុ៥៥ឆ្នាំ(ម្ចាស់ម៉ូតូ)។
សមត្ថកិច្ចដដែលបន្តថា មុនកើតហេតុមួយថ្ងៃ ជនសង្ស័យបានជួលម៉ូតូជនរងគ្រោះជិះទៅដល់ភ្នំបាសិទ្ធក្នុងតម្លៃ១០ដុល្លារ រយៈពេលមួយព្រឹក ដល់ពេលថ្ងៃជនសង្ស័យជួលជិះក្នុងតម្លៃ១០ដុល្លារទៀត ហើយក្រោយមក ស្ត្រីជនសង្ស័យក៏សុំលេខទូរស័ព្ទរបស់ជនរងគ្រោះ(ម្ចាស់ម៉ូតូ)។
ដល់នៅថ្ងៃទី២៧ ខែវិចិ្ឆកា ស្ត្រីជនសង្ស័យក៏បានទូរស័ព្ទ ហៅ ជនរងគ្រោះដើម្បីជួលម៉ូតូជិះពីផ្សារចាស់ទៅតាខ្មៅ ។ នៅពេលទៅដល់តាខ្មៅស្ត្រី ជនសង្ស័យក៏ប្រាប់ឲ្យឌុបទៅដល់ផ្សារសំរោងយ៉ោង ខេត្តតាកែវ ខណៈដែលទៅដល់ផ្សារ ស្ត្រីជនសង្ស័យដើរចូលផ្សារ ហើយទិញកាហ្វេទឹកកកមួយថង់ផឹកខ្លួនឯង និងកាហ្វេទឹកកកទឹកដោះគោឲ្យទៅជនរងគ្រោះផឹក ហើយបានដាក់ថ្នាំសណ្តប់ក្នុងកាហ្វេទឹកដោះគោនោះ នៅពេលនោះ ធ្វើឲ្យជនរងគ្រោះវិលមុខ ទើបឆ្លៀតឱកាសយកម៉ូតូឲ្យបក្ខពួកគេជិះគេចខ្លួនបាត់ ។
លោក ហួរ ម៉េងវ៉ាង នាយផ្នែកព្រហ្មទណ្ឌខណ្ឌ ក៏បានប្រាប់ឲ្យដឹងដែរថា ស្ត្រីជនសង្ស័យក្រោយពីដាក់ថ្នាំសណ្តំយកម៉ូតូពីជនរងគ្រោះឲ្យគ្នីគ្នាជិះគេចខ្លួនបាត់ កម្លាំងល្បាតក៏ឃើញស្ត្រីសង្ស័យនៅមុខវត្តព្រះបាទជាន់ឯក ក៏ហៅសួរ ហើយស្ត្រីសង្ស័យហាក់បីដូចជានិយាយម្តងចេះម្តងចុះ ទើបកម្លាំងឃាត់ខ្លួនមកសួរនាំ ទើបដឹងថា ស្ត្រីជនសង្ស័យនេះបានដាក់ថ្នាំយកម៉ូតូ ។ បច្ចុប្បន្ន ស្ត្រីជនសង្ស័យកំពុងឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌដង្កោ និងកសាងសុំណំរឿងបញ្ជូនទៅតុលាការ ៕
ប្រភពពី នគរវត្ត
