ក្រុមឧទ្ទាមរដ្ឋឥស្លាមក្លាយជាក្រុមមានទ្រព្យសម្បត្តិច្រើនជាងគេនៅលើពិភពលោក
ក្រុមឧទ្ទាមរដ្ឋឥស្លាមដែលកំពុងវាយប្រហារនៅក្នុងប្រទេសស៊ីរី និងអុីរ៉ាក់ ក្លាយជាក្រុមឧទ្ទាមដែលមានទ្រព្យសម្បត្តិច្រើនជាងគេ ដោយសារការលក់ប្រេងខុសច្បាប់ និងការចាប់ជម្រិតទារប្រាក់។
សារព័ត៌មាន Channel News Asia ក្រុមឧទ្ទាមរដ្ឋឥស្លាមអាចផលិតបានប្រេង៥០ ០០០ធុង ហើយលក់ដោយខុសច្បាប់ក្នុងមួយថ្ងៃបានប្រមាណ១លានដុល្លារសហរដ្ឋអាមេរិក។ ទន្ទឹមនឹងការលក់ប្រេងនេះ ក្រុមឧទ្ទាមក៏បានអាចរកប្រាក់បានតាមរយៈការចាប់ជម្រិតមនុស្សទារប្រាក់ផងដែរ។
ក្រុមឧទ្ទាមរដ្ឋឥស្លាម (រូបថតពី៖ Channel News Asia)
ក្រុមឧទ្ទាមរដ្ឋឥស្លាមកំពុងវាយប្រហារដណ្តើមយកទឹកដីស៊ីរី និងអុីរ៉ាក់ ដើម្បីបង្កើតរដ្ឋឥស្លាមថ្មីមួយ។ ក្រុមឧទ្ទាមដែលកម្លាំងទ័ពជាង១០០០០នាក់នេះ ត្រូវសហរដ្ឋអាមេរិក និងប្រទេសសម្ព័ន្ធមិត្តជាង២០ប្រទេសកំពុងវាយប្រហារលើក្រុមនេះដោយចោទថា កំពុងធ្វើសកម្មភាពឃោរឃៅប្រឆាំងមនុស្សជាតិ។
ប្រាក់ដែលក្រុមឧទ្ទាមរដ្ឋឥស្លាមកំពុងរកបានតាមរយៈការផលិតប្រេង ប្លន់ប្រេង ចាប់ជម្រិត និងបានពីការបរិច្ចាគនានាតាមរយៈក្រុមអ្នកដែលគាំទ្រសកម្មភាពវាយប្រហាររបស់រដ្ឋឥស្លាមនេះ៕ ប្រភព ៖ VOD
