តុលាការកំពូលបដិសេធការសុំនៅក្រៅឃុំអតីតអគ្គកុងស៊ុលខ្មែរនៅវៀតណាម
រាជធានីភ្នំពេញ៖ ក្រុមចៅក្រមតុលាការកំពូលកាលពីថ្ងៃទី១៧ ខែតុលា បានសម្រេចបដិសេធលើកការស្នើសុំនៅក្រៅឃុំបណ្តោះអាសន្នក្នុងសំណុំរឿងក្លែងការសាធារណៈរបស់រដ្ឋក្នុងករណីនាំចេញឈើប្រណីតប្រមាណ ១.០០០ម៉ែត្រគូបទៅកាន់ប្រទេសវៀតណាមកាលពីអំឡុងចុងឆ្នាំ២០១៣។
ក្នុងសំណុំរឿងនេះមានជនជាប់ចោទចំនួន៧នាក់ត្រូវបានចោទប្រកាន់ ហើយមានតែជនជាប់ចោទចំនួន៤នាក់ទេដែលត្រូវបានចាប់ឃុំខ្លួននៅពន្ធនាគារប៉េហ្ស៊ី(PJ) និងពន្ធនាគារព្រៃស ចំណែក២នាក់ទៀតត្រូវបានចោទប្រកាន់ដូចគ្នា និងត្រូវបានតុលាការចេញដីការតាមចាប់ខ្លួន តែមានតែឈ្មោះតាំង សុខងី ម្នាក់ប៉ុណ្ណោះបានដាក់ពាក្យប្តឹងសាទុកមកតុលាការកំពូលសុំនៅក្រៅឃុំបណ្តោះអាសន្ន។
យោងតាមលោក ខឹម ប៉ុន ប្រធានចៅក្រមជំនុំជម្រះក្នុងចំណោមចៅក្រម៥រូបនៃតុលាការកំពូលថ្លែងក្នុងពេលសវនាការថាជនជាប់ចោទ ១-ឈ្មោះ តាំង សុខងី ភេទប្រុស អាយុ ៣៨ឆ្នាំ អតីតអគ្គកុងស៊ុលកម្ពុជាប្រចាំនៅទីក្រុងហូជីម៉ិញសាធារណរដ្ឋសង្គមនិយមវៀតណាមត្រូវចោទប្រកាន់និងចាប់ខ្លួនកាលពីខែមិថុនា ឆ្នាំ២០១៤ ពីបទចោទប្រកាន់ក្លែងឯកសារសាធារណៈ, ២-ឈ្មោះ នៅ សាខន ភេទប្រុស អាយុ៥២, ៣-ឈ្មោះស៊ុំ ឧត្តមរស្មី ភេទប្រុស អាយុ ២៤ឆ្នាំ, ៤-ញ៉េប សុវណ្ណា ភេទប្រុស អាយុ៤៩ឆ្នាំ, ៥-ឈ្មោះ ណាង ផាន់ទីដា ភេទប្រុស អាយុ៤៩ឆ្នាំ (ក្រៅឃុំ) ,៦-ឈ្មោះ ប៉ាល់ តូ ភេទប្រុស អាយុ៤៩ឆ្នាំ (ក្រៅឃុំ) និង៧-ឈ្មោះឡាន អន ភេទប្រុស អាយុ៥៧។ តែមានតែជនជាប់ចោទឈ្មោះ តាំង សុខងី បានប្តឹងឧទ្ធរណ៍សុំនៅក្រៅឃុំ ក្នុងនោះសាលាឧទ្ធរណ៍បដិសេធ ហើយបន្ទាប់មកប្តឹងសាទុក្ខមកតុលាការកំពូល៕
ប្រភពពី Free Press Magazine
