ពុទ្ឋបរិស័ទចំណុះជើងវត្តភ្នំខ្ពស់ ជំទាស់ទៅនិងការតែងតាំងព្រះចៅអធិការវត្តថ្មី
បាត់ដំបង៖ ពុទ្ឋបរិស័ទចំណុះជើងវត្តភ្នំខ្ពស់ប្រមាណជាង ១០០នាក់ បានប្រមូលផ្តុំគ្នា ជំទាស់ទៅនឹងក្រុមការងារធម្មការស្រុក អនុគណស្រុក និងអាជ្ញាធរចូលរួមប្រកាសតែងតាំងព្រះចៅអធិការវត្តថ្មី ជំនួសព្រះចៅអធិការចាស់។ ការជំទាស់របស់ក្រុមពុទ្ឋបរិស័ទចំណុះជើងវត្តមួយនេះ បានធ្វើឡើងកាលព្រឹកថ្ងៃទី២១ ខែតុលា ឆ្នាំ២០១៤ នៅក្នុងចំណុចវត្តភ្នំខ្ពស់ ស្ថិតក្នុងភូមិតាង៉ែន ឃុំតាគ្រាម ស្រុកបាណន់ ខេត្តបាត់ដំបង។
ពុទ្ឋបរិស័ទចំណុះជើងវត្តភ្នំខ្ពស់មួយចំនួន បាននិយាយថា រយៈពេល៣ថ្ងៃមកហើយ ចាប់តាំងពីថ្ងៃទី១៩ ខែតុលាមកម្ល៉េះ គឺមានប្រជាពលរដ្ឋមកពីស្រុកឆ្ងាយៗ ខ្លះមកតាំងពីខេត្តប៉ៃលិន ចូលរួមគាំទ្រព្រះចៅអធិការស្ដីទីចាស់ ព្រះនាម ឃឹម សំអឿន មានព្រះជន្ម៣៤វស្សាដែលបានបួសនិងគ្រងនៅក្នុងវត្តភ្នំខ្ពស់នេះ អស់រយៈពេល១៣ឆ្នាំមកហើយ ព្រមទាំងបានកសាងនូវ សមិទ្ធផលក្នុងវត្តយ៉ាងច្រើនថែមទៀតផង។
យោងតាមរបាយការណ៍ របស់ក្រុមការងារ ដែលមានអាជ្ញាធរ អនុគណស្រុក និងធម្មការស្រុក បានចុះមកក្នុងគោលបំណង ប្រកាសតែងតាំងព្រះចៅអធិការថ្មី ព្រះនាម ដួង សាខន មានព្រះជន្ម៦៣វស្សា ជំនួសព្រះអង្គ ឃឹម សំអឿន ដែលបច្ចុប្បន្នជាព្រះចៅអធិការស្តីទីនៅឡើយ។ ប៉ុន្តែត្រូវបានពុទ្ឋបរិស័ទចំណុះជើងវត្តធ្វើការជំទាស់ ដោយសុំឲ្យបង្ហាញអំពីមូលហេតុច្បាស់លាស់។
ចំណែកព្រះអង្គ ឃឹម សំអឿន បានមានសង្ឃដីកាថា ថ្វីត្បិតតែព្រះអង្គគ្រងជាចៅអធិការស្តីទី អស់រយៈពេលជាង១០ឆ្នាំ ក៏ដោយ គឺនៅពេលនេះ ព្រះអង្គមិនទាមទារអ្វីទាំងអស់ ធ្វើយ៉ាងណាឲ្យសមទៅតាមឆន្ទៈរបស់រាស្ត្រ បើពួកគាត់ឲ្យចុះចេញ គឺព្រះអង្គចុះភ្លាម តែបើពួកគាត់ជំទាស់ដោយសុំឲ្យ នៅគ្រងដដែល គឺព្រះអង្គនឹងនៅគ្រងបន្តទៀត ហើយក្នុងនាមជាចៅអធិការ គឺព្រះអង្គពុំមានពាក់ព័ន្ធទៅនឹងរឿងនយោបាយអ្វីនោះឡើយ។
បញ្ហាប្រឆាំងជំទាស់នេះ រហូតមកដល់រសៀលថ្ងៃទី២១ ខែតុលា គឺនៅមិនទាន់បញ្ចប់នៅឡើយទេ ដោយកំពុងជួបពិភាក្សាគ្នានៅឯសាលាខេត្តបាត់ដំបង និងដោះស្រាយបញ្ហានេះ។
ប្រភពពី Free Press Magazine
