សម័យអាសង់លក់ថ្លៃបំផុតជាឯតទគ្គកម្មនៅទីផ្សារស្រុកខ្មែរ
ម៉ូតូសង់ (ហុងដាឌ្រីម) របស់ក្រុមហ៊ុនហុងដាបានបញ្ចេញលក់លើទីផ្សារប្រទេសកម្ពុជាជាច្រើនជំនាន់មកហើយ និងទទួលបានការគាំទ្រពីអតិថិជនទិញយកទៅប្រើប្រាស់ជាហូរហែ។ អ្វីគួរឲ្យកត់សម្គាល់អំឡុងឆ្នាំ ២០១១ និង ២០១២ គឺជាឆ្នាំដែលម៉ូតូសង់របស់ហុងដាលក់ថ្លៃបំផុតជាឯតទគ្គកម្មនៅទីផ្សារប្រទេសកម្ពុជា ខណៈគ្រានោះប្រទេសថៃជួបប្រទះគ្រោះទឹកជំនន់យ៉ាងអាក្រក់បំផុតធ្វើឲ្យប៉ះពាល់ដល់ខ្សែសង្វាក់ផលិតកម្មរបស់ក្រុមហ៊ុនហុងដា ដែលនេះទើបធ្វើឲ្យទីផ្សារតម្លៃម៉ូតូសង់ហក់ឡើងខ្ពស់មិនធ្លាប់មាន និងពិបាករកទិញថែមទៀតផង។
លោក ទួត សីហា ម្ចាស់ហាងលក់ម៉ូតូទួត សីហា បានឲ្យដឹងថា អំឡុងឆ្នាំ ២០១១ និង ២០១២ ជាឆ្នាំដែលម៉ូតូសង់របស់ហុងដាលក់ថ្លៃបំផុតជាប្រវត្តិសាស្ត្រសម្រាប់ទីផ្សារស្រុកខ្មែរ។
“ឆ្នាំនោះតម្លៃអាសង់ឡើងជិត ២.៥០០ ដុល្លារដែលជាតម្លៃខ្ពស់បំផុតមិនធ្លាប់មាន និងពិបាករកទិញថែមទៀតផង”។
កាលពីឆ្នាំ ២០១១ ទឹកជំនន់បានវាយប្រហារប្រទេសថៃយ៉ាងធ្ងន់ធ្ងរ ដែលបានឆក់យកអាយុជីវិត និងបំផ្លាញទ្រព្យសម្បត្តិនិងសេដ្ឋកិច្ចថៃយ៉ាងសន្ធឹកសន្ធាប់ និងដែលបានធ្វើឲ្យប៉ះពាល់ដល់ខ្សែសង្វាក់ផលិតកម្មរបស់ហុងដា។
អាជីកររូបនោះបញ្ជាក់ថា ទឹកជំនន់បានវាយប្រហារយ៉ាងធ្ងន់ធ្ងរប្រទេសថៃកាលពីឆ្នាំ ២០១១ ដែលបានធ្វើឲ្យប៉ះពាល់ដល់ខ្សែសង្វាក់ផលិតកម្មរបស់ហុងដា ហេតុនេះទើបធ្វើឲ្យតម្លៃម៉ូតូសង់ហក់ឡើងខ្ពស់បែបនេះ។
លោក សុផល អាជីវករមួយរូបទៀតឲ្យដឹងដែរថា ឆ្នាំ ២០១១ និង២០១២ ម៉ូតូសង់លក់ថ្លៃបំផុតជាឯតទគ្គកម្មនៅទីផ្សារស្រុកខ្មែរ ដែលលោកមិនដែលបានជួបក្នុងការប្រកបរបរលក់ម៉ូតូប្រភេទនេះជាង ១០ ឆ្នាំ។
“ឡើងជិត ២៥០០ ទៅ ២៦០០ ដុល្លារ និងមិនសូវមានផង”។
លោកអះអាងថា ទោះបីក្នុងពេលដែលល្បីថាដីត្រូវប៉ាន់អំឡុងឆ្នាំ ២០០៧ និង ២០០៨ ដែលមានអតិថិជនសម្រុកទិញម៉ូតូសង់ប្រើប្រាស់ច្រើនក៏មិនឡើងថ្លៃដូចនេះដែរ ប៉ុន្តែឆ្នាំ ២០១១ និង ២០១២ ឡើងថ្លៃជាប្រវត្តិសាស្ត្រហើយ។
លោកថា រោងចក្រផលិតនៅថៃរងផលប៉ះពាល់ពីទឹកជំនន់ ជាហេតុធ្វើឲ្យការផ្គត់ផ្គង់មិនទាន់តម្រូវការ ដែលនេះនាំឲ្យប៉ះពាល់ទីផ្សារតម្លៃនៅស្រុកខ្មែរ។
សង់ជាប្រភេទម៉ូតូដ៏មានប្រជាប្រិយភាពក្នុងចំណោមពលរដ្ឋកម្ពុជា និងបានវាយលុកទីផ្សារជាច្រើនជំនាន់មកហើយ។ ពីមួយឆ្នាំទៅមួយឆ្នាំ ក្រុមហ៊ុនហុងដាតែងតែបញ្ចេញម៉ូតូសង់ស៊េរីថ្មីរបស់ខ្លួនជាបន្តបន្ទាប់ បើទោះបីកន្លងទៅមានការរិះគន់ពីអ្នកប្រើប្រាស់លើការរចនារូបរាងរបស់ម៉ូតូនេះ ដែលមិនមានការផ្លាស់ប្ដូរគួរឲ្យកត់សម្គាល់។
អត្ថបទ៖ ប៊ុណ្ណារ៉ា
