ជនវៀតណាមខុសច្បាប់កំពុងគេចពីការស្រង់ស្ថិតិ
រតនគិរីៈ អ្នកទេសចរវៀតណាម បានស្វះស្វែងរត់ការធ្វើសៀវភៅស្នាក់នៅខុសច្បាប់ពីអាជ្ញាធរមូលដ្ឋានក្នុង ស្រុកកូនមុំ ខេត្តរតនគិរី ខណៈជនអន្តោប្រវេសន៍វៀតណាម ខុសច្បាប់ នៅតាមក្រុមហ៊ុនដីសម្បទានសេដ្ឋកិច្ចត្រូវសង្កេតឃើញថា បានព្យាយាមរត់គេចពីការចុះស្រង់ស្ថិតិរបស់នគរបាល។
លោក ភោគ បូរិទ្ធ អធិការនគរបាល ស្រុកកូនមុំ បានឲ្យដឹងកាលពីម្សិលមិញថា អ្នកទេសចរជនជាតិវៀតណាម បួននាក់ បានទៅទាក់ទងអាជ្ញាធរ ឃុំស្រែអង្ក្រង កាលពីសប្តាហ៍កន្លងទៅដើម្បីឲ្យជួយធ្វើប័ណ្ណស្នាក់នៅមូលដ្ឋាននោះស្របច្បាប់។
លោកអធិការបានបញ្ជាក់ថា៖ «បួននាក់ហ្នឹងឲ្យឃុំជួយឃុបឃិតធ្វើលិខិតស្នាក់នៅ តែវាហួសពីសមត្ថកិច្ច យើងមិនអាចធ្វើកើតទេ ហើយយើងកំពុងរកអ្នកចេញប័ណ្ណឲ្យដោយខុសច្បាប់នេះ។ យើងបានឲ្យគាត់ធ្វើតាមច្បាប់វិញ»។
លោក បូរិទ្ធ បន្តថា អ្នកទេសចរទាំងនោះបានឆ្លងដែនចូលមកលេងកម្ពុជា ហើយបន្ទាប់ពីឃើញមានកន្លែងអាចរកស៊ីលក់ដូរបាន ក៏ចង់ស្នាក់នៅមួយរយៈ។ ប៉ុន្តែ លោក ពុជ ជិន ស្មៀន ឃុំស្រែអង្ក្រង បានអះអាងផ្ទុយពីលោកអធិការវិញថា ជនជាតិវៀតណាម ទាំងនោះគឺជាអ្នកដែលធ្វើការឲ្យក្រុមហ៊ុនវៀតណាម ហើយមានតែលិខិតឆ្លងដែនតែប៉ុណ្ណោះ។
លោក ឆាយ ធី អ្នកសម្របសម្រួលនៃសមាគមការពារសិទ្ធិមនុស្សអាដហុក ខេត្តរតនគិរី បានសង្កេតឃើញថា ក្រុមហ៊ុនដីសម្បទានសេដ្ឋកិច្ចវៀតណាម បាននិងកំពុងនាំជនជាតិវៀតណាម ចូល ខេត្តរតនគិរី ដោយប្រើប្រាស់លិខិតឆ្លងដែន ឬទិដ្ឋាការទេសចរណ៍ដើម្បីបំភាន់ភ្នែកអាជ្ញាធរមានសមត្ថកិច្ចខ្មែរ ដែលក្នុងមួយថ្ងៃៗ មានចន្លោះពី ១០០ ទៅ ២០០ នាក់។
លោក ឆាយ ធី បញ្ជាក់ថា៖ «កាន់សុទ្ធតែលិខិតឆ្លងដែនទេសចរណ៍ តែម៉េចបានជាកន្លែងទេសចរណ៍មើលមិនឃើញវៀតណាម? មិនមែនមកធ្វើទេសចរណ៍ទេ គឺមកដល់ចូលក្រុមហ៊ុនវៀតណាម ជាង ១០ ឯណោះក្នុងខេត្តនេះ»។
លោកអះអាងថា ក្រុមហ៊ុនវៀតណាម បានចេញថ្លៃធ្វើលិខិតឆ្លងដែន និងថ្លៃធ្វើដំណើរដឹកជនជាតិវៀតណាម ចូលមកកម្ពុជា ដើម្បីធ្វើកម្មករឲ្យក្រុមហ៊ុន ហើយពេលដែលនគរបាលអន្តោប្រវេសន៍ចុះត្រួតពិនិត្យឬស្រង់ស្ថិតិ ក្រុមហ៊ុនបានឲ្យកម្មករខុសច្បាប់ទាំងនោះរត់គេចខ្លួន។ នៅពេលនគរបាលទៅវិញ ពួកគេចេញមកធ្វើការជាធម្មតា។ លើសពីនេះ ពួកគេស្នើសុំប័ណ្ណស្នាក់នៅ និងសៀវភៅគ្រួសារ ហើយឈានដល់សុំធ្វើអត្តសញ្ញាណប័ណ្ណទៀតដើម្បីក្លាយជាពលរដ្ឋខ្មែរស្របច្បាប់។
លោក ឆាយ ធី ប្រាប់ទៀតថា៖ «គេប្រុងប្រយ័ត្នណាស់ ពេលដឹងថា ប៉ូលិសចូលមក គេឲ្យគេចខ្លួនអស់។ អ្នកទេសចរមិនអាចយកធ្វើកម្មករបែបនេះបានទេ។ វាខុសច្បាប់ទាំងស្រុង»។
មន្រ្តីអង្គការសិទ្ធិមនុស្សរូបនេះបានសម្តែងក្តីបារម្ភថា ក្រុមហ៊ុនដីសម្បទានសេដ្ឋកិច្ចវៀតណាម នឹងធ្វើឲ្យកម្ពុជាប្រឈមទៅនឹងបញ្ហាជនអន្តោប្រវេសន៍វៀតណាម យ៉ាងធ្ងន់ធ្ងរ បន្ទាប់ពីក្រុមហ៊ុនទាំងនោះបាននិងកំពុងបំផ្លាញធនធានធម្មជាតិរបស់កម្ពុជា។
ទោះយ៉ាងណា លោកអធិការ ភោគ បូរិទ្ធ បដិសេធថា មិនមានជនជាតិវៀតណាមប្រើលិខិតឆ្លងដែនទេសចរណ៍ចូលមកធ្វើការឲ្យក្រុមហ៊ុនច្រើន ដូចការចោទប្រកាន់របស់អង្គការក្រៅរដ្ឋាភិបាលនោះទេ។ ចំពោះករណីការរត់គេចរបស់កម្មករវៀតណាមខុសច្បាប់នោះ នគរបាលមិនបានដឹងទេ ហើយបើដឹងក៏មិនឲ្យពួកគេរត់រួចដែរ។
លោក ជា ប៊ុនធឿន ស្នងការរងនគរបាល ខេត្តរតនគិរី ទទួលបន្ទុកជនអន្តោប្រវេសន៍មានប្រសាសន៍ថា ចាប់ពី ខែសីហា មកកម្លាំងលោកបានចាប់បញ្ជូនជនអន្តោប្រវេសន៍ខុសច្បាប់វៀតណាម ចំនួន ៣៤ នាក់។ ទោះយ៉ាងណានៅក្នុងដីក្រុមហ៊ុនសម្បទានសេដ្ឋកិច្ចនគរបាលលោកមិនទាន់រកឃើញមានជនអន្តោប្រវេសន៍វៀតណាមខុសច្បាប់នោះទេ។
លោក ចាង វាំងវឹង អ្នកបកប្រែភាសានៅក្រុមហ៊ុន អាហ្គ្រីកូ ក៏បដិសេធការចោទពីការនាំកម្មករវៀតណាមខុសច្បាប់ផងដែរថា មិនមានជនជាតិវៀតណាម ខុសច្បាប់ធ្វើការនៅក្នុងក្រុមហ៊ុនលោកទេ។
ច្បាប់ស្តីពីអន្តោប្រវេសន៍បានចែងថា ជនបរទេសណាដែលគ្មានការអនុញ្ញាត ហើយចូលមកក្នុងព្រះរាជាណាចក្រកម្ពុជា ដោយលួចលាក់ បន្លំ ឬដោយល្បិចផ្សេងៗត្រូវផ្តន្ទាទោសដាក់ពន្ធនាគារពីបីខែទៅ ៦ខែ នឹងត្រូវបណ្តេញចេញ។ ដោយឡែកចំពោះអ្នកដែលឃុបឃិតប្រព្រឹត្តបទល្មើសនេះ ក៏នឹងទទួលទោសដូចគ្នាដែរ។ ប៉ុន្តែជាទូទៅសមត្ថកិច្ចបានត្រឹមតែចាប់បញ្ជូនទៅវិញតែប៉ុណ្ណោះ គឺមិនបានផ្តន្ទាទោសទេ ដោយសារថា នោះគ្រាន់តែជាកំហុសលើកដំបូង ហើយបើនៅបន្តប្រព្រឹត្តទៀតនឹងចាត់វិធានការច្បាប់៕
ប្រភពពី ភ្នំពេញប៉ុស្តិ៍
