ពាណិជ្ជករជប៉ុននៅកម្ពុជាទទួលរង្វាន់លើកទឹកចិត្ដចំពោះស្នាដៃការងារ៤៥ឆ្នាំ
កាលពីថ្ងៃពុធម្សិលមិញនេះ ពាណិជ្ជករជប៉ុនម្នាក់បានទទួលរង្វាន់សរសើរលើកទឹកចិត្ដចំពោះការ ចំណាយពេលវេលារបស់លោក៤៥ឆ្នាំសម្រាប់ការលើកកម្ពស់ការយល់ដឹងគ្នា ទៅវិញទៅមករវាងកម្ពុជា និងជប៉ុន។
លោកថែមទាំងបានបរិច្ចាគប្រាក់ផ្ទាល់ខ្លួនផងដែរដើម្បីធ្វើឲ្យពលរដ្ឋខ្មែរមានជីវិតកាន់តែប្រសើរ។
រស់នៅក្នុងក្រុងភ្នំពេញលោក Koju Kanzaki ប្រធានទីប្រឹក្សាក្រុមហ៊ុនវិស្វកម្ម និងសំណង់ Camcal Co. គឺជាបុគ្គលម្នាក់ក្នុងចំណោម១០៨នាក់ ក្នុងនោះមាន២០នាក់ជាជនជាតិជប៉ុនដែលបានទទួលរង្វាន់សរសើរពីរដ្ឋមន្រ្ដីការបរទេសជប៉ុនសម្រាប់ឆ្នាំ ២០១៤។
នៅឯពិធីទទួលរង្វាន់នេះនៅស្ថានទូតជប៉ុន លោកឯកអគ្គរាជទូត Yuji Kumamaru បាននិយាយថា ការផ្ដល់រង្វាន់លើកទឹកចិត្ដនេះ គឺជាកាយវិការបង្ហាញអំពីការទទួលស្គាល់ពីសំណាក់រដ្ឋាភិបាលជប៉ុនចំពោះសមិទ្ធផល និងស្នាដៃរួមចំណែករបស់លោក Koju Kanzaki នៅក្នុងប្រទេសកម្ពុជា ដូចជាការសាងសង់ហេដ្ឋារចនាសម្ព័ន្ធផ្លូវថ្នល់ដែលមានសារៈប្រយោជន៍យ៉ាងខ្លាំងសម្រាប់ជីវិតពលរដ្ឋខ្មែរប្រចាំថ្ងៃ។
ក្រៅពីធ្វើការងារសាងសង់ទំនប់ទឹក និងស្ដារផ្លូវជាតិនានាសប្បុរសជនដែលមានអាយុ៧០ឆ្នាំរូបនេះ ក៏បានរួមចំណែកសាងសង់សាលារៀនចំនួន១២កន្លែង និងផ្ដល់អាហារូបករណ៍២៦០ដល់សិស្សខ្មែរក្រីក្រផងដែរ ដោយប្រើថវិកាផ្ទាល់ខ្លួនរបស់លោក ដើម្បីឲ្យពួកគេអាចបន្ដការសិក្សាបាន។
លោកបានចាប់ផ្ដើមធ្វើការនៅកម្ពុជាតាំងពីឆ្នាំ១៩៦៩មកម្ល៉េះ ប៉ុន្ដែបានវិលទៅជប៉ុនវិញនៅពេលមានសង្រ្គាម។ លោកបានវិលមកកម្ពុជាវិញនៅឆ្នាំ១៩៨៧ ហើយថាបានចំណាយប្រាក់ផ្ទាល់ខ្លួនរាប់លានដុល្លារដើម្បីជួយអភិវឌ្ឍកម្ពុជា៕ ប្រភព ៖Radioaustralia
