ក្មេងស្ទាវពីរក្រុម ប្រយុទ្ធគ្នា ក្នុងពិធីរាំធុងបាស់ របួសធ្ងន់ និងស្រាល៥នាក់
កំពង់ឆ្នាំង: ក្មេងស្ទាវពីរក្រុម ដែលមកពីភូមិផ្សេងគ្នា បានបើកឆាកប្រយុទ្ធ យ៉ាងសាហាវ ដូចរឿងហុងកុង បន្ទាប់ពីពួកគេមានជម្លោះ នៅក្នុងពិធីរាំធុងបាស់មួយ។ ហេតុការណ៍នេះ បានកើតឡើង កាលពីម៉ោងជិត ៣ រសៀល ថ្ងៃទី២៤ ខែកញ្ញា ឆ្នាំ២០១៤ នៅភូមិសូភី ឃុំជើងគ្រាវ ស្រុករលាប្អៀរ ខេត្តកំពង់ឆ្នាំង។
នៅក្នុងហេតុការណ៍ វាយកាប់ចាក់គ្នានេះ បណ្តាលអោយមនុស្ស ៥ នាក់ រងរបួសធ្ងន់ និងស្រាល ក្នុងនោះ ១.ឈ្មោះ តុប វាសនា អាយុ២៤ឆ្នាំ រងរបួសធ្ងន់ ២.ឈ្មោះ ភុន បូរីម អាយុ២២ឆ្នាំ រងរបួសធ្ងន់ ៣. ឈ្មោះ ឱក សារ៉េត អាយុ២៣ឆ្នាំ រងរបួសធ្ងន់ ៤.ឈ្មោះ ថាន សុថុន អាយុ២៥ឆ្នាំ រងរបួសស្រាល និង ៥.ឈ្មោះ វឿង សារ៉ាត់ អាយុ២៥ឆ្នាំ រងរបួសស្រាល។ ជនរងគ្រោះទាំង ៥ នាក់នេះ ជាក្រុមតែមួយ មានទីលំនៅ ក្នុងភូមិអណ្តូងចេក ឃុំជើងគ្រាវ ស្រុករលាប្អៀរ ខេត្តកំពង់ឆ្នាំង។
ជនរងគ្រោះ បានអោយដឹងថា នៅក្នុងថ្ងៃកើតហេតុ មានពិធីរាំធុងបាស់មួយ នៅក្នុងភូមិសូភី ដែលស្ថិតនៅជាប់នឹង ភូមិអណ្តូងចេក ហើយពួកខ្លួន ក៏បានទៅរាំលេង នៅទីនោះដែរ ។ កំពុងតែរាំលេងសប្បាយ ក៍ស្រាប់តែ មានមនុស្សមួយក្រុម នៅក្នុងភូមិសូភីនោះ ប្រដាប់ដោយដំបង និងដែកឆាប បានធ្វើសកម្មភាពវាយ និងចាក់ មកលើពួកគេទាំង៥នាក់ បណ្តាលអោយរងរបួសគ្រប់ៗគ្នាតែម្តង ។
ជនរងគ្រោះ បានអោយដឹងទៀតថា នៅក្នុងហេតុការណ៍នោះ មានកម្លាំងប៉ូលិសមូលដ្ឋាន ដែលនៅយាមការពារទីនោះដែរ បានជួយអន្តរាគមន៍ និងបញ្ជូនពួកគេ មកកាន់មន្ទីរពេទ្យ៕V/S
ក្មេងស្ទាវពីរក្រុមប្រយុទ្ធគ្នាក្នុងពិធីរាំធុងបាស់ បណ្តាលអោយមនុស្ស ៥ នាក់ រងរបួសធ្ងន់ និងស្រាល
ប្រភពពី CEN
