រាជរដ្ឋាភិបាលសម្រេច ដកមកវិញនូវដីសម្បទាន សេដ្ឋកិច្ចពី ក្រុមហ៊ុនវិនិយោគចំនួន៨
រាជធានីភ្នំពេញ
៖ រាជរដ្ឋាភិបាល
បានសម្រេចដកមកវិញហើយនូវដីសម្បាទានសេដ្ឋកិច្ចពីក្រុមហ៊ុនចំនួន
៨ នៅភាគខាងជើង និងឦសាន្តប្រទេស ចំនួនជាង ១ ម៉ឺន ២ ពាន់ហិកតា
និងទម្លាក់រយៈពេលនៃការវិនិយោគលើដីសម្បទាន
ចំពោះក្រុមហ៊ុនដែលចុះកិច្ចសន្យាថ្មី ពី ៩៩ ឆ្នាំ មកត្រឹម ៥០
ឆ្នាំ ដោយសារតែមិនមានការអភិវឌ្ឍតាមកិច្ចសន្យា។នេះបើយោងតាមរដ្ឋមន្រ្តីក្រសួងបរិស្ថាន លោក សាយ សំអាល់ ដែលបានមានប្រសាសន៍នៅក្នុងសន្និសីទកាសែតពីដីសម្បទានសេដ្ឋកិច្ច និងយុទ្ធសាស្ត្ររបស់រាជរដ្ឋាភិបាលកម្ពុជា នារសៀលេថ្ងៃទី ២៩ ខែកញ្ញា ឆ្នាំ២០១៤ នៅទីស្តីការ ក្រសួងបរិស្ថាន។
លោករដ្ឋមន្ត្រី បានឲ្យដឹងថា តាមការវាយតម្លៃរបស់គណៈកម្មការ និងអន្តរក្រសួង ដើម្បីពិនិត្យ និងវាស់វែងដីសម្បទានសេដ្ឋកិច្ច រាជរដ្ឋាភិបាលបានសម្រេចចិត្តតាមលិខិតលេខ ១៣៦៥ សជណ ចុះថ្ងៃទី២៦កញ្ញាឆ្នាំ២០១៤ បានលុបគោលការណ៍វិនិយោគចំនួន ៨ ក្រុមហ៊ុន ជាលើកដំបូង។ ក្រុមហ៊ុន ដែលត្រូវរាជរដ្ឋាភិបាលដកហូតមកវិញ ហើយប្រគល់ឲ្យក្រសួងបរិស្ថានជាអ្នកគ្រប់គ្រង រួមមាន ទី១ ក្រុមហ៊ុនវិមានសិលា ដែលវិនិយោគផ្នែកទេសចរណ៍ នៅកោះថ្មី ខេត្តព្រះសីហនុ ចំនួន ៩៨៧ហិកតា ដែលជាផ្នែកមួយនៃឧស្យានជាតិព្រះសីហនុរាម។ ទី២ ក្រុមហ៊ុន សៀងហេង ដែលវិនិយោគផ្នែកទេសចរណ៍ ចំនួន៩៨៨ហិកតា នៅតំបន់ឧស្យានជាតិព្រះសីហនុរាម។ ទី៣ ក្រុមហ៊ុន សៀងហេង ដែលវិនិយោគផ្នែកទេសចរណ៍ ចំនួន៣៥០ហិកតា នៅតំបន់ឧស្យានជាតិព្រះសីហនុរាម។ ទី៤ ក្រុមហ៊ុន ប្លូម៉េតត្រូ ចំនួន៣៥០ហិកតា នៅតំបន់ឧស្យានជាតិព្រះសីហនុរាម។ ទី៥ ក្រុមហ៊ុនហេង ប៉ុណ្ណាត នៅតំបន់ឧស្យានជាតិព្រះសីហនុរាម។ ទី៦ ក្រុមហ៊ុន សាំងវឌ្ឍនៈ ចំនួន ៥៨៥ ហិកតាស្ថិតនៅទ្រនាប់សត្វឆ្លងកាត់ រវាងឧស្យានជាតិកុសុមៈគីរីរម្យ និងឧស្យានព្រះមុនីវង្សបូកគោ។ ទី៧ ក្រុមហ៊ុនចាន់រ៉ាត់ ចំនួន៦៣ហិកតានៅខេត្តកោះកុង ចំណុចតំបន់ប្រើប្រាស់ច្រើនយ៉ាងដងពេន និងទី៨ ក្រុមហ៊ុនឋានសួគ៌ចំកាត់ មានទីតាំងតំបន់ឧស្យានជាតិបទុមសាគរ ខេត្តកោះកុង ចំនួន ៩១៣៧ ហិកតា។
លោករដ្ឋមន្ត្រី បានបញ្ជាក់ថា “មូលហេតុធំបំផុត ដែលរាជរដ្ឋាភិបាលលុបចោលនូវអាជ្ញាប័ណ្ណវិនិយោគ គឺគាត់បានទៅយូរហើយ គាត់មិនមានការអភិវឌ្ឍន៍អីទេ។ នេះជាមូលហេតុចំបងនៃការដកហូតត្រឡប់មកវិញ។ យើងមិនមែនចេះដកហូត ដោយមិនមានមូលហេតុច្បាស់នោះទេ។ ដីដែលដកហូតមកវិញនេះ នឹងដាក់ទៅជាដីសម្រាប់អភិរក្ស ស្ថិតក្រោមការគ្រប់គ្រងរបស់ក្រសួងបរិស្ថាន ហើយដីនោះ មិនទាន់មានការកាប់ព្រៃនៅឡើយទេ”។
លោកបានបន្តថា ការលុបចោលដីវិនិយោគនេះ គឺជាការសម្រេចចិត្តរបស់រាជរដ្ឋាភិបាល ដែលឆ្លើយតបទៅនឹងកម្មវិធីនយោបាយរបស់គណបក្សប្រជាជនកម្ពុជា ស្របតាមការសន្យានៅពេលបោះឆ្នោតថា រាជរដ្ឋាភិបាលមិនផ្តល់ដីសម្បទានសេដ្ឋកិច្ចនៅឲ្យក្រុមហ៊ុនទៀតទេ។ ចំណែកដីដែលផ្តល់សម្បទានទៅឲ្យក្រុមហ៊ុនរួចមកហើយ រដ្ឋាភិបាលក៏កំពុងត្រួតពិនិត្យផងដែរ ដើម្បីវាយតម្លៃឡើងវិញ ថាតើក្រុមហ៊ុនទៅមុខរួចឬមិនរួច គឺរាជរដ្ឋាភិបាលនឹងដកហូតត្រឡប់មកវិញ។
លោក សាយ សំអាល់ បានថ្លែងបន្តថា រាជរដ្ឋាភិបាលដាក់គោលការណ៍ថ្មីចំនួន ៥០ឆ្នាំ ក្នុងការវិនិយោគ។ ចំពោះក្រុមហ៊ុនដែលមានគោលការណ៍ទៅហើយ និងបានចុះកិច្ចសន្យាទៅហើយ គឺនៅរក្សារយៈពេលវិនិយោគចំនួន ៩៩ ឆ្នាំដដែល ប៉ុន្តែចំពោះក្រុមហ៊ុន ដែលទទួលបានគោលការណ៍ហើយ ហើយនឹងត្រូវចុះកិច្ចសន្យាថ្មីជាមួយរាជរដ្ឋាភិបាល គឺកំណត់យកតែចំនួន ៥០ឆ្នាំទេ ក្នុងការវិនិយោគ៕
ប្រភពពី Free Press Magazine
