ប៉ូលិសឃាត់ខ្លួនយុវជន ម្នាក់វាយម្ដាយបង្កើត និងដែកស្បែង របួសធ្ងន់បង្ខំទារប្រាក់ ទិញថ្នាំញៀន
បាត់ដំបង
: ស្ត្រីជាម្ដាយបង្កើតរងរបួសយ៉ាងធ្ងន់ធ្ងរ
ដោយសារកូនប្រុសអកត្តញូម្នាក់ បានជេរប្រមាថ និងយកដែកស្បែង
វាយសំពងបង្ខំម្តាយបង្កើតទារប្រាក់យកទៅទិញថ្នាំញៀន។លោក សំ វីឡុង មេបញ្ជាការរងអាវុធហត្ថក្រុងបាត់ដំបង បានបញ្ជាក់ថា យុវជនសង្ស័យនិងវត្ថុតាង កម្លាំងបានកសាងសំណុំរឿងចោទពីបទ ហឹង្សាក្នុងគ្រួសារ បញ្ជូនទៅកាន់តុលាការ នារសៀលថ្ងៃទី១៥ខែសីហាឆ្នាំ២០១៤ ដើម្បីចាត់ការទៅតាមផ្លូវច្បាប់។
ករណីនេះ កម្លាំងអាវុធហត្ថក្រុងបាត់ដំបង បានឃាត់ខ្លួនយុវជនដៃដល់ កាលពីរសៀលថ្ងៃទី១៤ ខែសីហា ឆ្នាំ២០១៤ នៅចំណុចផ្ទះកើតហេតុ ស្ថិតក្នុងក្រុមទី៣២ ភូមិអូរចារ សង្កាត់អូរចារ ក្រុងបាត់ដំបង ខេត្តបាត់ដំបង។
លោក សំ វីឡុង មេបញ្ជាការរងអាវុធហត្ថក្រុងបាត់ដំបង បានឲ្យដឹងថា កូនប្រុសអកត្តញូ ដែលឃាត់ខ្លួន ឈ្មោះ ច័ន្ទ សៅ អាយុ ២០ ឆ្នាំ រស់នៅភូមិសង្កាត់កើតហេតុខាងលើ។ កម្លាំងអាវុធហត្ថក្រុង បានដកហូតបានវត្ថុតាងដែកចុងស្រួចមួយ និងដែកស្បែងមួយ។
ចំណែកស្ត្រីរងគ្រោះជាម្តាយបង្កើតជនសង្ស័យឈ្មោះ ឌុល សុភាព អាយុ ៥១ឆ្នាំ របួសយ៉ាងធ្ងន់ធ្ងរ។
ស្ត្រីរងគ្រោះ បានប្រាប់អាវុធហត្ថថា ជនសង្ស័យត្រូវជាកូនប្រុសបង្កើត នៅរសៀលថ្ងៃទី១៤ ខែសីហានោះគឺវា បានដើរចូលមកដល់ផ្ទះ ហើយស្រែកជេរឡូរឡារទាំងម្ដាយ និងអ្នកជិតខាង ហើយចូលទៅរើកកាយសម្ភារៈក្នុងផ្ទះ ដើម្បីយកទៅលក់បានប្រាក់ទិញថ្នាំញៀនប្រើប្រាស់។ ពេលនោះ រូបគាត់បានចូលទៅឃាត់ ហាមកូនប្រុសអកត្តញូនេះ វាជេរប្រមាថ និងយកដែកស្បែងមកវាយសំពងទៅលើរូបគាត់បណ្ដាលឲ្យរងរបួសយ៉ាង ធ្ងន់ធ្ងរ ហើយបានអ្នកជិតខាងជួយប្ដឹងសមត្ថកិច្ចចាប់ខ្លួនតែម្ដង។
កូនប្រុសអកត្តញូ បានសារភាពប្រាប់អាវុធហត្ថក្រុងបាត់ដំបងថា ពិតជាបានចូលទៅក្នុងផ្ទះរើកកាយសម្ភារៈ ដើម្បីយកទៅលក់បានប្រាក់ទិញថ្នាំញៀនប្រើប្រាស់ ហើយដោយខឹងអ្នកជិតខាងនិងខឹងនិងម្ដាយបង្កើតផង បានស្រែកជេរនិងវាយម្តាយ
ខ្លួនឯងរងរបួសយ៉ាងធ្ងន់ធ្ងរ ដោយសារគាត់ទៅកាន់ជើងអ្នកដទៃ និងហាមឃាត់មិនឲ្យយកឥវ៉ាន់ទៅលក់ប្រាកដមែន។
លោក សំ វីឡុង បានបញ្ជាក់ថា យុវជនសង្ស័យ និងវត្ថុតាង ត្រូវបានកម្លាំង កសាងសំណុំរឿងចោទពីបទ ហឹង្សាក្នុងគ្រួសារ បញ្ជូនទៅកាន់តុលាការ នារសៀលថ្ងៃទី១៥ ខែសីហា ឆ្នាំ២០១៤ ដើម្បីចាត់ការទៅតាមផ្លូវច្បាប់៕
