គ្រូបង្រៀននៅ បន្ទាយមានជ័យ ទាមទារឲ្យមន្ទីរអប់រំ បំភ្លឺពីការកាត់ ឈ្មោះមេប្រយោគ
ក្នុង
ការកែទម្រង់វិស័យអប់រំឲ្យមានគុណភាព ក្រសួងសាមីមួយនេះ
បានដាក់ចេញនូវកម្មវិធីថ្មីមួយ គឺមុខវិជ្ជាចំនួន៣
ក្នុងចំណោមមុខវិជ្ជាទាំង៧ នៅកម្រិតវិទ្យាល័យ
ត្រូវកាត់ចេញមិនដាក់ក្នុងវិញ្ញាសាប្រឡងទេ។ បញ្ហានេះ
បានបង្កើតឲ្យមានភាពចម្រូងចម្រាសឡើង។
ក្រុមគ្រូបង្រៀនមួយចំនួននៅខេត្ត
បន្ទាយមានជ័យ ដែលបង្រៀនចំមុខវិជ្ជាដែលត្រូវកាត់ចេញ អះអាងថា
មិនត្រឹមតែមុខវិជ្ជាទេដែលត្រូវខកខាន
តែថែមទាំងគ្រូបង្រៀនខ្លួនឯងផ្ទាល់
ក៏មិនមានឈ្មោះក្នុងបញ្ជីជាគណៈមេប្រយោគប្រឡងដែរក្នុងឆ្នាំនេះ។
ក្រុមគ្រូបង្រៀននៅតាមវិទ្យាល័យមួយចំនួន
ក្នុងខេត្តបន្ទាយមានជ័យ
ដែលមុខវិជ្ជាបង្រៀនរបស់ពួកគេត្រូវក្រសួងកាត់មិនឲ្យប្រឡងបាក់
ឌុបឆ្នាំនេះ ទាមទារឲ្យមន្ទីរអប់រំខេត្ត
បញ្ជាក់ពីមូលហេតុដែលពួកគេមិនអាចធ្វើជាគណៈមេប្រយោគប្រឡងបាន។
គ្រូបង្រៀននៅតាមវិទ្យាល័យមួយចំនួន ដូចជា
នៅវិទ្យាល័យ អូរអំបិល និងវិទ្យាល័យ សម្ដេចឪ ផង ឲ្យដឹងនៅថ្ងៃទី១ សីហា
ថា បើទោះជាមុខវិជ្ជាបង្រៀនរបស់ពួកគេ
ត្រូវបានក្រសួងកំណត់មិនដាក់ចូលសម្រាប់វិញ្ញាសាប្រឡងទុតិយភូមិ
ឬបាក់ឌុបក្នុងឆ្នាំនេះក៏ដោយចុះ តែថា
ស្ថាប័នអប់រំនៅថ្នាក់ក្រោមជាតិ
គប្បីបញ្ជាក់ពីមូលហេតុដែលគ្រូបង្រៀនចំមុខវិជ្ជា ហើយកាត់ចេញ
មិនអាចធ្វើជាគណៈមេប្រយោគប្រឡងបាន។
ថ្លែងក្នុងលក្ខខណ្ឌមិនបញ្ចេញឈ្មោះ ក្រុមគ្រូបង្រៀនទាំងនោះនិយាយថា
ផ្ទុយទៅវិញ អ្នកដែលមានឈ្មោះធ្វើជាគណៈមេប្រយោគប្រឡង
និងជាគណៈកម្មការខាងក្រៅក្នុងឆ្នាំនេះ បែរជាមានបុគ្គលិកមន្ទីរ
និងបុគ្គលិកការិយាល័យ ជាដើម៖ «សំឡេង»។
ឆ្លើយតបបញ្ហានេះ ប្រធានមន្ទីរអប់រំ
ខេត្តបន្ទាយមានជ័យ លោក ឈើយ ចាន់ណា អះអាងថា បញ្ហាទាំងអស់នេះ
គឺជាបន្ទុក និងជាការរៀបចំទាំងស្រុងរបស់ក្រសួងអប់រំ យុវជន
និងកីឡា។ លោកបន្តថា
វាពុំមែនជាចំណាត់ការរបស់មន្ត្រីនៅថ្នាក់ក្រោមជាតិនោះទេ៖
«សំឡេង»។
សម្រាប់ការប្រឡងកម្រិតបាក់ឌុប
ឬទុតិយភូមិក្នុងឆ្នាំ២០១៤ នេះ នឹងត្រូវចាប់ផ្ដើមនៅថ្ងៃទី៤ សីហា
ខាងមុខ។ ដោយឡែកការប្រឡងឆ្នាំនេះ ខុសពីឆ្នាំមុនៗ
ដោយក្រសួងបានកាត់ចោលមុខវិជ្ជាចំនួន៣ ក្នុងចំណោមមុខវិជ្ជាទាំង៧
ថ្នាក់កម្រិតវិទ្យាល័យ។
មុខវិជ្ជាដែលត្រូវកាត់ចេញមិនរាប់បញ្ចូលក្នុងការប្រឡងឆ្នាំនេះ
រួមមាន ប្រវត្តិវិទ្យា ភូមិវិទ្យា និងផែនដី។
លោក រ៉ុង ឈុន
ប្រធានសមាគមគ្រូបង្រៀនកម្ពុជាឯករាជ្យ
ចាត់ទុកចំណាត់ការរបស់មន្ទីរអប់រំ នៅពេលនេះថា
ជារឿងដែលមិនអាចទទួលយកបាន។ យ៉ាងណា
ពួកគេគប្បីត្រូវបានលើកទឹកចិត្តតាមរយៈវិធីសាស្ត្រនេះ
ជាជាងអ្នកដែលពុំមានជំនាញពាក់ព័ន្ធ
ហើយត្រូវបានផ្ដល់ឱកាសវិញនោះ៖ «សំឡេង»។
ជារៀងរាល់ឆ្នាំ
ពេលមានការប្រឡងម្ដងៗសម្រាប់កម្រិតទុតិយភូមិ ឬបាក់ឌុបនេះ
ក្រុមគ្រូបង្រៀននៅតាមវិទ្យាល័យ
ត្រូវកំណត់ឲ្យទទួលបន្ទុកធ្វើជាគណៈមេប្រយោគប្រឡងផង
និងជាអ្នកកែផង៕
ប្រភពពី វិទ្យុអាស៊ីសេរី
