កាល​ពី​មុន​នេះ ​បន្តិច កម្ពុជា​បាន​លេច​មុខ​លើ​គេហទំព័រ​ដ៏​ល្បី​របស់​អង់គ្លេស BBC សា​ជា​ថ្មី ដោយ​ដាក់​ចំណង​ជើង​ថា “Cambodian rat meat: A growing export market” ដែល​មាន​ន័យ​ជា​ខេមរភាសា “សាច់​កណ្ដុរ​កម្ពុជា កំពុង​ត្រូវ​ប៉ាន់​ក្នុង​ការ​នាំ​ចេញ​ទៅ​ទីផ្សារ​ក្រៅ​ស្រុក”។

សារព័ត៌មាន ​ដ៏​ធំ​មួយ​នេះ បាន​បញ្ជាក់​ថា ការ​ចាប់​កណ្ដុរ​របស់​ប្រជាជន​ខ្មែរ​ គឺ​ធ្វើ​ឡើង​នៅ​លើ​វាល​ស្រែ ដែល​ទទួល​បាន​ប្រមាណ ១ម៉ឺន​ក្បាល​ក្នុង​មួយ​ថ្ងៃ។ សារព័ត៌មាន​ដដែល បាន​ឲ្យ​ដឹង​ទៀត​ថា ជំនួញ​កណ្ដុរ​កម្ពុជា​កំពុង​ត្រូវ​ប៉ាន់​យ៉ាង​ខ្លាំង ដោយសារ​កំណើន​ទីផ្សារ​ក្រៅ​ស្រុក​ដែល​ត្រូវ​ការ​សាច់​កណ្ដុរ​ធម្មជាតិ​ សុទ្ធសាធ​ពី​កម្ពុជា​នោះ។ បន្ទាប់​ពី​ប្រមូល​ផល​ស្រូវ​រួច អ្នក​ស្រុក​ស្រែ​ចម្ការ​មួយ​ចំនួន​បាន​ចាត់​ទុក​ការ​ចាប់​កណ្ដុរ​លក់ ជា​ជំនួញ​ទី ២ របស់​ខ្លួន។ បុរស​វ័យ ៣៧ឆ្នាំ​ម្នាក់​ឈ្មោះ ឈឿន ឈឹម បាន​ប្រាប់ BBC ថា ក្នុង​មួយ​យប់​លោក​អាច​ចាប់​កណ្ដុរ​បាន​ដល់​ទៅ ២៥ គីឡូក្រាម។

តាមពិត ប្រជាជន​កម្ពុជា​ផ្ដើម​ចាប់​កណ្ដុរ​លក់ ដោយ​សារ​គិត​ថា​វា​ជា​សត្វ​ចង្រៃ និង​បំផ្លាញ​ដំណាំ​ស្រូវ​របស់​ពួក​គាត់។ ប៉ុន្តែ​សត្វ​ចង្រៃ​ដែល​ប្រជាជន​ខ្មែរ​នាំ​គ្នា​ចាប់​លក់​នោះ បែរ​ជា​ត្រូវ​ប៉ាន់​ទីផ្សារ​ក្រៅ​ស្រុក ដោយសារ​គេ​គិត​ថា​កណ្ដុរ​ពី​កម្ពុជា​ស៊ី​ស្រូវ​ជា​អាហារ​មាន​លក្ខណៈ​ ធម្មជាតិ​ពិតៗ មិន​ប៉ះ​ពាល់​សុខភាព។ យូរៗ​ទៅ ការ​ចាប់​កណ្ដុរ​លក់​ក៏​មាន​ការ​រីក​ដុះ​ដាល និង​ក្លាយ​ជា​ជំនួញ​ដ៏​ធំ​មួយ​របស់​ប្រជាជន​ដាច់​ស្រយាល រហូត​ពេល​នេះ​ល្បី​ដល់​បរទេស​ទៀត៕

ដោយ៖ គង់ វិសាល
រូបភាព៖ bbc