មូលហេតុ​ពិត​ប្រាកដ​នៃ​ការ​ធ្លាក់​យន្តហោះ​ ម៉ាឡេស៊ី MH17 នៅ​​តែ​មិន​ទាន់​រក​ឃើញ​នៅ​ឡើយ ប៉ុន្តែ​​​​ជំហាន​ដំបូង​គេ​បាន​ដាក់​ការ​សង្ស័យ​​ទៅ​លើ​កង​ឧទ្ទាម​​​ផ្ដាច់​ ខ្លួន​ដែល​មាន​ទំនោរ​ទៅ​រក​រុស្ស៊ី។

អ្វី ​ដែល​ធ្វើ​ឲ្យ​គេ​កាន់​តែ​សង្ស័យ​ជាង​នេះ​ទៅ​ទៀត​ គឺ​​​ការ​បង្ហោះ​ពាក្យ​សម្ដី​ព្រមាន​មួយ​ចំនួន​​​នៃ​មេ​ដឹក​នាំ​ក្រុម​ ឧទ្ទាម​ផ្ដាច់​ខ្លួន​មួយ​នេះនៅ​មុន​ពេល​យន្តហោះ​នោះ​ត្រូវ​បាញ់​ទម្លាក់ ។

នៅ ​លើ​គណនី​បណ្ដាញ​សង្គម VK.com របស់​រុស្ស៊ី លោក Igor Strelkov ដែល​ជា​រដ្ឋ​មន្រ្ដី​ការពារ​ជាតិ​នៃ​ក្រុម​ឧទ្ទាម​មួយ​នេះ បាន​សរសេរ​ថា៖ “យើង​បាន​ព្រមាន​អ្នក​រួច​ហើយ​ថា​កុំ​​ហោះ​កាត់​តំបន់​របស់​យើង”។

ការ​និយាយ​បែប​នេះ គឺ​ក្រោយ​ពី​ក្រុម​របស់​ខ្លួន​បាន​បាញ់​ទម្លាក់​យន្តហោះ​យោធា​​របស់​អ៊ុយក្រែន​នា​ពេល​កន្លងមក។

យ៉ាង ​ណា​ក្ដី លោក Strelkov បាន​លុប​ចោល​ការ​បង្ហោះ​សារ​ព្រមាន​នោះ​ភ្លាមៗ ក្រោយ​ពេល​ដឹង​ដំណឹង​ថា​យន្តហោះ​ដឹក​អ្នក​ដំណើរ​របស់​ម៉ាឡេស៊ី ត្រូវ​បាញ់​ធ្លាក់​ក្នុង​តំបន់​របស់​ខ្លួន។

លោក Igor Strelkov រដ្ឋ​មន្រ្ដី​ការពារ​ជាតិ​របស់​ក្រុម​ឧទ្ទាម

នៅ ​ពេល​ដែល​អ្នក​សារព័ត៌មាន​របស់​គេហទំព័រ Mashable ទូរសព្ទ​​សាកសួរ​បញ្ហា​នេះ ​​លោក Alexander Borodai មេ​ដឹក​នាំ​ក្រុម​ឧទ្ទាម​​​​​បាន​បដិសេធ​ថា​ក្រុម​លោក​មិន​ទាក់​ទង​នឹង​ការ​ បាញ់​ទម្លាក់​យន្តហោះ​នេះ​ទេ។ លោក​បាន​និយាយ​ដោយ​ខ្លី​​ មុន​បិទ​ទូរសព្ទ​​ថា៖ “ស្ដាប់​ខ្ញុំ! យើង​មិន​មាន​អាវុធ​ដើម្បី​បាញ់​ទម្លាក់​ប៊ូអ៊ីង 777 នោះ​ទេ”។

គួរ ​បញ្ជាក់​ផង​ដែរ​ថា ក្រុម​ឧទ្ទាម​ដែល​មាន​ទំនោរ​ទៅ​រក​រុស្ស៊ីមួយ​នេះ បាន​​ប៉ះ​ទង្គិច​ជាមួយ​កង​កម្លាំង​អ៊ុយក្រែន​ជា​ច្រើន​ខែ​មក​ហើយ ព្រម​ទាំង​បាន​បាញ់​ទម្លាក់​យន្តហោះ​យោធា​របស់​អ៊ុយក្រែន​អស់​ជា​ច្រើន​ គ្រឿង​មក​ហើយ​ដែរ។ ប៉ុន្តែ​ក្រុម​ដដែល​នេះ បាន​បដិសេធ​ថា​ខ្លួន​មិន​ជាប់​ទាក់ទង​​រឿង​ធ្លាក់​យន្តហោះ​ MH17 របស់​ម៉ាឡេស៊ី​នោះ​ទេ ដោយ​លើក​ហេតុ​ផល​ថា​​មិន​មាន​អាវុធ​អាច​បាញ់​បាន។

កាល ​ពី​ថ្ងៃ​ពុធ​កន្លង​ទៅ រដ្ឋាភិបាល​អ៊ុយក្រែន​បាន​អះអាង​ថា​យោធា​រុស្ស៊ី​បាន​បាញ់​ទម្លាក់យន្តហោះ​ ចម្បាំង។ ២ថ្ងៃ​មុន​នោះ​ទេ​ មន្រ្ដី​អ៊ុយក្រែន​ក៏​បាន​បញ្ជាក់​ថា​យន្តហោះ​​យោធា​ដឹក​ស្បៀង​របស់​ខ្លួន​ ត្រូវ​បាន​បាញ់​ធ្លាក់​ដោយ​គ្រាប់​រ៉ុកកែត​ដែល​បាញ់​ចេញ​ពី​​ដី​រុស្ស៊ី៕

កង​ឧទ្ទាម​ផ្ដាច់​ខ្លួន​