បាត់ដំបងៈ ស្រ្តីម្នាក់បានស្លាប់ភ្លាមៗ ដោយសាររថយន្តបុកពីក្រោយ ខណៈស្រ្តីរងគ្រោះ បានជិះម៉ូតូបត់ ឆ្វេងដៃ ចូលមន្ទីរពេទ្យស្រុកថ្មគោល កាលពីវេលាម៉ោង ៨ព្រឹក ថ្ងៃទី១៧ ខែកក្កដា ឆ្នាំ២០១៤ នៅ ចំណុចមុខមន្ទីរពេទ្យស្រុក ស្ថិតក្នុងភូមិកសិកម្ម ឃុំតាពូង ស្រុកថ្មគោល ចំណែកភាគីបើកបរ រថយន្ត បានរត់គេចខ្លួនបាត់ ។

ប្រភពពីកន្លែងកើតហេតុបានឲ្យដឹងថា កាលពីវេលាម៉ោង ៨ព្រឹក ថ្ងៃទី១៧ ខែកក្កដា ឆ្នាំ២០១៤ នៅ ចំណុចមុខមន្ទីរពេទ្យ ប្រតិបត្តិស្រុក ស្ថិតក្នុងភូមិកសិកម្ម ឃុំតាពូង ស្រុកថ្មគោល មានករណីគ្រោះថ្នាក់ ចរាចរណ៍រវាងរថយន្តធុនដឹកទំនិញទម្ងន់ ៥ តោន១គ្រឿង ពាក់ស្លាកលេខបាត់ដំបង 3A-0094 បើកបរ ពីទិសបន្ទាយមានជ័យ មកបាត់ដំបង បើកស្របទិសគ្នាជាមួយម៉ូតូម៉ាក វីវ៉ាពណ៌ក្រហម ១គ្រឿង ពាក់ ស្លាកលេខ បាត់ដំបង1E-1671 ជិះម្នាក់ឯង លុះមកដល់កន្លែងកើតហេតុ ម៉ូតូស្រ្តីរងគ្រោះ បានបត់ឆ្វេង បម្រុងចូលមន្ទីរពេទ្យ ដើម្បីបើកថ្នាំឲ្យប្តីនៅផ្ទះដោយមិនបានមើលក្រោយ ស្រាប់តែរថយន្តបង្ក មកពី ក្រោយបានបុកមួយទំហឹង បណ្តាលឲ្យជនរងគ្រោះ បែកក្បាលចេញខួរស្លាប់ភ្លាមៗនៅកន្លែងកើត ហេតុ ។

បើតាមសមត្ថកិច្ចបានឲ្យដឹងថា ជនរងគ្រោះឈ្មោះ ស សារឹម ភេទស្រី អាយុជាង ៤០ឆ្នាំ ដែលមានប្តី ឈ្មោះ ម៉ម វុទ្ធី ហៅ ណុប អាយុ ៤៦ឆ្នាំ មានទីលំនៅភូមិ-ឃុំជ្រោយស្តៅ ស្រុកថ្មគោល ។ ចំណែក រថយន្តអ្នកបើកបរមិនស្គាល់អត្តសញ្ញាណ ក្រោយពេលកើតហេតុ ឃើញមានមនុស្សស្លាប់បានរត់គេច ខ្លួនបាត់ ទុករថយន្តចោល ត្រូវសមត្ថកិច្ចអូសយកមករក្សាទុក នៅអធិការដ្ឋាន ស្រុករង់ចាំធ្វើការដោះ ស្រាយតាមច្បាប់នៅពេលក្រោយ ។ ចំពោះសពជនរងគ្រោះ សមត្ថកិច្ចបានជួយដឹកយកទៅផ្ទះ ប្រគល់ ឲ្យក្រុមគ្រួសារ ដើម្បីធ្វើបុណ្យតាមប្រពៃណី ៕