គ្មានការងារធ្វើដើរផឹក ស៊ីរាល់ថ្ងៃតូចចិត្តឪពុក ម្តាយស្តីបន្ទោស ចងកសម្លាប់ខ្លួនលើចុងអំពិល
ខេត្តបន្ទាយមានជ័យ
៖ បុរសម្នាក់បាត់ខ្លួនរយៈពេល ៣ថ្ងៃ ត្រូវបានសាច់ញាតិ
ប្រទះឃើញចងកសម្លាប់ខ្លួន នៅលើចុងអំពិល មានកំពស់ជាង
៥ម៉ែត្រ នៅខាងក្រោយផ្ទះ បង្កឲ្យមានការភ្ញាក់ផ្អើល
កាលពីវេលាម៉ោង១១ ថ្ងៃទី២៤ ខែកក្កដាឆ្នាំ២០១៤ ស្ថិតនៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ជនរងគ្រោះមានឈ្មោះ ឡាក់ កុយ ភេទប្រុស អាយុ ៣៤ឆ្នាំ នៅលីវ រស់នៅភូមិខាងលើ ដែលឱពុកឈ្មោះ ឡាក់ សម័យ។ ប្អូនស្រីជនរងគ្រោះ បានឲ្យដឹងថា បងប្រុសបានបាត់ពីផ្ទះ រយៈពេល ៣ថ្ងៃមកហើយ មិនដឹងទៅណា ហើយនៅពេលគាត់ ទៅរកបេះបន្លែតាមរបងក្រោយផ្ទះ ក៏ក្រឡេកមើលទៅលើដើមអំពិល ស្រាប់តែឃើញបងប្រុសចងក សម្លាប់ខ្លួនហើយបានប្រាប់អ្នកជិតខាង និងប្តឹងសមត្ថកិច្ច ឲ្យចុះទៅពិនិត្យ។
ប្រភពខាងលើ បានបញ្ជាក់ថា ជនរងគ្រោះនៅលីវ ហើយមិនមានការងារធ្វើ ដើរផឹកស៊ីរាល់ថ្ងៃ ត្រូវបានឪពុកម្តាយស្តីបន្ទោសជារឿយៗ តែជនរងគ្រោះ មិនដែលនិយាយតបតអ្វីឡើយ ហើយ តែងតែនិយាយថា ខ្លួនធ្វើអ្វីមិនដែលបានសម្រេច តូចចិត្តខ្លួនឯងយ៉ាងខ្លាំង។ មុនពេលកើតហេតុ ពេលដែលឪពុកមិននៅផ្ទះ ជនរងគ្រោះបាត់ខ្លួន រយៈពេល ៣ថ្ងៃ មិនដឹងទៅណា ហើយសាច់ញាតិ បានតាមរកគ្រប់ទីកន្លែង ទើបប្រទះឃើញចងក នៅលើដើមអំពិល ស្លាប់បាត់ទៅហើយ៕
____________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
