សាលារាជធានីព្រមាន ចាប់អ្នកធ្វើបាតុកម្ម ប្រឆាំងវៀតណាម ដាក់ពន្ធនាគារ១៥ឆ្នាំ
សាលារាជធានីភ្នំពេញ
ព្រមានចាប់ក្រុមនិស្សិតដែលគ្រោងធ្វើបាតុកម្មនៅមុខស្ថានទូតវៀតណាម
ដាក់ពន្ធនាគាររយៈពេល១៥ឆ្នាំ
ជុំវិញករណីដែលពួកគេទាមទារឲ្យអ្នកនាំពាក្យស្ថានទូតនេះ
សុំទោសនូវអ្វីដែលពួកគេចោទថាជាការបំភ្លៃប្រវត្តិសាស្ត្រ។
តាមការចុះផ្សាយរបស់គេហទំព័រឌឺខេមបូឌា
ដេលី (The Cambodia Daily) នៅថ្ងៃសៅរ៍ទី១៩ ខែកក្កដានេះ
បានស្រង់ប្រសាសន៍អភិបាលរងរាជធានីភ្នំពេញ លោក ឃួង ស្រេង ថា
លោកបានចេញបញ្ជាហាមឃាត់ការជួបជុំរបស់សហព័ន្ធនិស្សិតបញ្ញវន្តកម្ពុជា
នៅថ្ងៃទី ២១ ខែកក្កដានោះហើយ។
ឌឺខេមបូឌាដេលីបានស្រង់សម្ដីលោក ឃួង
ស្រេង បន្តថា បើពួកគេមិនស្ដាប់បញ្ជា
ហើយធ្វើឲ្យប៉ះពាល់ដល់សណ្ដាប់ធ្នាប់សាធារណៈ
នោះនឹងត្រូវប្ដឹងឡើងតុលាការ។ លោកបន្តថា
បើការធ្វើបាតុកម្មនោះនាំឲ្យមានអំពើហិង្សា
នោះពួកគេនឹងត្រូវផ្តន្ទាទោសឲ្យជាប់ពន្ធនាគារពី១០ ទៅ១៥ឆ្នាំ។
នៅរសៀលថ្ងៃសៅរ៍នេះ
VODមិនអាចទាក់ទងប្រធានសហព័ន្ធនិស្សិតបញ្ញវន្តកម្ពុជា លោក ម៉ៅ ពិសេស
ដើម្បីសុំការបញ្ជាក់ពីគោលជំហររបស់លោកបានទេ
ប៉ុន្តែកាលពីថ្ងៃសុក្រទី១៨ ខែកក្កដា
ក្នុងសន្និសីទសារព័ត៌មានស្តីពីការបង្ហាញគោលជំហរក្នុងការដង្ហែញត្តិ
នាពេល ខាងមុខនេះ លោកថ្លែងថា លោកនៅតែបន្តធ្វើដដែល
ទោះបីជាមានការព្រមានពីសំណាក់សាលារាជធានីក៏ដោយ។
ប្រធានផ្នែកបច្ចេកទេស
ស៊ើបអង្កេតនៃអង្គការលីកាដូ លោក អំ សំអាត
យល់ថាការព្រមានរបស់សាលារាជធានីភ្នំពេញ
មិនស្របតាមច្បាប់ស្តីពីការធ្វើបាតុកម្មនោះទេ។
កាលពីថ្ងៃទី៨ ខែកក្កដា ប្រជាពលរដ្ឋខ្មែរ
ព្រះសង្ឃ និងខ្មែរកម្ពុជាក្រោមប្រមាណ១០០អង្គ/នាក់
បានធ្វើបាតុកម្មអហិង្សានៅមុខស្ថានទូតវៀតណាម
ទាមទារឲ្យអ្នកនាំពាក្យស្ថានទូតនេះសុំទោស ចំពោះការដែលនិយាយថា
ទឹកដីខ្មែរ កម្ពុជាក្រោមជារបស់វៀតណាម តាំងពីយូរយារណាស់មកហើយ
មិនមែនទើបតែបារាំងកាត់ឲ្យនៅឆ្នាំ១៩៤៩នោះទេ។ ក្នុងបាតុកម្មនោះ
មានការប៉ះទង្គិចគ្នាបណ្ដាលឲ្យមនុស្សប្រមាណដប់នាក់រងរបួស៕
ប្រភពពី vodhotnews.com
