អាហារដ៏ពេញនិយម៤មុខ ដែលយុវវ័យចំណាំនាំសង្សារទៅញ៉ាំ អស់មិនដល់៥ដុល្លារផង!
មិត្តយុវវ័យប្រហែលជាកំពុងតែនឹករកកន្លែងសម្រាប់ការណាត់ជួបញ៉ាំអាហារជុំគ្នាជាមួយនឹងសង្សារ ឬមិត្តភ័ក្តិហើយមើលទៅ។ ថ្ងៃនេះ Sabay នឹងណែនាំអាហារ៤មុខ ដែលកំពុងតែពេញនិយម ស័ក្ដិសមចំពោះយុវវ័យដែលចង់ទៅញ៉ាំនាចុងសប្ដាហ៍នេះ ចំណែកឯតម្លៃវិញ ធានាថាម៉ាអេម។ បើទៅត្រឹមគ្នាពីរបីនាក់ធានាថា ប្រិយមិត្តនឹងចំណាយមិនលើសពី២០,០០០រៀលទេ។ តោះអ៊ុតជាមួយ Sabay បន្តិចមើល៍! អាហារ និងទីតាំងទាំង៤ប្រភេទនោះ មាននៅកន្លែងណាខ្លះ?
១. ប្រហិតចៀននៅក្រោយសាលាស៊ីសុវត្ថិ
ប្រហិតជាច្រើនមុខដាក់តម្រៀបពេញក្នុងទូររង់ចាំភ្ញៀវចូលមក ចាប់ដាក់ចាន ទៅតាមចំណង់ចំណូលចិត្តភ្ញៀវដែលចូលទៅញ៉ាំ។ រសជាតិប្រហិតគ្រប់មុខទាំងអស់សុទ្ធតែមានឱជារសគួរឲ្យចង់ភ្លក់។ ចំពោះតម្លៃវិញក៏មិនថ្លៃប៉ុន្មានដែរ ប្រសិនបើមកត្រឹមគ្នាពីរបីនាក់ អាចកុម្មង់ប្រហិតគ្រប់មុខបាន ដោយចំណាយអស់ប្រហែលជាជាង១ម៉ឺនរៀលតែប៉ុណ្ណោះ អាចញ៉ាំបានឆ្អែតល្មម។
២. នំបញ្ចុកឡើងស៊េរីក្បែរផ្សារអូឡាំពិក
បើជិះតាមបណ្ដោយផ្លូវ១៩៣ ខាងលិចផ្សារអូឡាំពិក អ្នកនឹងប្រទះឃើញមានហាងមួយដ៏ទាក់ទាញ និងមានស្លាកយីហោពណ៌បៃតងដែលសរសេរថា “នំបញ្ចុកកោះកុង” មានលក់នំបញ្ចុកជាច្រើនប្រភេទ ដូចជានំបញ្ចុកសម្លការី សម្លប្រហើរ ណាំយ៉ា និងមានច្រើនមុខទៀត សរុបប្រហែល៧ ទៅ៨មុខឯណោះ។ ចុម! នំបញ្ចុកលក់សុទ្ធតែនៅក្នុងហាងអញ្ចឹងតម្លៃថ្លៃទេដឹង? មានណា៎! មួយចានថ្លៃមិនលើសពី៨ពាន់ផងហ្នឹង។ អូភ្លេចប្រាប់! នៅហ្នឹងមាន free wifi ទៀតផង។
៣. កង្កែបបំពងនៅក្រោយវាំង
បែរមកមើលម្ហូបបែបយុវវ័យមួយទៀតដែលមានទីតាំងនៅម្ដុំក្រោយវាំងក៏មិនអន់ដែរ ឲ្យតែល្ងាចៗឡើងអតិថិជន ជាពិសេសយុវវ័យតែងតែទៅញ៉ាំអាហារនៅទីនោះមិនសូវដាច់ទេ។ ក្រៅពីកង្កែបបំពងក៏នៅមានអាហារផ្សេងៗជាច្រើនមុខទៀត ដូចជា ពងទាកូន ងាវស្រុះ ពងមាន់អាំងដែលមានរសជាតិឈ្ងុយឆ្ងាញ់ទៀតផង។
៤. ស៊ុបក្ដាមយុវវ័យ
នេះនែ! អាហារបែបយុវវ័យមួយប្រភេទទៀត ដែលមានតម្លៃថោកសឹងរកមិនបាន នោះគឺស៊ុបក្ដាមមួយចាន១០០០រៀល។ ចុះបើតម្លៃថោកអីចឹង បើចង់ទៅញ៉ាំ រកនៅកន្លែងណាមាន?
បើប្រិយមិត្តចាប់អារម្មណ៍ចង់ភ្លក់រសជាតិស៊ុបក្ដាមនេះ អាចស្វែងរកបាន ដែលមានទីតាំងនៅម្ដុំសាលាចិន ទួនហ្វា សង្កាត់ទួលស្វាយព្រៃ១ ខណ្ឌចំការមន។
យ៉ាងម៉េចហើយប្រិយមិត្ត ឃើញអាហារ៤មុខនេះរួច មានចាប់អារម្មណ៍មួយណាដែរអត់?
អត្ថបទ៖ យិន សំបូរ
