អាជ្ញាធរ៖ ប៉ូលិសរៀបចំបញ្ជូន តំណាងរាស្ត្រជាប់ឆ្នោត ៤ នាក់ទៅតុលាការ នៅរសៀលនេះពាក់ព័ន្ធបាតុកម្មហិង្សា
ភ្នំពេញ: ប៉ូលិស
រៀបចំបញ្ជូនតំណាងរាស្ត្រជាប់ឆ្នោត ៤ នាក់ពីស្នងការដ្ឋាននគរបាល
រាជធានីភ្នំពេញ ទៅតុលាការសាលាដំបូង រាជធានីភ្នំពេញ
នៅរសៀលថ្ងៃទី១៥កក្កដានេះ។ តំណាងរាស្ត្រជាប់ឆ្នោតទាំង ៤ រូប
របស់គណបក្សសង្គ្រោះជាតិ
ជាប់ពាក់ព័ន្ធនឹងការដឹកនាំធ្វើបាតុកម្មហិង្សា នៅទីលានប្រជាធិបតេយ្យ
កាលពីព្រឹកថ្ងៃទី១៥កក្កដា។ នេះបើតាមលោក ឃួង ស្រេង អភិបាលរង
រាជធានីភ្នំពេញ។តំណាងរាស្ត្រទាំង ៤ រូបនោះ រួមមាន៖ លោកស្រី មូរ សុខហួរ លោក កែវ ភិរម្យ និងលោក ម៉ែន សុថាវរិន្ទ្រ ត្រូវបានចាប់ខ្លួនភ្លាមៗ នៅស្ពាននាគ ក្បែរទីលានប្រជាធិបតេយ្យ។ រីឯលោក ហូរ វ៉ាន់ ត្រូវបានចាប់ខ្លួន នៅមុខស្នងការដ្ឋាននគរបាលរាជធានីភ្នំពេញ នារសៀលម៉ោងជាង ១ ថ្ងៃទី១៥កក្កដានេះ នៅពេលក្រុមអ្នកគាំទ្រគណបក្សសង្គ្រោះជាតិ ប្រមូលផ្តុំ ទាមទារឲ្យដោះលែងតំណាងរាស្ត្រជាប់ឆ្នោតទាំង ៣ រូប នៅមុខស្នងការប៉ូលិស។
លោក ឃួង ស្រេង បានបញ្ជាក់ថា តំណាងរាស្ត្រជាប់ឆ្នោតទាំង ៤ រូប ដែលឃាត់ខ្លួននោះ គឺជាមេដឹកនាំបាតុកម្មខុសច្បាប់ ហើយបង្កហិង្សាលើសមត្ថកិច្ច។ ប៉ូលិសបានផ្តល់បាយទឹកគ្រប់គ្រាន់ដល់តំណាងរាស្ត្រជាប់ឆ្នោតទាំងនោះ ផងដែរ។
លោកអភិបាលរង ឃួង ស្រេង បានបន្តថា ក្នុងការប៉ះទង្គិចដោយហិង្សា ក្នុងបាតុកម្មរបស់គណបក្សសង្គ្រោះជាតិ កាលពីព្រឹកថ្ងៃទី១៥កក្កដានេះ បណ្តាលឲ្យកងកម្លាំងសន្តិសុខខណ្ឌដូនពេញ ៣៧ នាក់ រងរបួស ក្នុងនោះ ២២ នាក់ របួសធ្ងន់ និង ២ នាក់ ត្រូវសង្គ្រោះបន្ទាន់ នៅមន្ទីរពេទ្យកាល់ម៉ែត្រ។
ចំណែកបាតុករវិញ ត្រូវបានអង្គការសិទ្ធិមនុស្ស អាដហុក ប្រកាសថា មានចំនួនជាង ១០ នាក់ បានរងរបួស៕
