នៅជាមួយសង្សាររក ស៊ីគ្រឿងញៀនបាន ៣ថ្ងៃ លួចរត់ទៅរកម្តាយវិញ ទាំងព្រលឹងចុងសក់
រាជធានីភ្នំពេញ ៖ ជារឿងមួយគួរឲ្យហួសចិត្ត
នៅពេលដែលស្ត្រីម្នាក់ រត់តាមបុរសជាសង្សារ
បន្ទាប់ពីឃើញគ្នាភ្លាម ស្រឡាញ់ភ្លែត ប៉ុន្តែនៅពេលដឹងថា
បុរសដែលនាងស្រឡាញ់ ជាអ្នកលក់ថ្នាំញៀន
នាងក៏លួចរត់ត្រឡប់ទៅផ្ទះវិញ កាលពី
វេលាម៉ោង ០០និង៥០ នាទី រំលងអធ្រាត្រឈានចូលថ្ងៃទី២៩ ខែមិថុនា
ឆ្នាំ២០១៤ ទៅសុំឲ្យប៉ូលិសជួយអន្តរាគមន៍ នៅខាងក្រោយស្ថានីយ
ប្រេងឥន្ធនៈតេលា ផ្លូវលេខ២៧៣ ក្រុម៣ ភូមិទួលគោក សង្កាត់ ទួលសង្កែ
ខណ្ឌឬស្សីកែវ។នារីដែលជួបរឿងស៊យនេះ មានឈ្មោះ នីដា អាយុ ១៨ឆ្នាំ ស្នាក់នៅផ្ទះជួល ខាងក្រោយព្រលានយន្តហោះ អន្តរជាតិភ្នំពេញ ក្នុងសង្កាត់ចោមចៅ ខណ្ឌពោធិ៍សែនជ័យ បានឲ្យដឹងថា រយៈពេល ៣ថ្ងៃ កន្លងមកហើយ ដែលនាងបានលួចរត់ចេញពីផ្ទះ មកតាមសង្សារមានឈ្មោះ សាត អាយុជាង ២០ឆ្នាំ ដោយពួកគេស្គាល់គ្នា តាមរយៈម្តាយរបស់ឈ្មោះ សាត ជួលផ្ទះនៅជិតគ្នា ប៉ុន្តែឈ្មោះ សាត មិនបានស្នាក់នៅជាមួយម្តាយទេ គ្រាន់តែឧស្សាហ៍ ទៅលេងផ្ទះម្តាយ ក៏បាក់ចិត្តស្រឡាញ់គ្នាទៅវិញទៅមក។
ក្រោយមកបុរសជាសង្សារ បានលួងលោមនាង ឲ្យទៅរស់នៅជាមួយគេ ជួយលក់ដូរនៅខាងក្រោយ ប៉ុស្តិ៍នគរបាលទួលសង្កែ ទើបនាងបានលួចរត់ចេញពីផ្ទះ ទៅរស់នៅជាមួយសង្សារ រយៈពេល ៣ថ្ងៃ កន្លងមកហើយ។ នៅទីនោះបុរសជាសង្សារ បានឃាត់នាងទុកក្នុងផ្ទះ មិនឲ្យនាងចេញទៅណាទេ និងបានឃើញសង្សារ ជួញដូរនិងប្រើប្រាស់គ្រឿងញៀន នាងមានបំណងរត់គេច ប៉ុន្តែគ្មានឪកាស។ ទើបនាងចេះតែសម្ងំ រស់នៅរហូតដល់ម៉ោង ៩យប់ថ្ងៃទី២៨ ខែមិថុនា ស្រាប់តែមានអ្នកទិញថ្នាំញៀន ចំនួន ៥ដុល្លារ ហើយនាងបានឈ្លោះ ប្រកែកជាមួយសង្សារ ទើបលួចរត់គេចក្នុងបំណង ត្រលប់ទៅផ្ទះវិញ។
យ៉ាងណាក៏ដោយបុរសជាសង្សារ បានដេញតាមរកនាង ទើបនាងរត់ទៅដល់ ក្រោមស្ពានជ្រោយចង្វា បានជិះម៉ូតូឌុបមួយគ្រឿង ចូលទៅក្នុងស្ថានីយប្រេងឥន្ធនៈ តេលា ក៏ត្រូវប្រជាការពារ និងសមត្ថកិច្ច នាំនាងទៅសាកសួរ នៅប៉ុស្តិ៍ទួលសង្កែ ចំណែកជនសង្ស័យ ដែលប្រើប្រាស់ និងជួញដូរគ្រឿងញៀន ពេលឃើញសមត្ថកិច្ច បានគេចខ្លួនបាត់អស់ ។ នារីរងគ្រោះបានឲ្យដឹងថា យុវជនជាសង្សារ បានគំរាមថា បើសិនជាហ៊ាន រត់ចេញពីផ្ទះ គេជួបកន្លែងណាសម្លាប់ចោលកន្លែងនោះ ហើយសមត្ថកិច្ចបានទំនាក់ទំនង ឲ្យក្រុមគ្រួសារមកទទួលនាង យកទៅផ្ទះវិញ តែមិនដឹងថា តទៅទៀត នឹងមានរឿងអ្វីកើតឡើងនោះទេ៕
ប្រភពពី វត្តភ្នំ
