លែងលះគ្នាបាន ៣ថ្ងៃ ស្តាយម្ហូបចាស់សុំត្រូវគ្នាវិញនាងមិនព្រម កាប់ដាច់ថ្ពាល់និងម្រាមដៃ
ខេត្តឧត្តរមានជ័យ ៖ ស្ត្រីម្នាក់បានរងរបួសធ្ងន់ ត្រូវបញ្ជូនមកមន្ទីរពេទ្យ បន្ទាប់ពីអតីតប្ដីរបស់ខ្លួន ដែលលែងលះគ្នាបាន ៣ថ្ងៃ បានលបកាប់ចំនួន ៣កាំបិត បណ្តាលឲ្យដាច់ម្រាមដៃទាំងពីរ និងដាច់ស្លឹកត្រចៀក កាលពីវេលាម៉ោង ៥ព្រឹកថ្ងៃទី៧ ខែឧសភា ឆ្នាំ២០១៤ នៅក្នុងភូមិត្រពាំងបី ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។
ខេត្តឧត្តរមានជ័យ ៖ ស្ត្រីម្នាក់បានរងរបួសធ្ងន់ ត្រូវបញ្ជូនមកមន្ទីរពេទ្យ បន្ទាប់ពីអតីតប្ដីរបស់ខ្លួន ដែលលែងលះគ្នាបាន ៣ថ្ងៃ បានលបកាប់ចំនួន ៣កាំបិត បណ្តាលឲ្យដាច់ម្រាមដៃទាំងពីរ និងដាច់ស្លឹកត្រចៀក កាលពីវេលាម៉ោង ៥ព្រឹកថ្ងៃទី៧ ខែឧសភា ឆ្នាំ២០១៤ នៅក្នុងភូមិត្រពាំងបី ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។
ស្ត្រីរងគ្រោះមានឈ្មោះ កាំ ពិនណារី អាយុ ៣២ឆ្នាំ បច្ចុប្បន្នរស់នៅ ក្នុងភូមិឃុំកើតហេតុខាងលើ បានឲ្យដឹងថា គាត់បានរួមរស់ជាមួយប្តី ឈ្មោះ កាង វាសនា អាយុ ៣៧ឆ្នាំ រហូតមានកូនចំនួន ៣នាក់ ហើយកូនបងបានរៀបការ មានទាំងកូនទៀត។ ស្ត្រីរងគ្រោះបន្តថា នៅក្នុងទីតាំងភូមិរបស់គាត់ ជាប់ភ្នំដងរែក ព្រំដែនថៃ ដែលប្តីរបស់គាត់ តែងតែឡើងភ្នំអូសឈើគ្រញូង មិនតែប៉ុណ្ណោះថែមទាំងបែកឆ្វេង ប្រើប្រាស់ថ្នាំញៀនទៀតផង។
ចាប់តាំងពីប្តីគាត់ មានសារធាតុញៀនចូលខ្លួន តែងតែនិយាយពាក្យសំដី ជាមួយប្រពន្ធកូន មិនដែលល្អម្តងណាទេ រហូតមានអំពើហិង្សា ទើបគាត់ប្រាប់ទៅឪពុកម្ដាយ ទាំងសងខាង ដើម្បីសុំលែងលះគ្នា តែពេលនោះប្តីរបស់គាត់ សុំអធ្យាស្រ័យនិងប្ដេជ្ញា ឈប់ជក់ថ្នាំញៀនទៀត ទើបគាត់យល់ព្រម នៅរួមរស់គ្នាប្តីប្រពន្ធវិញ។ ប៉ុន្តែមិនទាន់បាន ១ខែផង ប្តីរបស់គាត់នៅតែជក់ថ្នាំញៀន ហើយខ្លាំងជាងមុនទៀត ធ្វើឲ្យគាត់ទ្រាំមិនបាន ក៏សម្រេចចិត្តលែងលះគ្នានៅថ្ងៃទី៤ ខែឧសភា ឆ្នាំ២០១៤។
ក្រោយពីលែងលះគ្នា បានរយៈពេល ៣ថ្ងៃ នៅក្នុងថ្ងៃកើតហេតុ ប្តីរបស់គាត់បានមករស់នៅជាមួយវិញ តែគាត់ឆ្លើយថា មិនព្រមយក ហើយប្ដីរបស់គាត់ បានទាញកាំបិតផ្គាក់ កាប់ទៅលើរូបគាត់ចំនួន ៣កាំបិត បណ្តាលឲ្យដាច់ស្លឹកត្រចៀក រយះថ្ពាល់ខាងឆ្វេង និងម្រាមដៃទាំងពីរដាច់ម្រាម ដោយសារតែគាត់លើកដៃរង នឹងផ្លែកាំបិត។ ពេលនោះបានអ្នកជិតខាង បានរត់មកជួយទាន់ ហើយប្តីរបស់គាត់ បានរត់គេចខ្លួនបាត់តែម្តង ហើយសមត្ថកិច្ចបានត្រឹមតែ ទៅធ្វើកំណត់ហេតុប៉ុណ្ណោះ៕
