ប្រធានាធិបតីចិន សន្យាគាំទ្រកម្ពុជា លើផ្នែកសន្តិសុខជាតិ និងស្ថិរភាព
ភ្នំពេញ:
ប្រធានាធិបតីចិន បានថ្លែងប្រាប់សម្តេចនាយករដ្ឋមន្ត្រីហ៊ុនសែន
នៅក្នុងជំនួបនៅទីក្រុងសៀងហៃ កាលពីថ្ងៃទី១៨ ខែឧសភាថា ប្រទេសចិន
នឹងគាំទ្រដល់កម្ពុជានៅក្នុងផ្នែកការពារសន្តិសុខ និងស្ថិរភាព។កាសែត China Daily របស់ចិន រាយការណ៍ថា ប្រធានាធិបតីចិន លោក ស៊ី ជិនពីង ក៏សន្យាផងដែរ ដើម្បីជួយដល់កម្ពុជា លើផ្នែកសង្គម និងសេដ្ឋកិច្ច។ ប្រធានាធិបតីនៃប្រទេស ដែលមានប្រជាជនច្រើនជាងគេបំផុត នៅលើពិភពលោក ក៏ជំរុញអោយមានលើកិច្ចសហប្រតិបត្តិការទ្វេភាគី ផ្នែកកសិកម្ម និងទេសចរណ៍ ព្រមទាំងផ្នែកវារីអគ្គីសនី ធ្យូងថ្ម និងតំបន់សេដ្ឋកិច្ចពិសេស នៅកម្ពុជា ជាដើម។
ចំណែកសម្តេចហ៊ុនសែនវិញ ត្រូវបានកាសែត China Daily របស់ចិន ដកស្រង់សម្តី ដែលនិយាយថា កម្ពុជាមានឆន្ទះនឹងពង្រឹងភាពជាដៃគូជាមួយប្រទេសចិន។ សម្តេច ក៏បានប្តេជ្ញា ដើម្បីសម្រួលដល់គម្រោងទ្វេភាគី ជាមួយចិន ទាក់ទងនឹងសេដ្ឋកិច្ចនិងជីវភាពប្រជាជនប្រទេសទាំងពីរ ព្រមទាំងសហប្រតិបត្តិការសន្តិសុខ និងការអនុវត្តន៍ច្បាប់។
សម្តេចក៏បានអះអាងជាថ្មីអំពីការដើរតួនាទី ប្រកបដោយស្ថាបនារបស់កម្ពុជា ចំពោះទំនាក់ទំនងរវាងអាស៊ាន និងចិន។
សម្តេចហ៊ុនសែន បានចាកចេញពីកម្ពុជា កាលពីថ្ងៃទី១៨ ខែឧសភា ដើម្បីបំពេញទស្សនកិច្ចនៅប្រទេសចិន និងចូលរួមកិច្ចប្រជុំកំពូលអាស៊ីមួយនៅសៀងហៃ។
សម្តេច គ្រោងវិលត្រឡប់មកវិញ នៅថ្ងៃទី២៥ ខែឧសភា៕
ប្រភពពី CEN
