៤ថ្ងៃក្រោយពីធ្វើរដ្ឋប្រហារទម្លាក់រដ្ឋាភិបាល ស៊ីវិលបានសម្រេច ប្រមុខកងទ័ពជើងគោកថៃ ប្រយុទ្ធ ចាន់អូចា បានប្រកាស ប្រាប់ប្រព័ន្ធ ផ្សព្វផ្សាយនៅព្រឹកថ្ងៃចន្ទនេះថា លោកបាន ទទួលនូវភ្លើងខៀវពីស្ថាប័នព្រះរាជបល្ល័ង្ក ឱ្យដឹកនាំប្រទេសថៃ ដែលកំពុងរួតរឹតដោយវិបត្តិ និងការបែកបាក់ធ្ងន់ធ្ងរខាងនយោបាយ។

បើតាមលោកប្រយុទ្ធ ព្រះមហាក្សត្រថៃ ភូមិបុល អាប់ឌុលយ៉ាដេត បានផ្ដល់នូវរាជានុញ្ញាតិដល់រូបលោក ធ្វើការដឹកនាំ ប្រទេសថៃ លៃយ៉ាងណាឱ្យមានស្ថិរភាព និងសន្តិសុខ សណ្ដាប់ធ្នាប់ឡើងវិញ ក្រោយពីបានឆ្លងកាត់រយៈកាល៨ខែ នៃ ភាពចលាចលនយោបាយ រួមមានបាតុកម្ម កុប្បកម្ម និងអំពើហិង្សានានា ពីសំណាក់ក្រុមអាវលឿង និងក្រុមអាវក្រហម។

លើសពីនេះទៅទៀត លោកប្រយុទ្ធ បានប្រកាសថា លោកនឹងព្យាយាមធ្វើកំណែទម្រង់ឆ្ពោះទៅកាន់ការបោះឆ្នោតមួយ នាពេលខាងមុខ ដែលលោកមិនបានបញ្ជាក់ថាពេលណានោះទេ។

ការប្រកាសរបស់លោកប្រយុទ្ធពីការគាំទ្រពីសំណាក់ព្រះរាជវាំងឱ្យលោកដឹកនាំប្រទេសនេះ មិនបានបញ្ជាក់ច្បាស់ថាតើ ព្រះរាជវាំងថែមទាំងធ្លាប់បញ្ជាឱ្យលោកដឹកនាំរដ្ឋប្រហារកាលពីថ្ងៃសុក្រនោះ ឬក៏យ៉ាងណានោះទេ តែកាលថ្ងៃម្សិលមិញ លោកបានប្រកាសរំលាយព្រឹទ្ធសភា ហើយលើកបន្តុបខ្លួនឯងជានាយករដ្ឋមន្ត្រីបណ្ដោះអាសន្ន ក្នុងអន្តរកាលដែលផ្ទៃ ប្រទេសថៃទាំងមូលកំពុងត្រូវដឹកនាំដោយយោធា ក្រោយរដ្ឋប្រហារលើកទី១៩ក្នុងប្រវត្តិសាស្ត្រ៕

ប្រភពពី