ភ្នំពេញ: អ្នកកត់ឆ្នោត និងអ្នកទៅចាក់ឆ្នោត ៤នាក់ ត្រូវបានកម្លាំងនគរបាល ការិយាល័យ ព្រហ្មទណ្ឌកម្រិតស្រាល រាជធានីភ្នំពេញ ចាប់ខ្លួន កាលពីវេលាម៉ោង ប្រមាណ ៣រសៀលថ្ងៃទី៣០ ខែឧសភា ឆ្នាំ២០១៤ នៅម្តុំផ្សារអូឡាំពិក ខណ្ឌចំការមន ។

មន្រ្តីនគរបាល ព្រហ្មទណ្ឌកម្រិតស្រាល បានឲ្យដឹងថា ក្រោយពីទទួលព័ត៌មាន ពីកន្លែងកត់ឆ្នោត ខាងលើនេះ ការិយាល័យ បានសុំគោលការណ៍ ពីលោកស្នងការ និងស្នងការរង ហើយដោយមានការឯកភាព ពីតំណាងអយ្យការនោះ នាយការិយាល័យ បានដឹកនាំកម្លាំងនគរបាល ចុះទៅឡោមព័ទ្ធ និងធ្វើការចាប់ខ្លួន បានមនុស្ស៤នាក់ ក្នុងនោះម្នាក់ ជាអ្នកកត់ឆ្នោត និង៣នាក់ទៀត ជាអ្នកទៅចាក់ឆ្នោត ។

មន្រ្តីនគរបាលបានបន្តទៀតថា ក្រៅពីការចាប់ខ្លួនមនុស្សទាំងនេះ កម្លាំងសមត្ថកិច្ច បានដកហូតនូវវត្ថុតាងមួយ ជាក់ស្តែងផងដែរដូចជា សន្លឹកសម្រាប់ កត់ឆ្នោត ប៊ិច និង ក្រដាសលទ្ធផលចេញឆ្នោត ជាដើម។

ក្រោយការចាប់ខ្លួន មនុស្សទាំង៤នាក់ ខាងលើនេះត្រូវបាននាំខ្លួន ទៅកាន់ការិយាល័យ ព្រហ្មទណ្ឌកម្រិតស្រាល ដើម្បីសួរនាំ និងចាត់វិធានការណ៍ បន្តទៀតតាមផ្លូវច្បាប់ ៕

________________________
ផ្តល់សិទ្ធិដោយ៖ DAP News