អ្នកឃ្វាលគោប្រទះឃើញ សពបុរសម្នាក់នៅវាលស្រែ
ខេត្តបាត់ដំបង: ពលរដ្ឋអ្នកដើរឃ្វាលគោ បានប្រទះឃើញសពបុរសម្នាក់ស្លៀកតែខោខ្លី ដេកផ្កាប់មុខនៅវាលស្រែ ដោយពុំមាននរណាស្គាល់ឡើយ។អាវុធហត្ថខេត្តបាត់ដំបងបានសន្និដ្ឋាន ថា ទំនងជា ខ្យល់គរ ព្រោះជនរងគ្រោះបានដោះអាវ ស្រាតខោ ទុកចោលនៅចម្ងាយប្រហែលជា៥០ម៉ែត្រ ក្នុងហោប៉ៅអាវមានថ្នាំលេប និងប្រាក់៣ម៉ឺនរៀល។
ហេតុការណ៍ប្រទះឃើញសពនេះ កាលពីម៉ោងជិត ៤រសៀល ថ្ងៃទី២៣ ខែមេសា នៅវាលស្រែមួយកន្លែង ស្ថិតក្នុង ភូមិខ្សាច់ពោយ សង្កាត់វត្តគរ ក្រុងបាត់ដំបង។
ពលរដ្ឋដើរឃ្វាលគោនៅភូមិខ្សាច់ពោយបានប្រាប់អាវុធហត្ថខេត្តបាត់ដំបងថា នៅ
ថ្ងៃទី២៣ មេសានោះ គាត់បានដេញគោមកចងនៅវាលស្រែតាំងពីព្រឹក ហើយឃើញបុរសម្នាក់ដែលមិនស្គាល់ឈ្មោះ នៅអង្គុយក្រោមដើមឈើជិតកន្លែងដែលស្លាប់។ នៅពេលរសៀល គាត់បានដើរមកផ្លាស់ចំណងគោ ហើយបានឃើញបុរសនោះដេកផ្កាប់មុខស្លាប់បាត់ទៅហើយ។ពេលនោះ គាត់បានរាយការណ៍ជូននសមត្ថកិច្ចបានដឹងភ្លាមៗ។
លោកឡាច ប្រុស នាយការិយាល័យស្រាវជ្រាវបទល្មើសព្រហ្មទណ្ឌអាវុធហត្ថខេត្តបាត់ដំបង បានឲ្យដឹងថា សពបុរសម្នាក់នេះមានអាយុប្រហែលជាង៤០ឆ្នាំ កម្ពស់ប្រហែលជា ១,៥៥ម៉ែត្រ សក់រួញ សម្បុរសណ្ដែកបាយ និងមានសាក់រូបសត្វខ្លាលើដើមទ្រួង។ សពគ្មានស្លាកស្នាមអ្វីពាក់ព័ន្ធករណីឃាតកម្មទេ គឺទំនងជាអត់ងងុយ ហើយខ្យល់គរដេកស្លាប់ ព្រោះបានស្រាតខោដោះអាវព្យួរចោលនៅនឹងដើមឈើចម្ងាយពីកន្លែងស្លាប់ ប្រហែលជា៥០ម៉ែត្រ ក្នុងហោប៉ៅមានប្រាក់៣ម៉ឺនរៀលនិងថ្នាំលេបទៀតផង។
លោកបានអំពាវនាវដល់សាច់ញាតិ ឬបងប្អូនណាបាត់សមាជិកគ្រួសារដូចភិនភាគនេះ សូមមកទំនាក់ទំនងសមត្ថកិច្ចនិងមេប៉ុស្ដិសង្កាត់វត្តគរ និងអាជ្ញាធរមួលដ្ឋាន៕M/c
