មាសបានធ្លាក់ថ្លៃប្រចាំ ខែលើកដំបូងក្នុងឆ្នាំនេះ
មាសបានធ្លាក់ថ្លៃប្រចាំខែលើកដំបូងក្នុងឆ្នាំនេះ ដោយសារសញ្ញានៃការស្ទុះងើបសេដ្ឋកិច្ចអាមេរិក ដោយជំរុញឲ្យធនាគារកណ្តាលអាមេរិក បន្តកាត់បន្ថយវិធានការជំរុញសេដ្ឋកិច្ច។ ប៉ាឡាញ៉ូម បានឡើងថ្លៃក្នុងរយៈពេលពីរខែជាប់គ្នា។
មាសដុំសម្រាប់ចែកចាយភ្លាមៗ ត្រូវបានជួញដូរក្នុងតម្លៃ ១២៩៧,៣០ដុល្លារក្នុងមួយអោន (៨,៣ជី) នៅម៉ោង ៨ និង៥៣នាទីព្រឹកថ្ងៃម្សិលមិញនៅប្រទេសសិង្ហបុរី នេះបើយោងតាមការកំណត់តម្លៃទូទៅរបស់ទីភ្នាក់ងារព័ត៌មាន Bloomberg។
មាសមានតម្លៃ ១២៩៥,២៣ដុល្លារនៅម៉ោងបិទការជួញដូរកាលពីថ្ងៃទី២៨ ខែមីនា នៅពេលដែលតម្លៃមាសបានធ្លាក់ចុះមកនៅត្រឹម ១២៨៥,៨២ដុល្លារ ដែលជាតម្លៃទាបបំផុតគិតចាប់តាំងពីថ្ងៃទី១២ ខែកុម្ភៈមក។
មាសបានឡើងថ្លៃ៨ភាគរយនៅឆ្នាំនេះ ដល់តម្លៃខ្ពស់បំផុតក្នុងរយៈពេល៦ខែកាលពីថ្ងៃទី១៧ ខែមីនា ដោយសារការកាន់កាប់តំបន់គ្រីមារបស់ប្រទេសរុស្ស៊ី បានបង្កើនតម្រូវការមាស។
មាសបានធ្លាក់ថ្លៃ ២,២ភាគរយនៅខែនេះ ដោយសារទិន្នន័យសេដ្ឋកិច្ចអាមេរិក ដូចជាការបញ្ជាទិញទំនិញប្រើប្រាស់បានយូរ បានកើនឡើងខ្ពស់ជាងការព្យាករ ខណៈលោកស្រី Janet Yellen ប្រធានធនាគារកណ្តាលអាមេរិក បានឲ្យដឹងថា កម្មវិធីទិញមូលបត្របំណុលរបស់ធនាគារកណ្តាលមួយនេះ អាចនឹងបញ្ចប់នៅឆ្នាំនេះ ដោយអត្រាការប្រាក់នឹងចាប់ផ្តើមកើនឡើងនៅឆ្នាំ២០១៥។ ធនាគារកណ្តាលអាមេរិក បានកាត់បន្ថយការទិញទ្រព្យសកម្មប្រចាំខែចំនួន ១០ពាន់លានដុល្លារនៅក្នុងកិច្ចប្រជុំ៣លើកចុងក្រោយ។
តម្លៃមាសសម្រាប់ចែកចាយនៅខែមិថុនា បានកើនឡើង ០,២ភាគរយ ដល់ ១២៩៧,២០ដុល្លារក្នុងមួយអោននៅផ្សារ Comex ក្នុងទីក្រុងញូវយ៉ក និងបានធ្លាក់ចុះ ១,៩ភាគរយនៅខែមីនា។ ការកាន់កាប់ផលិតផលដែលងាយដោះដូរជាសាច់ប្រាក់គិតជាមាសនេះ គឺជាកំណើនកាន់កាប់មាសប្រចាំខែលើកដំបូង បន្ទាប់ពីបានធ្លាក់ចុះក្នុងរយៈពេល១៣ខែ គិតត្រឹមខែមករា ឆ្នាំនេះ៕
ប្រភពពី ភ្នំពេញប៉ុស្តិ៍
