ទំនាស់ពាក្យសំដីនៅក្នុងវង់រាំ ធុងបាស់វាយក្បាលមួយកែវដេរ២២ថ្នេរ
ខេត្តកណ្តាល ៖ យុវជនម្នាក់បានរងរបួសក្បាល និងលើផ្ទៃមុខដេរចំនួន២២ថ្នេរ បន្ទាប់ពីមានជម្លោះពាក្យសំដីគ្នាក្នុងវង់រាំធុងបាស់ ហើយត្រូវបានគូទំនាស់វាយមួយកែវ កាលពីវេលាម៉ោង២២និង៣០នាទី ថ្ងៃទី២៩ ខែមីនា ឆ្នាំ២០១៤ ចំណុចផ្ទះមានរៀបចំពីធីកាត់ចំណងដៃមួយកន្លែង ស្ថិតក្នុងភូមិថ្លើក ឃុំពើក ស្រុកអង្គស្នួល ខេត្តកណ្តាល ។
ក្រោយពីមានហេតុការណ៍កើតឡើង ជនដៃដល់ត្រូវបានសមត្ថកិច្ចនគរបាល ឃុំពើកចាប់ខ្លួនបញ្ជូនទៅកាន់អធិការដ្ឋាននគរបាលស្រុកអង្គស្នួល ដើម្បីកសាងសំណុំរឿងចាត់ការតាមនីតិវិធីច្បាប់ ។ ចំណែកឯជនរងគ្រោះត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យ ។
មន្ត្រីនគរបាលស្រុកអង្គស្នួលបានឲ្យដឹងថា ជនសង្ស័យដែលត្រូវបានចាប់ខ្លួន មានឈ្មោះ ហេង លីមគា ភេទប្រុស អាយុ២០ឆ្នាំ មុខរបរជាកម្មកររោងចក្រកាត់ដេរ មានទីលំនៅក្នុងភូមិត្រពាំងឈូក ឃុំពើក ស្រុកអង្គស្នួល ខេត្តកណ្តាល ។ ចំណែកជនរងគ្រោះមានឈ្មោះ វ៉ន ភារម្យ ភេទប្រុស អាយុ១៩ឆ្នាំ មុខរបរជាកម្មកររោងចក្រកាត់ដេរ មានទីលំនៅក្នុងភូមិត្រយឹង ឃុំពើក ស្រុកអង្គស្នួល រងរបួសក្បាល និងផ្ទៃមុខដេរ២២ថ្នេរ ។
ប្រភពដដែលបានបន្តថា នៅមនុពេលកើតហេតុជនរងគ្រោះ និងជនសង្ស័យបានទៅចូលរួមក្នុងពិធីកាត់ចំណងដៃកូនអ្នកស្រុកក្នុងភូមិ/ឃុំកើតហេតុខាងលើ ។ ក្រោយពីពិសារភោជនីអាហារ និងមានផឹកស្រាផងនោះ ក៏មានកម្មវិធីរាំធុងបាស់កម្សាន្តលេងផងដែរ ខណៈនោះជនសង្ស័យ និងជនរងគ្រោះបានចូលទៅរាំលេងកម្សាន្តជាមួយភ្ញៀវដទៃទៀត ។ ពេលកំពុងរាំនោះ ជនសង្ស័យនិងជនរងគ្រោះ ក៍បានកើតមានទំនាស់ពាក្យសំដីគ្នា ខណៈនោះជនរងគ្រោះក៏បានស្ទុះដាល់ទៅលើជនសង្ស័យ តែដាល់មិនត្រូវធ្វើឲ្យជនសង្ស័យមានឱកាសវាយក្បាលមួយកែវវិញ បណ្តាលឲ្យរងរបួសតែម្តង ៕
_____________________________
ប្រភពព័ត៌មានពី៖ នគវត្ត
ប្រភពព័ត៌មានពី៖ នគវត្ត
