ស្ប៉តពាណិជ្ជកម្មក្រុមហ៊ុន Cellcard ត្រូវស្នើឲ្យដកចេញ
ការិយាល័យក្រុមហ៊ុនទូរស័ព្ទចល័ត Cellcard នៅតាមមហាវិថី នរោត្តម។ រូបថត ម៉ៃ វីរៈ
ការផ្សាយពាណិជ្ជកម្មមានរយៈពេលប្រហែល ៦០ វិនាទី សម្រាប់បណ្ដាញទូរស័ព្ទ Cellcard របស់ក្រុមហ៊ុន Mobitel បានផ្សាយជាទៀងទាត់នៅលើបណ្ដាញទូរទស្សន៍កម្ពុជា (CTN) អស់រយៈពេលជាច្រើនសប្ដាហ៍។ ដំបូងបុរសនោះរៀបចំ ការណាត់ជួបគ្នាជាលើកដំបូងរបស់គាត់។ ដោយសារតែសេវាដែលគាត់ប្រើមានភាពរអាក់រអ៊ួលធ្វើឲ្យក្តីស្រមៃ របស់គាត់ត្រូវខកចិត្តនៅពេលជួបផ្ទាល់។ នៅក្នុងការផ្សាយពាណិជ្ជកម្មនោះបុរសម្នាក់ផ្សេងទៀតដែលប្រើ ប្រព័ន្ធ Cellcard និយាយថា៖ «ខ្ញុំប្រើប្រព័ន្ធទូរស័ព្ទ Cellcard! ដូច្នេះខ្ញុំមិនមានលទ្ធផលខកចិត្តដូចនេះទេ»។
បន្ទាប់ពីបានទស្សនាការផ្សាយពាណិជ្ជកម្មរួចមក លោក នួន ស៊ីដារ៉ា អ្នកសម្របសម្រួលគម្រោងសម្រាប់ការតម្រង់ទិស និងគម្រោងយេនឌ័ររបស់មជ្ឈមណ្ឌលសិទ្ធិមនុស្សកម្ពុជា បានផ្ញើលិខិតមួយច្បាប់ទៅលោក គិត ម៉េង អគ្គនាយកក្រុមហ៊ុន Royal Group ជាក្រុមហ៊ុនមេរបស់ Mobitel។
លិខិតនេះបានស្នើសុំថាក្រុមហ៊ុន «ត្រូវពិចារណាឡើងវិញពីការផ្សាយពាណិជ្ជកម្មនេះ» ហើយមិនត្រូវផ្សារភ្ជាប់រវាង «លទ្ធផលខកចិត្ត» និងមនុស្សខ្ទើយនោះឡើយ។
លោក ស៊ីដារ៉ា បានថ្លែងថា ការផ្សាយពាណិជ្ជកម្មទោះបីជាសំដៅដល់យុវវ័យក៏ដោយ ក៏មិនត្រូវឆ្លុះបញ្ចាំងតម្លៃរបស់មនុស្សវ័យក្មេងទាក់ទងនឹង សិទ្ធិអ្នកស្រឡាញ់ភេទដូចគ្នា និងសិទ្ធិរបស់មនុស្សខ្ទើយនោះឡើយ។
លោកបានទាមទារ និងបានអំពាវនាវឲ្យក្រុមហ៊ុនត្រូវដកការផ្សាយពាណិជ្ជកម្មនេះចេញ ទាំងស្រុង ហើយធានាថា ការផ្សាយពាណិជ្ជកម្មនាពេលអនាគតត្រូវគោរពសិទ្ធិមនុស្ស និងទប់ស្កាត់មិនឲ្យមានការរើសអើងប្រឆាំងនឹងបុគ្គលណាមួយនោះទេ រួមមានប្រជាជន កម្ពុជា នៅក្នុងសហគមន៍មនុស្សស្រឡាញ់ភេទដូចគ្នា។
លោក គិត ម៉េង មិនទាន់បានឆ្លើយតបនឹងលិខិតរបស់លោក ស៊ីដារ៉ា នៅឡើយទេ។
ភ្នំពេញ ប៉ុស្តិ៍ បានទាក់ទងទៅលោក គិត ម៉េង ប៉ុន្តែអ្នកដែលអះអាងថាជាជំនួយការផ្ទាល់របស់លោកបានបដិសេធមិន ធ្វើអត្ថាធិប្បាយ។
លោក Ian Watson អគ្គនាយកក្រុមហ៊ុន Cellcard មិនបាននិយាយថាតើការផ្សាយពាណិជ្ជកម្មនេះដែលត្រូវបានផលិតឡើងដោយ ក្រុមហ៊ុន Phibious ជាក្រុមហ៊ុនផ្សាយពាណិជ្ជកម្ម និងទីផ្សារក្នុងស្រុកនឹងត្រូវធ្វើការកែប្រែឬលុបចោលនោះទេ។ ប៉ុន្តែលោកថ្លែងថា ប្រតិបត្តិការសេវាទូរស័ព្ទចល័តមិនដែលគិតថា មាតិកានេះនឹងប្រមាថដល់នរណាម្នាក់នោះទេ។ លោកនិយាយថា៖ «ក្រុមហ៊ុន Cellcard មិនដែលគិតថាការផ្សាយពាណិជ្ជកម្មគឺជាមធ្យោបាយណាមួយចាត់ទុកថា ជាការប្រមាថនោះទេវាបានផ្សព្វផ្សាយដើម្បីបង្ហាញពីគុណភាពបណ្ដាញ ទូរស័ព្ទរបស់យើងដែលល្អនិងឮច្បាស់ គឺប្រឆាំងនឹងដៃគូប្រកួតប្រជែងយើង»។ លោកបញ្ជាក់ថា៖ «ផ្នែកស្រាវជ្រាវទីផ្សាររបស់យើងបង្ហាញថា សាធារណជនជាទូទៅបានយល់ថា គឺជាការផ្សាយពាណិជ្ជកម្មគួរឲ្យអស់សំណើច ដែលមិនមែនជាការប្រមាថមើលងាយនោះទេ»។
ក្រុមហ៊ុន Phibious ជាភ្នាក់ងារផ្សាយពាណិជ្ជកម្មដែលបានបង្កើតការផ្សាយពាណិជ្ជកម្ម នេះឡើងមិនបានឆ្លើយតបនឹងការស្នើសុំធ្វើអត្ថាធិប្បាយនោះទេ៕ PB
______________
ប្រភពពីភ្នំពេញប៉ុស្តិ
