ហាណូយ៖ ក្រុមការងារ កំពុងខិតខំប្រឹងប្រែង អស់ពីសមត្ថភាព ដើម្បីស្រាវជ្រាវ យន្តហោះរបស់ប្រទេស ម៉ាឡេស៊ី ដែលបានបាត់ ដំណឹងកាលពីពេលថ្មីៗ កន្លងទៅនេះ។ លោក Kong Xuanyou មន្ត្រីឯកអគ្គ រដ្ឋទូតចិនប្រចាំប្រទេសវៀតណាម បានលើកឡើងកាលពីថ្ងៃអង្គារ កន្លងទៅនេះដោយបង្ហាញក្តីសង្ឃឹមថា បញ្ហាទាំងអស់អាច នឹងប្រសើរឡើង ហើយភាពអស្ចារ្យមួយអាចនឹងកើតឡើងផងដែរ។

ភ្នាក់ងារសារព័ត៌មាន ចិនស៊ិនហួ ចុះថ្ងៃទី១២ ខែមីនា ឆ្នាំ២០១៤នេះបានឲ្យដឹងថា យន្តហោះបូអ៊ីងMH ៣៧០ មានផ្ទុកបុគ្គលិកចំនួន១២នាក់ អ្នកធ្វើដំណើរ២២៧នាក់ ដោយក្នុងនោះមានជនជាតិចិន ចំនួន១៥៤នាក់ ហើយយន្តហោះនេះគ្រប់គ្រងដោយក្រុមហ៊ុនម៉ាឡេស៊ី។

យន្តហោះនេះ បានចាកចេញពីព្រលានយន្តហោះអន្តរជាតិកូឡាឡាំពួរ ទៅកាន់ទីក្រុង ប៉េកាំង នៅព្រឹកថ្ងៃសៅរ៍ កន្លងទៅនេះ។ ក្នុងរយៈពេលមិនដល់មួយម៉ោង បន្ទាប់ពីការហោះហើរយន្តហោះនេះ បានបាត់ដំណឹង ពីប្រព័ន្ធរ៉ាដា  ហើយបានបាត់ស្រមោលតែម្តង ក្នុងពេលហោះហើរឆ្លងកាត់ តំបន់ដែលស្ថិតនៅក្រោមការ គ្រប់គ្រងរបស់រដ្ឋាភិបាល ហូជីម៉ិញ។

លោក Kong បានលើកឡើងថា រដ្ឋាភិបាលចិន បានបង្ហាញនូវក្តីព្រួយបារម្ភទាក់ទងនឹងការងារស្រាវជ្រាវ រកយន្តហោះ ព្រមទាំងបានស្នើស្ថានទូត និងក្រុមប្រឹក្សារបស់បណ្តាប្រទេសដែលជាប់ពាក់ព័ន្ធ បន្ត រក្សាទំនាក់ទំនង និងធ្វើការរួមគ្នាជាមួយភ្នាក់ងារផ្សេងៗ ក្នុងប្រតិបត្តិការណ៍នេះ។ លោកបន្តថា ប្រទេស ចិនបានបញ្ជូននាវា និងឧទ្ធម្ភាគចក្រ ដើម្បីជួយសម្រួលដល់ការងារនេះផងដែរ។

ប្រភពដដែលបានបន្ថែមទៀតថា នៅជំហានបន្ទាប់ ប្រទេសចិននឹងបញ្ជូនកម្លាំងបន្ថែមសម្រាប់ បំពេញការងារ នេះ ក្នុងករណីចាំបាច់។ មន្ត្រីឯកអគ្គរដ្ឋទូតរូបនេះបានបន្តថា ក្រុមការងារស្រាវជ្រាវពហុជាតិ សម្រាប់ការ ស្រាវជ្រាវ និងជួយសង្គ្រោះបានធ្វើទំនាក់ទំនងគ្នា រវាងកងកម្លាំងជើងទឹក អាកាស និងជើងគោក ធ្វើការរួមគ្នា ដើម្បីស្រាវជ្រាវទៅលើតំបន់ដែលកំពុងត្រូវបានពង្រីកទំហំទ្វេដង។ ក្រុមការងារត្រូវការពង្រឹងការប្រឹក្សា គ្នាទៅវិញទៅមក ដើម្បីការស្រាវជ្រាវ បានប្រសើរបំផុត។

ស្ថិតក្នុងពេលកំពុងបំពេញការងារស្រាវជ្រាវ ការពង្រឹងការប្រឹក្សា និងការរួមកម្លាំង ក៏ដូចជារបៀបនៃការបែងចែក តំបន់ស្រាវជ្រាវក្នុងចំណោម ភាគីទាំងអស់ពិតជាមានសារៈសំខាន់បំផុត។ សម្រាប់ការងារនេះ គួរតែមាន ការរៀបចំ វេទិការសម្រាប់ការប្រឹក្សាយោបល់ និងកំណត់ពេលវេលាច្បាស់លាស់ដើម្បីជួបពិភាក្សារវាង ក្រុមការងារទាំងអស់ ក្នុងគោលដៅបំពេញការងារបានប្រសើរបំផុត។

លោក Kong សង្ឃឹមថា កិច្ចប្រតិបត្តិការរួមគ្នារវាងប្រទេសទាំងអស់ ក្នុងការស្រាវជ្រាវ និងជួយសង្គ្រោះ នឹងកាន់ តែមានប្រសិទ្ធភាពថែមទៀត ដោយប្រទេសចិន បានត្រៀមជាស្រេចក្នុងការធ្វើការងារនេះយ៉ាងសកម្មបំផុត។លោកបន្តថា មនុស្សកំពុងទន្ទឹងរង់ចាំនូវភាពអស្ចារ្យដែលអាចកើតមានឡើង៕