ពលរដ្ឋ៥ភូមិផ្ទុះកំហឹងតវ៉ា នឹងអ្នកមានទ្រព្យរំលោភយកដីផ្លូវ
ខេត្ដកំពង់ធំ ៖ ប្រជាពលរដ្ឋ៥ភូមិបាន ផ្ទុះកំហឹងតវ៉ានិងការប្រើអំណាចផ្ដាច់ការរំលោភយកដីផ្លូវមកធ្វើជាកម្មសិទ្ធិ របស់លោក អ៊ុក វុន ដែលជាអ្នកមាន ឈ្មោះល្បីនៅក្នុងស្រុកបារាយណ៍បានធ្វើឱ្យប្រជាពលរដ្ឋក្ដៅក្រហាយដែលកន្លង ទៅធ្លាប់ពឹងពាក់អាជ្ញាធរមូលដ្ឋានឱ្យជួយ ដោះស្រាយតែពុំត្រូវបានដោះស្រាយជូនពួកគាត់ទេ ។
ប្រភពបានឱ្យដឹងថា មានការឃុបឃិត គ្នារវាងអាជ្ញាធរឃុំនឹងអាជ្ញាធរស្រុកដែលបណ្ដែតបណ្ដោយឱ្យមានការលក់ទិញ ដោយមិនស្របច្បាប់ដែលត្រូវបានឈ្មួញ បិទចំនួន២កន្លែង ទី១នៅផ្លូវរពាក់ពេន, ទី២នៅផ្លូវកុកឈូក ។ ផ្លូវទាំង២នេះត្រូវ បានប្រជាពលរដ្ឋអះអាងថា ជាផ្លូវរទេះ ដែលពួកគាត់ធ្លាប់ដើរឆ្លងកាត់ជាច្រើនសម័យមកហើយ តែមកដល់ពេលនេះ ទើបពួកគាត់ងឿងឆ្ងល់ថា ហេតុដូចម្ដេច បានជាអាជ្ញាធរមិនព្រមដោះស្រាយ ពេលឃើញមានការរំលោភយកដីផ្លូវ ដែលជាទ្រព្យសម្បត្ដិរបស់ប្រជាពលរដ្ឋ ទាំង៥ភូមិក្នុងនោះមានភូមិទន្លេវ័រ ភូមិគីរី អណ្ដែត ភូមិនាងល្អ ភូមិព្រៃវែង និង ភូមិព្រេច ។
ប្រជាពលរដ្ឋ១៤៩គ្រួសារបានតវ៉ាពីការបិទផ្លូវរបស់លោក អ៊ុក វុន ប្រជា ពលរដ្ឋអះអាងថា ជាផ្លូវដែលមានយូរ ណាស់មកហើយ លុះមកដល់ពេលនេះ ប្រជាពលរដ្ឋបានសំណូមពរឱ្យមូលនិធិឃុំជួយសាងសង់ផ្លូវរទេះនេះជាផ្លូវលំ ដើម្បីឱ្យប្រជាពលរដ្ឋទាំង៥ភូមិដែល ប្រើប្រាស់ផ្លូវនេះមានប្រវែង៣.៥០០ ម៉ែត្រតភ្ជាប់ពីផ្លូវដែលលោក ថោង ខុន រដ្ឋមន្ដ្រីក្រសួងទេសចរណ៍បានអភិវឌ្ឍន៍ ត្រូវលោក អ៊ុក វុន ចាក់គ្រិះស៊ីម៉ងត៍បិទ ផ្លូវដើម្បីសាងសង់ផ្ទះរបស់ខ្លួនទៅវិញ។
លោក អ៊ុក វុន និងលោក ស្រី អុំ សុជា បានគេចខ្លួនពុំឱ្យអ្នកយកព័ត៌មានសុំ ការបំភ្លឺនោះទេ ។ ចំណែកលោក ហាក់ ម៉ុងហួត អភិបាលស្រុកបារាយណ៍បាន ឱ្យដឹងថា តាមទំនាក់ទំនងគឺពិតជាពុំបិទ ផ្លូវនោះទេគឺមិនអាចឱ្យមានការបិទផ្លូវ ជាដាច់ខាត ព្រោះផ្លូវនេះជាផ្លូវរទេះតាំង ពីដើមឡើយមកម្ល៉េះ តែការសាងសង់ ផ្លូវលំនេះប្រជាពលរដ្ឋបានសំណូមពរផ្លូវកាន់តែធំវានឹងប៉ះពាល់ដល់ដីគេ ដូច្នេះ ត្រូវបានចរចាជាមួយម្ចាស់ដីសិន ៕
ប្រភពពី Free Press Magazine
