រាជធានីភ្នំពេញ ៖ កាលពីវេលា​ម៉ោង​ជិត១២ថ្ងៃត្រង់ ថ្ងៃទី២៦ ខែកុម្ភៈនេះកម្លាំង​សម្ថកិច្ចចម្រុះ​ បាន​ចុះ​ឡោមព័ទ្ធ​បង្ក្រាប​ទីតាំង​ជួញដូរ និង​ប្រើប្រាស់​គ្រឿង​ញឿ​ន​មួយកន្លែង ស្ថិតនៅ​ផ្ទះ​លេខ​២៤B ផ្លូវ​លេខ៦៦៦ ក្រុម១ ភូមិ១ សង្កាត់​បឹង​សាឡាង ខណ្ឌទួលគោក ដោយ​ឃាត់ខ្លួន​បាន​ជនសង្ស័យ ប្រុស​ស្រី​ចំនួន៨នាក់ រួម​នឹង​វត្ថុ​មួយចំនួន។
សមត្ថកិច្ច​បាន​ដឹង​​ថា កម្លាំង​យើង​បាន ចុះ​ស្រាវជ្រាវ ស៊ើបអង្កេត​ ដឹង​ថា ទីតាំង​ខាងលើ​មាន​ប្រព្រឹត្ត​បទល្មើស​ពាក់ព័ន្ធ​នឹង​គ្រឿងញៀន លោក​ក៏បាន​សុំ​គោលការណ៍​ពី ព្រះរាជអាជ្ញា និង​សុំ​ការ​សហការ​ជាមួយ​នគរបាល​ខណ្ឌ​ទួលគោក ដើម្បី​ចុះ​ឡោមព័ទ្ធ​បង្ក្រាប​ទីតាំង​ខាងលើ ។
សមត្ថកិច្ច​បាន​បន្ត​ទៀត​ថា កម្លាំង​សមត្ថកិច្ច​បាន​ឃាត់ខ្លួន​មនុស្ស​ប្រុស​ស្រី​ចំនួន​៨​នាក់ រួមមាន ៖ ១-​ណៃ ម៉េង ភេទ​ប្រុស អាយុ​៤២​ឆ្នាំ​, ២-​អែល សារិន ភេទ​ប្រុស អាយុ​៣៧​ឆ្នាំ​, ៣-​មាស ចិន្តា ភេទ​ស្រី អាយុ​៣៣​ឆ្នាំ​, ៤-​ច័ន្ទ ម៉ី​ម៉ី ភេទ​ស្រី អាយុ​២២​ឆ្នាំ​, ៥-​សេង សំណាង ភេទ​ប្រុស អាយុ​១៧​ឆ្នាំ​, ៦-​ជុំ កញ្ញា ភេទ​ស្រី អាយុ​១៧​ឆ្នាំ​, ៧-​ម៉ៅ លក្ខិណា ភេទ​ស្រី អាយុ​៣៧​ឆ្នាំ និង​៨-​ម៉ៅ ស្រី​ខួច ភេទ​ស្រី អាយុ​២២​ឆ្នាំ រួម​នឹង​វត្ថុតាង​មាន​ម៉ា​ទឹកកក ជាង២ខាំ, គ្រឿងញៀន​ប្រភេទ​យ៉ាម៉ា១៣២គ្រាប់, កាំភ្លើងខ្លី១ដើម​ម៉ា​កឡុក, រថយន្ត​ មួយ​គ្រឿង ម៉ាក RAV4 មួយ​គ្រឿង ពណ៌​ខ្មៅ ពាក់​ស្លាក​លេខ​ភ្នំពេញ 2B-3923, ម៉ូតូ​១​គ្រឿង​ម៉ាក​ហុងដា​ឌ្រី​ម សេ​១២៥ ស៊េរី​ឆ្នាំ​២០១៣ មួយ​គ្រឿង ពាក់​ស្លាក​លេខ​1CB-2754 ។
បច្ចុប្បន្ន ជនសង្ស័យ​និង​វត្ថុតាង សមត្ថកិច្ច​បាន​បញ្ជូន​មកកាន់​ការិយាល័យ​ប្រឆាំង​ការជួញដូរ​គ្រឿងញៀន​នៃ​ ស្នងការដ្ឋាន​នគរបាល​រាជធានី​ភ្នំពេញ ដើម្បី​សាកសួរ ឈានដល់​កសាង​សំណុំរឿង បញ្ជូនទៅ​សាលាដំបូង​រាជធានី​ភ្នំពេញ ចាត់ការ​បន្ត​តាម​នីតិវិធី៕
ប្រភពពី Free Press Magazine